អង្គការក្រៅរដ្ឋាភិបាល លើកឡើងថា កម្មករនិយោជិតខាងវិស័យវាយនភណ្ឌកាត់ដេរ នឹងជួបបញ្ហាកាន់តែធ្ងន់ធ្ងរបន្ថែមទៀត ប្រសិនបើប្រទេសកម្ពុជាបាត់បង់ប្រព័ន្ធអនុគ្រោះពន្ធ GSP ពីសហរដ្ឋអាមេរិក និងប្រព័ន្ធអនុគ្រោះពន្ធ EBA ពីសហភាពអឺរ៉ុប។
អង្គការសង្គមស៊ីវិលក្នុងស្រុកមួយចំនួន ផ្ញើលិខិតមកកាន់សារព័ត៌មាន The Cambodia Daily នៅថ្ងៃទី២៩ មករា នេះថា ប្រទេសកម្ពុជាជាប់ចំណាត់ថ្នាក់ទី១៤ លើពិភពលោកជាប្រទេសដែលនាំចេញផលិតផលក្នុងវិស័យកាត់ដេរ Garments, Footwears and Travel goods ដែលហៅកាត់ថា GFT និងជាប់ចំណាត់ថ្នាក់ទី៣ នៅក្នុងតំបន់សហគមន៍អាស៊ាន បន្ទាប់ពីប្រទេសវៀតណាម និងប្រទេសឥណ្ឌូនេស៊ី។
ប្រភពដដែលលើកឡើងថា ទំហំនៃការនាំចេញក្នុងវិស័យនេះបានកើនទ្បើងក្នុងទំហំទឹកប្រាក់សរុបប្រមាណជាង ១១ពាន់លានដុល្លារសហរដ្ឋអាមេរិកក្នុងឆ្នាំ២០២៣ និងប្រមាណជាង ១៣ពាន់លានដុល្លារក្នុងឆ្នាំ២០២៤ ដែលតួលេខនេះស្មើនឹងប្រមាណជា ៥០% នៃការនាំចេញសរុបពីប្រទេសកម្ពុជា ហើយដែលបានផ្តល់ការងារដល់ពលរដ្ឋជិត ១លាននាក់ និងផ្តល់អត្ថប្រយោជន៍ដល់សមាជិកគ្រួសារកម្មករក្នុងវិស័យនេះ រួមទាំងប្រជាពលរដ្ឋទូទៅជិត ៣លាននាក់ផងដែរ។
អង្គការក្រៅរដ្ឋាភិបាលទាំងនេះបន្តថា កត្តាប្រកួតប្រជែងនៃប្រទេសកម្ពុជា គឺពឹងផ្អែកលើប្រព័ន្ធអនុគ្រោះពន្ធ GSP ពីសហរដ្ឋអាមេរិក និង EBA ពីសហភាពអឺរ៉ុបទាំងស្រុង។ ក្នុងន័យនេះ បើប្រៀបធៀបការនាំចេញទំនិញពីប្រទេសកម្ពុជា ទៅកាន់ទីផ្សារក្នុងប្រទេសចិន កូរ៉េ និងជប៉ុន ជាដើម គឺមិនទាន់អាចជំនួសទីផ្សារនៅសហរដ្ឋអាមេរិក និងសហភាពអឺរ៉ុប បាននៅឡើយទេ។
បើនិយាយពីការប្រកួតប្រជែង ក្រុមសង្គមស៊ីវិលមើលឃើញថា ផលិតភាពនៃប្រទេសកម្ពុជា គឺមានកម្រិតទាបយ៉ាងខ្លាំង បើប្រៀបធៀបនឹងប្រទេសមួយចំនួន ដូចជាការចំណាយលើថ្លៃដើម តម្លៃថាមពល ហេដ្ឋារចនាសម្ព័ន្ធ និងការដឹកជញ្ជូន បូករួមទាំងពិន្ទុអំពើពុករលួយ ការគោរពសិទ្ធិមនុស្សនិងសិទ្ធិការងារទៀតផងនោះ គឺរឹតតែបង្ហាញអំពីការជះឥទ្ធិពលដ៏អាក្រក់កាន់តែខ្លាំងថែមទៀត។
ប្រភពដដែលថាប្រទេសកម្ពុជាត្រូវការទីផ្សារសហរដ្ឋអាមេរិក និងទ្វីបអឺរ៉ុប ជាពិសេសត្រូវការប្រព័ន្ធអនុគ្រោះពន្ធយ៉ាងខ្លាំង ដែលជាកត្តាក្នុងការប្រកួតប្រជែងលើការនាំចេញរបស់ខ្លួន ដូច្នេះប្រទេសកម្ពុជាត្រូវកសាងកេរ្តិ៍ឈ្មោះដោយការលើកកម្ពស់នីតិរដ្ឋ គោរពសិទ្ធិមនុស្ស សិទ្ធិការងារ ប្រជាធិបតេយ្យ ដើម្បីទទួលបានការអនុគ្រោះពន្ធសម្រាប់កសាងសេដ្ឋកិច្ចទៅថ្ងៃមុខ និងដើម្បីជាមូលដ្ឋានគ្រឹះក្នុងការចាកចេញពីប្រទេសអភិវឌ្ឍន៍ថ្នាក់ទាបក្នុងរយៈពេលខាងមុខនេះផងដែរ។
ក្រុមសង្គមស៊ីវិលទាំងនេះបញ្ជាក់ថា បញ្ហាដែលគួរយកចិត្តទុកដាក់ជាអាទិភាពសម្រាប់ធានាវិស័យវាយនភណ្ឌឱ្យមានស្ថិរភាពនោះ គឺរាជរដ្ឋាភិបាលត្រូវផ្តើមពីការលើកកម្ពស់យុត្តិធម៌សង្គម បើកលំហសេរីភាពសហជីព លើកកម្ពស់ និងពង្រឹងយន្តការក្នុងការដោះស្រាយវិវាទ កំណែទម្រង់គតិយុត្តិ ច្បាប់ស្ដីពីសហជីព ព្រមទាំងកសាងកម្លាំងពលកម្មជំនាញ និងទទួលស្គាល់អង្គការសង្គមស៊ីវិល ព្រមទាំងសហជីពឯករាជ្យ ដើម្បីចូលរួមពិគ្រោះផ្តល់យោបល់ផ្សេងៗផងដែរ។
ក្នុងស្ថានភាពនេះ ប្រទេសកម្ពុជានៅតែត្រូវការប្រព័ន្ធអនុគ្រោះ GSP និង GSP Plus ពីសហរដ្ឋអាមេរិក និង EBA ពីសហគមន៍អឺរ៉ុបបន្តទៀត។
កាលពីចុងឆ្នាំ២០២៤ នេះ សភាអឺរ៉ុប បានចេញសេចក្តីសម្រេចមួយដោយបានស្នើឱ្យគណៈកម្មការ និងរដ្ឋជាសមាជិកនៃសហភាពអឺរ៉ុប កែប្រែលក្ខខណ្ឌប្រព័ន្ធអនុគ្រោះពន្ធ EBA ដែលនៅសេសសល់ ៨០% សម្រាប់ប្រទេសកម្ពុជា ព្រោះតែការរឹតត្បិតផ្នែកនយោបាយ ការរំលោភសិទ្ធិមនុស្ស និងការរឹតត្បិតក្រុមអង្គការសង្គមស៊ីវិល៕
© 2025, . All rights reserved.