ចលនាខ្មែរដើម្បីប្រជាធិបតេយ្យ (KMD) ណែនាំឱ្យអ្នកប្រជាធិបតេយ្យផ្ដោតសកម្មភាពជាអាទិភាពសម្រាប់ប្រទេសកម្ពុជា ជុំវិញការរៀបចំការបោះឆ្នោតដោយសេរី បើកចំហ អហិង្សា ត្រឹមត្រូវ និងយុត្តិធម៌ ស្របតាមឆន្ទៈរបស់ប្រជាពលរដ្ឋខ្មែរ ជាជាងការឈ្លោះប្រកែកគ្នា។
ចលនាខ្មែរដើម្បីប្រជាធិបតេយ្យ ចេញសេចក្តីថ្លែងការណ៍កាលពីថ្ងៃទី៨ កុម្ភៈ ដែលទើបត្រូវបានផ្សព្វផ្សាយនៅថ្ងៃទី១០ កុម្ភៈ នេះថា KMD មានគោលដៅជាក់លាក់ក្នុងការផ្លាស់ប្ដូរស្ថានភាពកម្ពុជាទៅរកប្រព័ន្ធដឹកនាំបែបប្រជាធិបតេយ្យ សេរីពហុបក្ស ដែលពលរដ្ឋខ្មែរជាម្ចាស់សិទ្ធិស្វ័យសម្រេចលើវាសនាជាតិរបស់ខ្លួន។
ប្រភពដដែលលើកឡើងថា ដើម្បីសម្រេចគោលដៅក្នុងបុព្វហេតុប្រយោជន៍ពលរដ្ឋ និងប្រទេសកម្ពុជា អ្នកប្រជាធិបតេយ្យគ្រប់និន្នាការត្រូវប្រកាន់ខ្ជាប់ និងបដិបត្តិយ៉ាងម៉ឺងម៉ាត់នូវជំហរការពារយុត្តិធម៌ និងការផ្សះផ្សាបង្រួបបង្រួមអ្នកប្រជាធិបតេយ្យដោយសុចរិត ព្រោះជំហរ និងការបដិបត្តិ គឺជាវិន័យការងាររួមក្នុងប្រព័ន្ធដឹកនាំគ្រប់លំដាប់ថ្នាក់នៃចលនាខ្មែរដើម្បីប្រជាធិបតេយ្យ។
ចលនាខ្មែរដើម្បីប្រជាធិបតេយ្យ បញ្ជាក់ថា ដោយសារការចូលរួបរួមគ្នាជាកម្លាំងកន្លងមក ការតវ៉ារបស់ពលរដ្ឋខ្មែរទទួលបានផ្លែផ្កាដ៏ត្រចះត្រចង់ ដូចជា បញ្ហាតំបន់ត្រីកោណអភិវឌ្ឍន៍ (CLV-DTA) ជាដើម ដូច្នេះ KMD សង្ឃឹមថាពលរដ្ឋខ្មែរនឹងរួបរួមគ្នាជាកម្លាំងដណ្តើមទទួលបានសមិទ្ធផលធំៗបន្ថែមទៀត ជាពិសេសការនាំប្រជាធិបតេយ្យជូនប្រជាពលរដ្ឋខ្មែរនៅក្នុងប្រទេសនៅថ្ងៃអនាគត។
ក្រោយពីសមាសភាពចារកម្មរបស់បណ្ឌិត សេង សារី ត្រូវបានទម្លាយកាលពីថ្ងៃទី៥ កុម្ភៈ ការវាយប្រហារ និងរិះគន់ពីក្រុមអ្នកឃ្លាំមើលសង្គម អ្នកវិភាគ រួមទាំងសកម្មជននយោបាយបក្សប្រឆាំងផង បានធ្វើឡើងជាបន្តបន្ទាប់ ខណៈបណ្ឌិត សេង សារី ក៏បានធ្វើការចោទប្រកាន់ទៅកាន់មនុស្សមួយចំនួនវិញថាជាចារកម្មរបស់លោក ហ៊ុន សែន ដូចខ្លួនដែរ។
ជុំវិញបញ្ហានេះ អ្នកសិក្សាផ្នែកច្បាប់ លោក វ៉ន ចាន់ឡូត បានស្នើឱ្យពលរដ្ឋខ្មែរ និងសហគមន៍ខ្មែរនៅប្រទេសអូស្ត្រាលី ប្ដឹងទៅអាជ្ញាធរឱ្យស៊ើបអង្កេតលើអំពើពុករលួយដែលលោក ហ៊ុន សែន បានផ្តល់ឱ្យបណ្ឌិត សេង សារី រួមទាំងស្រាវជ្រាវការផ្តល់ព័ត៌មាននានាមុននឹងបណ្ឌិត សេង សារី ទទួលបានសិទ្ធិទៅរស់នៅប្រទេសអូស្ត្រាលី ផងដែរ។
យ៉ាងណាក៏ដោយ សកម្មជននយោបាយបក្សប្រឆាំងមួយចំនួន ដូចជានៅសហរដ្ឋអាមេរិក បារាំង និងកាណាដា ជាដើម លើកឡើងថា ការព្យាយាមបំផ្លាញបណ្ឌិត សេង សារី និងក្រុមគ្រួសាររបស់គាត់នៅពេលនេះ គឺជាទង្វើដែលកំពុងដើរចូលក្នុងល្បិចកលរបស់លោក ហ៊ុន សែន យ៉ាងពិតប្រាកដ៕
© 2025, . All rights reserved.