នាយកអង្គការគាំទ្រសិទ្ធិមនុស្ស និងការងារអាស៊ី (AHRLA) លោក ហ្វីល រ៉ូបឺសុន (Phil Robertson) លើកឡើងថា ការស្លាប់តំណាងរាស្ត្របក្សប្រឆាំងលោក លិម គិមយ៉ា បានបង្ហាញឱ្យឃើញថា ទំនាក់ទំនងរវាងមេដឹកនាំបក្សកាន់អំណាចលោក ហ៊ុន សែន និងអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ជាទំនាក់ទំនងដែលមានគោលដៅលុបបំបាត់សកម្មជននយោបាយខ្មែរដែលកំពុងភៀសខ្លួនរស់នៅក្នុងប្រទេសថៃ។
លោក ហ្វីល រ៉ូបឺសុន (Phil Robertson) សរសេរលើទំព័រហ្វេសប៊ុករបស់ខ្លួននៅថ្ងៃទី៣ កុម្ភៈ នេះថា ទំនាក់ទំនងរវាងលោក ហ៊ុន សែន យ៉ាងជិតស្និទ្ធជាមួយលោក ថាក់ស៊ីន ស៊ីណាវ៉ាត់ ស្ថិតក្រោមការសង្ស័យអំពីការគាបសង្កត់ឆ្លងប្រទេសរវាងកម្ពុជា និងថៃ ទៅលើជនភៀសខ្លួននយោបាយដែលកំពុងជ្រកកោនក្នុងទឹកដីថៃ។
លោក ហ្វីល រ៉ូបឺសុន (Phil Robertson) លើកឡើងថា ការដឹកនាំរដ្ឋាភិបាលថៃ បច្ចុប្បន្ននេះ កំពុងដើរថយក្រោយ ដោយសារតែពួកគេគាំទ្រឱ្យមានការគាបសង្កត់ឆ្លងដែនពីប្រទេសកម្ពុជា ក្នុងការតាមចាប់អ្នកប្រឆាំង និងសកម្មជនខាងបក្សប្រឆាំង ដំណាលពេលដែលអ្នកទាំងនោះបាននាំគ្នាភៀសខ្លួនចេញពីរបបផ្ដាច់ការនៅទីក្រុងភ្នំពេញទៅហើយនោះ។
អ្នកសង្កេតការណ៍អន្តរជាតិរូបនេះបញ្ជាក់ថា ការសម្លាប់លោក លិម គិមយ៉ា បានបង្កើនការភ័យខ្លាចក្នុងចំណោមជនភៀសខ្លួននយោបាយនៅក្នុងប្រទេសថៃ កាន់តែខ្លាំងឡើងៗក្នុងពេលនេះ ជួនពេលដែលការគំរាមកំហែងលើពលរដ្ឋខ្មែរដែលកំពុងរស់នៅក្រៅប្រទេសដទៃទៀត ក៏កំពុងតែរីករាលដាលផងដែរ។
សកម្មជននយោបាយបក្សប្រឆាំងដែលកំពុងរស់នៅលើទឹកដីថៃ ក្នុងរយៈពេលចុងក្រោយនេះ ត្រូវគេសង្កេតឃើញថាមានការធ្វើទុក្ខបុកម្នេញពីអាជ្ញាធរថៃ ក្រោមកិច្ចសហការគ្នាជាមួយរដ្ឋាភិបាលទាំងពីរយ៉ាងខ្លាំងក្លា ចាប់តាំងពីការតាមចាប់ខ្លួនសកម្មជនទាំងនោះយកទៅដាក់ពន្ធនាគារនៅប្រទេសកម្ពុជា រហូតឈានដល់ការបាញ់សម្លាប់ ដូចជាករណីលោក លិម គិមយ៉ា ជាដើម ដែលត្រូវឃាតករបាញ់សម្លាប់ក្នុងទីក្រុងបាងកក កាលពីថ្ងៃទី៧ ខែមករា ជាដើម។
ទាក់ទិននឹងបញ្ហានេះ អតីតតំណាងរាស្ត្រអូស្ត្រាលីដើមកំណើតខ្មែរប្រចាំរដ្ឋវិចតូរីយ៉ា លោក ហុង លីម បានលើកឡើងកាលពីចុងសប្តាហ៍មុនថា លោកមានការព្រួយបារម្ភយ៉ាងខ្លាំងអំពីសុវត្ថិភាពសកម្មជននយោបាយបក្សប្រឆាំងដែលកំពុងភៀសខ្លួនរស់នៅលើទឹកដីថៃ សព្វថ្ងៃនេះ។
លោកបញ្ជាក់ថា ការចាប់បញ្ជូនខ្លួនសកម្មជននយោបាយពីប្រទេសថៃ ទៅប្រទេសកម្ពុជា ស្ថិតក្រោមហេតុផលនយោបាយកាលពីពេលកន្លងទៅ ជាឧទាហរណ៍មួយដែលបង្ហាញថារដ្ឋាភិបាលកម្ពុជាបានប្រើអំពើហិង្សាហួសព្រំដែន ដែលធ្វើឱ្យសកម្មជនខ្មែរដែលនៅសល់ក្នុងប្រទេសថៃ មានការភ័យខ្លាច ហើយការភ័យខ្លាចនេះក៏បានពង្រីកដល់សហគមន៍ខ្មែរក្នុងប្រទេសអូស្ត្រាលី ផងដែរ។
កាលពីពាក់កណ្តាលខែឧសភា ឆ្នាំ២០២៤ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញរបាយការណ៍មួយដោយប្រៀបប្រទេសថៃ ថា “Swap Mart” ឬហាងដោះដូរក្នុងប្រទេសថៃ កំពុងត្រូវបានកំណត់ជាទីតាំងគោលដៅក្នុងការដោះដូរជនភៀសខ្លួន ឬអ្នកដែលស្វែងរកសិទ្ធិជ្រកកោននយោបាយពីប្រទេសជិតខាង ដូចជាមកពីប្រទេសកម្ពុជា ជាដើម៕
© 2025, . All rights reserved.