ប្រធានព្រឹទ្ធសភា និងជាប្រធានគណបក្សកាន់អំណាច លោក ហ៊ុន សែន បានតបតទៅនឹងការរិះគន់របស់ជនបរទេសមួយចំនួនទាក់ទងនឹងឥទ្ធិពលរបស់លោកទៅលើលោកនាយករដ្ឋមន្ត្រី ហ៊ុន ម៉ាណែត ក៏ដូចជាឥទ្ធិពលគណបក្សប្រជាជនកម្ពុជា ទៅលើមេដឹកនាំជំនាន់ថ្មីថា លោក ហ៊ុន ម៉ាណែត នឹងត្រូវដកដំណែង បើហ៊ានដើរហួសបន្ទាត់នយោបាយបក្ស។
ថ្លែងក្នុងពិធីសម្ពោធអគារសិក្សាក្នុងខេត្តកណ្តាល ព្រឹកថ្ងៃទី១១ កុម្ភៈ នេះ លោក ហ៊ុន សែន ប្រធានគណបក្សប្រជាជនកម្ពុជា បានបញ្ជាក់ថា នាយករដ្ឋមន្ត្រី ហ៊ុន ម៉ាណែត គ្មានផ្លូវដើរចេញពីស្រមោលលោកដែលជាឪពុក ឬស្រមោលគណបក្សប្រជាជនកម្ពុជាបានឡើយ។
លោក ហ៊ុន សែន បញ្ជាក់ថា កុំថាឡើយអ្នកផ្សេង សូម្បីតែកូនខ្លួនឯងក៏នឹងត្រូវដកចេញពីតំណែងដែរ ប្រសិនបើហ៊ានដើរ ឬអនុវត្តផ្ទុយពីគោលនយោបាយបក្ស។ លោកថា ការប្រគល់អំណាចឱ្យរដ្ឋាភិបាលបន្តវេន ធ្វើឡើងតាមគោលនយោបាយគណបក្ស និងការបោះឆ្នោតស្របច្បាប់។ លោកបន្តថា លោកមិនមែនជាសាស្ត្រាចារ្យរដ្ឋបាលសាធារណៈឡើយ ប៉ុន្តែលោកយល់ថាការវិភាគរបស់បរទេសមួយចំនួន គឺមានភាពល្ងង់ខ្លៅ។
កន្លងមក កាសែតបរទេស ឬអង្គការសង្គមស៊ីវិលក្រៅស្រុកមួយចំនួន នៅតែបន្តលើកឡើងថា លោក ហ៊ុន សែន ដែលជាឪពុកនៅតែក្តោបក្តាប់អំណាចដដែល ទោះបីតួនាទីជានាយករដ្ឋមន្ត្រីកម្ពុជាត្រូវបានប្រគល់ឱ្យលោក ហ៊ុន ម៉ាណែត គ្រប់គ្រងបន្តក៏ដោយ។
ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា បានអះអាងថា កូនអតីតនាយករដ្ឋមន្ត្រីឡើងធ្វើជានាយករដ្ឋមន្ត្រីបន្តពីឪពុក គឺពុំបានធ្វើអ្វីខុសពីឪពុករបស់ខ្លួនបានធ្វើនោះទេ ក្រៅតែអំពីគំរាមកំហែង និងប្រើប្រព័ន្ធច្បាប់ដើម្បីគាបសង្កត់អ្នកដែលមានគំនិតផ្ទុយពីខ្លួន។
លោកអះអាងថា ដំបូងឡើយមានការគិតវិភាគទុកថា នាយករដ្ឋមន្ត្រីជាកូននេះនឹងធ្វើឲ្យស្ថានភាពសិទ្ធិមនុស្ស ប្រជាធិបតេយ្យល្អប្រសើរ ប៉ុន្តែផ្ទុយស្រឡះ គ្មានអ្វីកែប្រែនោះទេ មានតែធ្លាក់ដុនដាបជាងជំនាន់ឪទៅទៀត ហើយលោក ហ៊ុន ម៉ាណែត ក៏គ្មានសិទ្ធិធ្វើអ្វីនោះទេ នៅតែឪជាអ្នកដឹកដៃ និងបញ្ជាពីក្រោយដដែល ដែលនេះបញ្ជាក់ឲ្យឃើញថាលោក ហ៊ុន ម៉ាណែត គ្មានសមត្ថភាពអ្វីនោះទេ។
ប្រភពដដែលបានឲ្យដឹងទៀតថា បើក្រឡេកមើលរដ្ឋមន្ត្រីនៅតាមក្រសួងក្រោមការដឹកនាំរបស់លោក ហ៊ុន ម៉ាណែត គឺមិនបានធ្វើអ្វីនោះទេក្នុងរយៈពេល ១ឆ្នាំនេះ ព្រោះរវល់តែរឿងបង្ហោះបង្អួតសកម្មភាពរបស់ខ្លួននៅតាមបណ្ដាញសង្គម។
កាលពីថ្ងៃទី៧ ខែសីហា ឆ្នាំ២០២៤ ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ «ចាត់តាំងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា សម្រាប់នីតិកាលទី៧ នៃរដ្ឋសភា»។ ព្រះរាជក្រឹត្យដដែលបញ្ជាក់ថា នាយករដ្ឋមន្ត្រីដែលទទួលបានការចាត់តាំងនេះមានភារកិច្ចរៀបចំសមាសភាពរាជរដ្ឋាភិបាល ដើម្បីសុំសេចក្តីអនុម័តទុកចិត្តពីរដ្ឋសភា។
នៅថ្ងៃទី២២ ខែសីហា ឆ្នាំ២០២៤ សមាជិកសភាចំនួន ១២៣រូបក្នុងចំណោម ១២៥រូប បានបោះឆ្នោតគាំទ្រលោក ហ៊ុន ម៉ាណែត ជានាយករដ្ឋមន្ត្រី ហើយនាយករដ្ឋមន្ត្រីវ័យ ៤៥ឆ្នាំរូបនេះចាប់ផ្តើមការងារជាផ្លូវការជាមួយគណៈរដ្ឋមន្ត្រីថ្មីរបស់លោកនៅថ្ងៃទី២៣ ខែសីហា ឆ្នាំ២០២៤៕
© 2025, . All rights reserved.