ឯកអគ្គរដ្ឋទូតចិនប្រចាំនៅកម្ពុជា លោក វ៉ាង វិនប៊ីន បានបញ្ជាក់ជាថ្មីទៀតថា ចិននឹងបន្តជួយគាំទ្រកម្ពុជាដើម្បីជំរុញឲ្យទំនាក់ទំនងកម្ពុជា និងចិន កាន់តែរឹងមាំឡើងមួយកម្រិតទៀត ពីព្រោះប្រទេសកម្ពុជាជាមិត្តល្អ និងពិតប្រាកដដែលតែងរួមសុខទុក្ខជាមួយចិន ក្នុងរយៈពេល ៦៦ឆ្នាំកន្លងមកនេះ។
តាមទំព័រហ្វេសប៊ុករបស់អគ្គបញ្ជាការដ្ឋាននៃកងយោធពលខេមរភូមិន្ទ នៅថ្ងៃទី២២ ខែមករា បានឲ្យដឹងថា នៅក្នុងជំនួបរវាងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងលោក វ៉ាង វិនប៊ីន បានបញ្ជាក់ជាថ្មីពីទំនាក់ទំនងស្អិតល្មួតរវាងកម្ពុជា និងចិន។
លោកថា នៅក្នុងរយៈពេល ៦៦ឆ្នាំនៃទំនាក់ទំនងការទូត តំណាងកម្ពុជា និងភាគីចិន បានបញ្ជាក់ជំហរក្នុងការជួយគាំទ្រ និងឧបត្ថម្ភគ្នាទៅវិញទៅមកនៅគ្រប់កាលៈទេសៈ។
ឯកអគ្គរដ្ឋទូតចិនប្រចាំកម្ពុជា លោក វ៉ាង វិនប៊ីន បានបញ្ជាក់ថា ចិននឹងបន្តជួយគាំទ្រកម្ពុជាដើម្បីជំរុញឲ្យទំនាក់ទំនងកម្ពុជា និងចិន កាន់តែរឹងមាំឡើងមួយកម្រិតទៀត។ លោកថា កម្ពុជាជាមិត្តល្អ និងពិតប្រាកដ ដែលតែងរួមសុខទុក្ខជាមួយប្រទេសចិន។ លោកថា ការជួយគាំទ្រគ្នាទៅវិញទៅមកនៅក្នុងទំនាក់ទំនងការទូតកម្ពុជា-ចិន នារយៈពេល ៦៦ឆ្នាំកន្លងមកនេះ ជាគំរូល្អមួយក្នុងទំនាក់ទំនងអន្តរជាតិ។
លោក វង្ស ពិសេន បានប្រាប់លោក វ៉ាង វិនប៊ីន វិញថា កម្ពុជាពិតជាអរគុណចំពោះរដ្ឋាភិបាលចិន និងកងទ័ពរំដោះប្រជាជនចិន ដែលតែងយកចិត្តទុកដាក់ស្វែងរកសន្តិភាព និងអភិវឌ្ឍលើគ្រប់វិស័យដល់កម្ពុជានាពេលកន្លងមក។
លោក វង្ស ពិសេន អះអាងថា ការវិវត្តមិត្តភាពកម្ពុជា-ចិន ទៅជាមិត្តភាពកិច្ចសហប្រតិបត្តិការត្បូងពេជ្រពេលនេះ គឺដើម្បីរួមចំណែកកសាងសហគមន៍វាសនារួមកម្ពុជា-ចិន ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់។
អ្នកឃ្លាំមើលសង្គមលើកឡើងថា សព្វថ្ងៃនេះ ចិនបានក្លាយជាខ្នងបង្អែកដ៏រឹងមាំរបស់កម្ពុជាមិនថាលើវិស័យសេដ្ឋកិច្ច ពាណិជ្ជកម្ម ឬនយោបាយនោះទេ។ គម្រោងអភិវឌ្ឍន៍ធំៗជាច្រើននៅកម្ពុជា សុទ្ធសឹងតែជាការវិនិយោគរបស់ក្រុមហ៊ុនចិន រាប់ចាប់តាំងពីគម្រោងសាងសង់ផ្លូវល្បឿនលឿន ព្រលានយន្តហោះអន្តរជាតិ កំពង់ផែអន្តរជាតិ និងវិស័យផ្សេងៗជាច្រើនទៀត។
ទំនាក់ទំនងការទូតរវាងរដ្ឋាភិបាលក្រុងភ្នំពេញ និងរដ្ឋាភិបាលក្រុងប៉េកាំង កាន់តែមានភាពស្និទ្ធស្នាលខ្លាំង ដោយបានចាត់ទុកគ្នាជាមិត្តដែកថែបថែមទៀត។
កាលពីខែកញ្ញា ឆ្នាំ២០២៤ ក្រសួងការពារជាតិកម្ពុជា បានបញ្ជាក់ថា ចិនបានផ្តល់នាវាចម្បាំង ២គ្រឿងឲ្យកម្ពុជាតាមការស្នើសុំរបស់កម្ពុជា។
ក្រៅតែពីជួយធ្វើទំនើបកម្មនៅមូលដ្ឋានកងទ័ពជើងទឹករាមរបស់កម្ពុជា ចិនក៏បានផ្តល់ជំនួយជាច្រើនឲ្យកម្ពុជា តាមរយៈគម្រោងកិច្ចសហប្រតិបត្តិការផ្លូវមួយខ្សែក្រវាត់មួយ (BRI) ដើម្បីស្ថាបនាហេដ្ឋារចនាសម្ព័ន្ធក្នុងប្រទេស រួមមានស្ពាន ថ្នល់ និងព្រលានយន្តហោះ ជាដើម៕
© 2025, . All rights reserved.