អគ្គស្នងការនគរបាលជាតិ លោក ស ថេត ហាមដាច់ខាតមិនឲ្យក្រុមហ៊ុនផ្ដល់សេវាសន្តិសុខ និងសហគ្រាសគ្រឹះស្ថានជ្រើសរើសភ្នាក់ងារសន្តិសុខឯកជន យកជនបរទេសឲ្យបម្រើការងារជាភ្នាក់ងារសន្តិសុខឯកជននោះឡើយ។
យោងតាមការចេញផ្សាយរបស់អគ្គស្នងការដ្ឋាននគរបាលជាតិ បានបញ្ជាក់ពីការលើកឡើងរបស់លោក ស ថេត ថាលោកអំពាវនាវដល់ក្រុមហ៊ុនផ្ដល់សេវាសន្តិសុខឯកជន និងសហគ្រាសគ្រឹះស្ថានទាំងអស់ ត្រូវរាយការណ៍ជាប្រចាំពីចំនួនភ្នាក់ងារសន្តិសុខឯកជនដែលបានជ្រើសរើស ដើម្បីបញ្ចូលសាវតារភ្នាក់ងារសន្តិសុខឯកជនទៅក្នុងប្រព័ន្ធគ្រប់គ្រងតាមបច្ចេកវិទ្យាឌីជីថល។ រីឯទីតាំងស្នាក់នៅបណ្ដោះអាសន្ន ឬទីតាំងរស់នៅប្រមូលផ្ដុំរបស់ភ្នាក់ងារសន្តិសុខឯកជន ក៏ត្រូវរាយការណ៍ទៅសមត្ថកិច្ចនៅមូលដ្ឋាន និងត្រូវបំពេញបែបបទរដ្ឋបាលឱ្យបានត្រឹមត្រូវដែរ។
ប្រភពដដែលអះអាងថា ក្រុមហ៊ុនផ្តល់សេវាសន្តិសុខឯកជន និងសហគ្រាសគ្រឹះស្ថាននានាទាំងអស់ ហាមដាច់ខាតជ្រើសរើសជនបរទេសឲ្យបម្រើការងារជាកម្លាំងភ្នាក់ងារសន្តិសុខឯកជន។
អគ្គស្នងការនគរបាលជាតិបានបញ្ជាបន្ថែមថា ត្រូវចាត់បញ្ជូនភ្នាក់ងារសន្តិសុខឯកជនឱ្យមកទទួលការបណ្តុះបណ្តាលបំប៉នជំនាញអំពីតួនាទី ភារកិច្ច និងមេរៀនមូលដ្ឋានគ្រឹះផ្សេងៗឱ្យបានត្រឹមត្រូវ មុនដាក់ពង្រាយឱ្យឈរជើងតាមគោលដៅនីមួយៗ ហើយត្រូវម្ចាស់ការលើកកម្ពស់សមត្ថភាព វិជ្ជាជីវៈ វិន័យ សេចក្តីថ្លៃថ្នូរ ក្រមសីលធម៌ និងអាកប្បកិរិយារបស់ភ្នាក់ងារសន្តិសុខឯកជនឱ្យបានជាប់ជាប្រចាំ បូករួមទាំងកាយសម្បទាផងដែរ។
លោក ស ថេត បានបន្ថែមទៀតថា ចៀសវាងដាច់ខាតការប្រើប្រាស់ឯកសណ្ឋាន ស្លាកសញ្ញាស័ក្ដិដូច ឬស្រដៀងទៅកងកម្លាំងមានសមត្ថកិច្ច និងស្ថាប័នរដ្ឋ។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី១៧ មករា នេះថា កម្ពុជាមានកម្លាំងពលកម្មច្រើន ដូច្នេះគ្មានហេតុអ្វីដែលត្រូវអនុញ្ញាតឲ្យមានការជ្រើសរើសជនបរទេសមកធ្វើការងារជាភ្នាក់ងារសន្តិសុខនោះទេ។
ប្រភពដដែលអះអាងថា ច្បាប់កម្ពុជាមិនអនុញ្ញាតឲ្យជនបរទេសមកធ្វើការដូចពលរដ្ឋម្ចាស់ផ្ទះនោះទេ ហើយជនបរទេសដែលចូលមកធ្វើការនៅកម្ពុជា គឺសម្រាប់តែបុគ្គលិកបច្ចេកទេសប៉ុណ្ណោះ បើមិនដូច្នោះទេ នឹងធ្វើឲ្យបាត់បង់ការងារពលរដ្ឋនៅក្នុងស្រុក។
កន្លងមកមានម្ចាស់សណ្ឋាគារ និងកាស៊ីណូមួយកន្លែងនៅខេត្តព្រះសីហនុ បានជ្រើសរើសក្រុមសន្តិសុខជាជនបរទេសដោយគ្មានច្បាប់ទម្លាប់ ហើយត្រូវកម្លាំងមានសមត្ថកិច្ចកោះហៅម្ចាស់ទីតាំងមកធ្វើកិច្ចសន្យាបញ្ឈប់សកម្មភាពជាបន្ទាន់។
បច្ចុប្បន្ន កម្ពុជាមានភ្នាក់ងារសន្តិសុខឯកជនសរុបចំនួន ៣៤៥៩៨នាក់ ដែលត្រូវបានបែងចែកជាពីរ រួមមាន៖ ក្រុមហ៊ុនផ្តល់សេវាសន្តិសុខឯកជនសរុប ចំនួន ៣២១ក្រុមហ៊ុន ដែលមានភ្នាក់ងារសន្តិសុខឯកជនចំនួនជិត ២ម៉ឺននាក់ (១៨៨០៦នាក់) មានគោលដៅចំនួនជាង ៣ពាន់គោលដៅ (៣៣១៧គោលដៅ) និងសហគ្រាសគ្រឹះស្ថានជ្រើសរើសភ្នាក់ងារសន្តិសុខឯកជនសរុបចំនួនជិត ២ពាន់សហគ្រាសគ្រឹះស្ថាន (១៨៨៧) ដែលមានភ្នាក់ងារសន្តិសុខឯកជនចំនួនជាង ១ម៉ឺន ៥ពាន់នាក់ (១៥៧៩២នាក់) មានគោលដៅចំនួនជាង ២ពាន់ (២០៦២) គោលដៅ៕
© 2025, . All rights reserved.