មេដឹកនាំបក្សកាន់អំណាច លោក ហ៊ុន សែន គំរាមថាលោកនឹងកម្ចាត់ចោលទាំងអស់អ្នកណាក៏ដោយដែលចង់សម្លាប់រូបលោក និងក្រុមគ្រួសាររបស់លោក ព្រោះលោកបានដឹងច្បាស់ហើយថាមេធំរបស់ពួកគេជាអ្នកណា ហើយនិងកំពុងនៅទីណា ប៉ុន្តែលោកនៅរង់ចាំមើលថា តើបក្សនយោបាយ និងអ្នកនយោបាយណាខ្លះដែលចេញមុខថ្កោលទោស ឬនៅស្ងៀម ឬគាំទ្រទង្វើភេរវកម្មនេះ។
បុរសខ្លាំងក្តាប់អំណាចផ្ដាច់មុខនៅកម្ពុជា លោក ហ៊ុន សែន ទម្លាយសារសំឡេងពីរឃ្លីបលើទំព័រហ្វេសប៊ុករបស់ខ្លួននៅថ្ងៃទី១៣ កុម្ភៈ នេះដោយភ្ជាប់នឹងសំណេរថា លោកសូមចែករំលែកនូវព័ត៌មានតូចមួយនៃផែនការភេរវកម្មដែលប៉ុនប៉ងធ្វើឃាតលើរូបលោក និងគ្រួសាររបស់លោក។
លោក ហ៊ុន សែន អះអាងថា លោកបានដឹងច្បាស់ហើយថាមេធំរបស់ពួកគេជាអ្នកណា ហើយនិងកំពុងនៅទីណា ប៉ុន្តែលោកមិនទាន់បញ្ចេញសមាសភាពរបស់គេនៅពេលនេះទេ ព្រោះលោកត្រូវកម្ចាត់ពួកជ្រុលនិយម និងហិង្សានិយមទាំងនេះឲ្យអស់ជាមុនសិន។
មេដឹកនាំបក្សកាន់អំណាចរូបនេះចោទជាសំណួរថា តើប្រទេសដែលអួតខ្លួនថាមានប្រជាធិបតេយ្យ និងគោរពសិទ្ធិមនុស្ស គួរគាំទ្រអំពើបែបនេះ និងឲ្យជនទាំងនេះស្នាក់នៅក្នុងប្រទេសខ្លួនបន្តទៀតដែរឬទេ។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១៣ កុម្ភៈ នេះថា ការប្រឹងរកល្បិចកលដើម្បីទម្លាក់កំហុសទៅលើក្រុមប្រឆាំង ដោយចោទពីអំពើភេរវកម្មនេះ គឺលោក ហ៊ុន សែន កំពុងរកលេសស្ទាបស្ទង់ក្នុងចេតនាបង្កើតច្បាប់ដាក់ក្រុមប្រឆាំងជាក្រុមភេរវកម្មប៉ុណ្ណោះ។
លោក ម៉ែន ណាត លើកឡើងថា លោក ហ៊ុន សែន ដឹងច្បាស់ថាបញ្ហាដែលក្រុមប្រឆាំងកំពុងទាមទារឱ្យលោក ហ៊ុន សែន និងលោក ហ៊ុន ម៉ាណែត ដោះស្រាយនៅពេលនេះ គឺមានច្រើនរាប់មិនអស់ ដូចជាបញ្ហាកោះគុត ឃាតកម្មលើលោក លិម គិមយ៉ា និងបញ្ហាស្អេកស្កះជាច្រើនទៀត ប៉ុន្តែគាត់មិនអាចដោះស្រាយបានទេ។
ក្នុងពិធីសម្ពោធអគារសិក្សានៅវត្តព្រះឥន្ទសាមគ្គីធម៌ ស្រុកអង្គស្នួល ខេត្តកណ្តាល កាលពីថ្ងៃទី១១ ខែកុម្ភៈ ឆ្នាំ២០២៥ មេដឹកនាំបក្សកាន់អំណាច លោក ហ៊ុន សែន លើកឡើងថា ការបង្ហោះដ្រូនចូលក្រុងតាខ្មៅ កាលពីប៉ុន្មានសប្តាហ៍កន្លងទៅនេះ គឺជាអំពើភេរវកម្ម ព្រោះសកម្មភាពបញ្ជូនដ្រូននេះគឺជាការប៉ុនប៉ងសម្លាប់រូបលោក និងក្រុមគ្រួសាររបស់លោកយ៉ាងពិតប្រាកដ៕
© 2025, . All rights reserved.