នាយករដ្ឋមន្ត្រី ហ៊ុន ម៉ាណែត បានសរសេរសារសំដៅទៅអតីតប្រធានគណបក្សប្រឆាំង លោក សម រង្ស៊ី ដោយចោទជាសំណួរថា តើអ្នកនយោបាយចាស់វស្សាត្រូវធ្វើមុខក្រាស់ ឬដាក់ខ្លួនងាកមកនិយាយល្អអំពីលោក ដូណាល់ ត្រាំ ដើម្បីទទួលបានការជួយឬទេ?
នៅក្នុងចំណារដែលបង្ហោះតាមហ្វេសប៊ុកនៅថ្ងៃទី២ ខែកុម្ភៈ ឆ្នាំ២០២៥ លោក ហ៊ុន ម៉ាណែត បានលើកឡើងថា លោកកត់សម្គាល់ឃើញថា ប៉ុន្មានថ្ងៃនេះលោកឃើញមានការចែករំលែកវីដេអូនៃបទសម្ភាសន៍លោក សម រង្ស៊ី ដែលជាអ្នកនយោបាយចាស់វស្សា និងជាជនឱកាសនិយមនៅក្នុងសារព័ត៌មាន The Cambodia Daily តាំងពីថ្ងៃទី១២ ខែកញ្ញា ឆ្នាំ២០២៤ ដែលពេលនោះលោក ដូណាល់ ត្រាំ នៅជាបេក្ខជនប្រធានាធិបតីសហរដ្ឋអាមេរិកនៅឡើយ។
លោក ហ៊ុន ម៉ាណែត លើកឡើងថា នៅក្នុងបទសម្ភាសន៍ លោក សម រង្ស៊ី បានរិះគន់លើបុគ្គលិកលក្ខណៈលោក ដូណាល់ ត្រាំ ថាជាមនុស្សនិយាយមិនពិត និងចូលចិត្តធ្វើប្រជាភិថុតិ។ លោកថា នៅពេលកន្លងមក លោកឃើញលោក សម រង្ស៊ី តែងតែយកខ្លួនទៅភ្ជាប់ជាមួយនឹងអ្នកដែលឈ្នះ ដូចជាលោកស្រី អ៊ុងសាន ស៊ូជី នៅភូមា ដែលឈ្នះការបោះឆ្នោតនៅឆ្នាំ២០១៥ និងថាលោក សម រង្ស៊ី តែងតែដាក់ខ្លួនឆ្ងាយពីបុគ្គលដែលចាញ់ ឬមានបញ្ហា។
លោក ហ៊ុន ម៉ាណែត បន្តថា ការដែលលោក សម រង្ស៊ី ហ៊ាននិយាយរិះគន់លោក ដូណាល់ ត្រាំ ជាង ១ខែមុនការបោះឆ្នោត ក៏ប្រហែលជាលោក សម រង្ស៊ី គិតថាលោក ដូណាល់ ត្រាំ នឹងមិនទទួលជោគជ័យក្នុងការបោះឆ្នោតទេ។ លោកលើកជាសំណួរថាតើលោក សម រង្ស៊ី ដែលតែងតែអួតពីការគាំទ្រពីសហរដ្ឋអាមេរិក នឹងស្នើសុំការជួយពីរដ្ឋបាលលោក ដូណាល់ ត្រាំ យ៉ាងណាទៀតទៅ?
កាលពីខែវិច្ឆិកា ឆ្នាំ២០១៦ លោក ហ៊ុន សែន ក្នុងតំណែងជានាយករដ្ឋមន្ត្រីប្រទេសកម្ពុជា បានមានប្រសាសន៍ថា លោកគាំទ្រលោក ដូណាល់ ត្រាំ ឱ្យឈ្នះនៅក្នុងការបោះឆ្នោតជ្រើសរើសប្រធានាធិបតីសហរដ្ឋអាមេរិក ពីព្រោះបេក្ខជនមកពីគណបក្សសាធារណរដ្ឋរូបនេះនឹងនាំមកនូវសន្តិភាពដល់ពិភពលោក រួមជាមួយបណ្ដាមេដឹកនាំផ្ដាច់ការក្នុងពិភពលោក ដូចជា លោក គីម ជុងអ៊ុន លោក រ៉ប៊ើត មូហ្គាបេ នៃប្រទេសម៉ូហ្សំប៊ីក និងលោក វ៉្លាឌីមៀ ពូទីន នៃប្រទេសរុស្ស៊ី ដែលគាំទ្រអតីតតារាទូរទស្សន៍ និងប្រធានក្រុមហ៊ុនរើសបវរកញ្ញាពិភពលោករូបនេះដែរ។
ទោះជាយ៉ាងណាក្ដី លោក សម រង្ស៊ី ប្រធានគណបក្សប្រឆាំងបានរិះគន់ខ្លាំងៗចំពោះហេតុផលលើកឡើងពីលោក ហ៊ុន សែន ព្រមទាំងអត្តចរិតលោក ត្រាំ ផងដែរ។ លោកថា លោក ហ៊ុន សែន និងលោក ត្រាំ មានលក្ខណៈស្រដៀងគ្នាយ៉ាងខ្លាំង។ លោកថា បក្សីដែលមានរោមដូចគ្នា វានៅផ្ដុំជាមួយគ្នា។ លោក ត្រាំ ហាក់ដូចជាជឿជាក់លើអំណាចផ្ដាច់ការដោយទឹកលុយ ហើយលោក ហ៊ុន សែន ហាក់ដូចជាជឿជាក់លើអំណាចផ្ដាច់ការដោយគ្រាប់កាំភ្លើងបូករួមជាមួយនឹងទឹកលុយ។ លោក ត្រាំ និងលោក ហ៊ុន សែន ពិតជាមិនមែនអ្នកប្រជាធិបតេយ្យនោះទេ។
គួររំឭកថា៖ លោក សម រង្ស៊ី បានឆ្លើយនឹងសំណួរពីសារព័ត៌មាន The Cambodia Daily ក្នុងកិច្ចសម្ភាសន៍នៅថ្ងៃទី៣ ខែកក្កដា ឆ្នាំ២០២៤ ដោយអធិប្បាយថា៖ លោក ដូណាល់ ត្រាំ កាលនោះជាបេក្ខជនប្រធានាធិបតីខាងបក្សសាធារណរដ្ឋ និយាយមិនសូវពិត ឬមិនសូវមានការពិតច្រើនទេ។ ការថ្លែងដូច្នេះ មិនមែនមានតែលោក សម រង្ស៊ី ទេ។ សារព័ត៌មានអន្តរជាតិរាប់មិនអស់ ថែមទាំងក្មួយស្រីក្មួយប្រុសបង្កើតរបស់លោក ត្រាំ ដូចជាបណ្ឌិតចិត្តវិទ្យា Mary Trump ជាដើម សរសេរអំពីលក្ខណៈធម្មជាតិនៃបុគ្គលឪពុកមា ដូណាល់ ត្រាំ ថាមានទម្លាប់បង្ហាញអំនួត និយាយធំៗ លើសៗ លឿនៗ មិនផ្អែកលើសច្ចភាព ឬការពិត។ ដូច្នេះ ការនិយាយស្តីប្រាសចាកការពិត ក្រោយពីមានអ្នកស្រាវជ្រាវឃើញថាវាមិនពិតនោះ គឺវាស្មើនឹងបំផ្លើស ភូតកុហកហើយ។ លោកចាញ់ក្តីក្នុងតុលាការជាច្រើនករណី ត្រូវសងជំងឺចិត្តជនរងគ្រោះរាប់សិបលានដុល្លារ ព្រោះតែលោកមិនទទួលស្គាល់ការពិតតាមការចោទប្រកាន់។
លោក ហ៊ុន ម៉ាណែត គួរតែជ្រាបហើយថា តើកាលលោករៀននៅបណ្ឌិតសភាយោធាសហរដ្ឋអាមេរិក West Point លោកអាចនិយាយបំផ្លើស ឬក្លែងបន្លំការពិតបានឬទេ?៕
© 2025, . All rights reserved.