ក្រុមអង្គការការពារសិទ្ធិមនុស្សជាតិ និងអន្តរជាតិ ធ្លាប់បានរាយការណ៍ជាហូរហែកន្លងមកថា ការបិទភ្នែកគាំពារ ឬបិទបាំងឧក្រិដ្ឋកម្មរៀបចំជាបណ្ដាញពីសំណាក់អាជ្ញាធរមានសមត្ថកិច្ច បានធ្វើឲ្យពលរដ្ឋខ្មែរគ្រប់មជ្ឈដ្ឋានរស់ក្នុងភាពភ័យភិត បារម្ភខ្វល់ខ្វាយអំពីសន្តិសុខ និងសុវត្ថិភាពផ្ទាល់ខ្លួនគ្រប់ពេលវេលា។
នេះជាស្ថានភាពក្នុងប្រទេសដែលអ្នកនយោបាយអះអាងថាមានសន្តិភាព ហើយអំពាវនាវឲ្យរក្សាសន្តិភាព។
សកម្មជនការពារព្រៃឈើដ៏ឆ្នើមនៅប្រទេសកម្ពុជា លោក ហេង ស្រស់ កំពុងភ័យព្រួយខ្លាចត្រូវក្រុមឧក្រិដ្ឋជនរកស៊ីឈើខុសច្បាប់តាមសម្លាប់ខ្លួនដូចសកម្មជនសង្គមមុនៗ។
លោក ហេង ស្រស់ សរសេរលើគណនីហ្វេសប៊ុករបស់ខ្លួនកាលពីពេលថ្មីៗនេះថា ចាប់តាំងពីលោកចូលប្រឡូកក្នុងកិច្ចការពារធនធានធម្មជាតិមក លោកតែងតែចុះស្រាវជ្រាវស្ទើរតែគ្រប់ទីកន្លែង ហើយការចុះទៅតំបន់នានា គឺមានការរាយការណ៍ពីពលរដ្ឋជានិច្ចអំពីការកាប់បំផ្លាញព្រៃឈើខុសច្បាប់ តែទន្ទឹមនឹងនេះ លោកក៏ត្រូវរងនូវការប្រមាថ គំរាមកំហែង និងការគំរាមបាញ់សម្លាប់ជាច្រើនលើកផងដែរ។
លោក ហេង ស្រស់ រៀបរាប់ថា នៅអំឡុងឆ្នាំ២០១៦ លោកត្រូវជនល្មើសដែលដឹកជញ្ជូនឈើក្នុងខេត្តមណ្ឌលគិរី យកទៅលក់នៅប្រទេសវៀតណាម គំរាមសម្លាប់កាប់នឹងពូថៅម្តងរួចមកហើយ។ ក្រោយមកទៀត នៅអំឡុងឆ្នាំ២០២០ មេការក្រុមហ៊ុនកាប់ឈើមួយនៅតំបន់ព្រៃឡង់ ខេត្តក្រចេះ ក៏បានគំរាមបាញ់សម្លាប់រូបលោកនៅកណ្ដាលព្រៃឡង់ម្តងទៀតដែរ បន្ទាប់ពីលោកបានចុះស៊ើបអង្កេតការកាប់ឈើខុសច្បាប់នៅតំបន់ព្រៃឡង់ ហើយដោយសារតែការគំរាមសម្លាប់នេះ លោកត្រូវបង្ខំចិត្តគេចខ្លួនមួយរយៈពេលធំដើម្បីសុវត្ថិភាពផ្ទាល់ខ្លួន។
សកម្មជនព្រៃឈើរូបនេះអះអាងថា រហូតដល់ឆ្នាំ២០២៣ សកម្មជនព្រៃឈើដែលធ្វើការជាមួយរូបលោក បានប្រាប់ថ្នាក់លើរបស់គេឱ្យចាត់ការរូបលោកចេញតែម្តងទៅ បន្ទាប់ពីលោកបានរិះគន់ពីការដឹកនាំឃុំ-សង្កាត់ដែលបណ្តោយឱ្យជនខិលខូចលួចកាន់កាប់ដីរដ្ឋដោយខុសច្បាប់នៅពេលនោះ។
លោក ហេង ស្រស់ បញ្ជាក់ថា លុះមកដល់ឆ្នាំ២០២៤ លោកត្រូវបានជនមិនស្គាល់មុខដែលជាម្ចាស់ក្រុមហ៊ុនបូមខ្សាច់នៅខេត្តកោះកុង គំរាមបាញ់សម្លាប់ទាំងគ្រួសារតែម្តង ដោយរូបគេប៉ុនប៉ងសម្លាប់ប្រពន្ធ និងកូនរបស់លោកមុន ហើយនឹងបាញ់សម្លាប់រូបលោកតាមក្រោយ ដូច្នេះលោកមិនដឹងថាតើខ្សែជីវិតរបស់លោកនឹងមានវាសនាដូចបណ្ឌិត កែម ឡី លោក ឈុត វុទ្ធី និងលោក ជា វិជ្ជា ឬយ៉ាងណានោះទេទៅថ្ងៃមុខ។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី៦ កុម្ភៈ នេះថា ការព្រួយបារម្ភរបស់សកម្មជនព្រៃឈើអំពីអាយុជីវិតរបស់ពួកគេ គឺពិតជាមិនខុសទេ ព្រោះការលះបង់ក្នុងការការពារធនធានធម្មជាតិមិនត្រូវបានលើកទឹកចិត្ត ឬសហការពីអាជ្ញាធរពាក់ព័ន្ធឡើយ គឺមានតែរារាំង និងការគំរាមកំហែងលើអាយុជីវិត ឬចាប់ដាក់គុកតែប៉ុណ្ណោះ។
លោក ស៊ឹង សែនករុណា លើកឡើងថា អាជ្ញាធរតែងដាក់បម្រាមលើសកម្មជនព្រៃឈើ ប៉ុន្តែបែរជាបើកដៃឱ្យឈ្មួញទុច្ចរិតកាប់បំផ្លាញព្រៃឈើខ្មែរតាមអំពើចិត្តទៅវិញ។ លោកថា បើនិយាយពីផ្លូវច្បាប់ សកម្មជនព្រៃឈើទាំងនោះមានសិទ្ធិពេញលេញក្នុងការចូលរួមថែរក្សាសម្បត្តិជាតិស្របតាមរដ្ឋធម្មនុញ្ញនៃប្រទេសកម្ពុជា។
ប្រធានអង្គការក្រៅរដ្ឋាភិបាលរូបនេះបញ្ជាក់ថា សព្វថ្ងៃនេះ ពិតមែនតែរដ្ឋាភិបាលមានមន្ត្រីអភិរក្សតំបន់ការពារព្រៃឈើ ប៉ុន្តែតាមរយៈការងាររបស់ពួកគេកន្លងមកបង្ហាញថា អ្នកទាំងនោះគ្រាន់តែជាអ្នកយាមផ្លូវឱ្យក្រុមឧក្រិដ្ឋជនរកស៊ីកាប់ឈើខុសច្បាប់ប៉ុណ្ណោះ ខណៈវិធានការពីរដ្ឋាភិបាលក៏មិនមានប្រសិទ្ធភាពក្នុងការអនុវត្តទោសទណ្ឌទៅលើជនល្មើសទាំងអស់នោះដែរ។
គួរបញ្ជាក់ថា លោក ឈុត វុទ្ធី ដែលជាសកម្មជនការពារព្រៃឈើដ៏ល្បីល្បាញមួយរូបត្រូវបានឃាតករបាញ់សម្លាប់ក្នុងពេលដែលលោកចុះស៊ើបអង្កេតបទល្មើសព្រៃឈើខុសច្បាប់នៅតំបន់ជួរភ្នំក្រវាញ ថ្ងៃទី២៦ ខែមេសា ឆ្នាំ២០១២។ អស់រយៈពេលជាង ១០ឆ្នាំមកនេះ យុត្តិធម៌សម្រាប់ក្រុមគ្រួសាររបស់លោក ឈុត វុទ្ធី នៅតែកប់បាត់គ្មានស្រមោល ខណៈសំណុំរឿងឃាតកម្មរបស់លោក ក៏ត្រូវរដ្ឋាភិបាលបិទចោលបញ្ឈប់ការស៊ើបអង្កេតដែរ។
រាជរដ្ឋាភិបាលក៏បានចេញបម្រាមបិទទិដ្ឋាការ ឬវីសាលើអ្នកកាសែតស៊ើបអង្កេតជនជាតិអង់គ្លេសម្នាក់ដែលមានឈ្មោះក្នុងបញ្ជីខ្មៅកាលពីខែវិច្ឆិកា ឆ្នាំ២០២៤ គឺលោក Gerald Flynn ដែលរាយការណ៍អំពីបញ្ហាបរិស្ថាន ដូចជាការកាប់ឈើខុសច្បាប់នៅប្រទេសកម្ពុជា ជាដើម ឲ្យទស្សនាវដី្ត Mongabay។
តាមសារព័ត៌មាន The Guardian ផ្សាយថ្ងៃទី៤ ខែកុម្ភៈ រាជរដ្ឋាភិបាលបានហាមមិនឲ្យលោកចូលប្រទេសកម្ពុជានៅថ្ងៃទី៥ ខែកុម្ភៈ មកពីរដ្ឋអំណាចក្រុងភ្នំពេញក្តៅក្រហាយនៅពេលឃើញលោកបង្ហាញឯកសារតាមទូរទស្សន៍បារាំង France 24។
ក្នុងសេចក្តីរាយការណ៍ស៊ើបអង្កេតនោះ ផ្ទៃដីព្រៃធម្មជាតិដ៏ធំធេងជាតំបន់ដែលពហុក្រុមហ៊ុនអន្តរជាតិខាងមណ្ឌលកម្សាន្ត ដូចជា Disney ក្រុមហ៊ុនផលិតយន្តហោះ Boeing ក្រុមហ៊ុនអាកាសចរណ៍ស៊ីវិល Delta ជាដើម ចំណាយថវិការាប់លានអឺរ៉ូ ដើម្បីទិញចំណែករក្សាព្រៃឈើស្រុកខ្មែរមិនឲ្យកាប់ ទុកឲ្យស្រូបយកផ្សែងកាបូន ដើម្បីកាត់បន្ថយការបញ្ចេញឧស្ម័នពុលទៅក្នុងបរិយាកាសដែលមនុស្សជាតិដកដង្ហើម៕
© 2025, . All rights reserved.