ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី អំពាវនាវដល់ដៃគូលោកខាងលិច ឱ្យដាក់សម្ពាធបន្ថែមទៀតលើប្រទេសរុស្ស៊ី បន្ទាប់ពីការវាយប្រហារដោយមីស៊ីលផ្លោងបាលិស្ទីក ballistic និងយន្តហោះគ្មានមនុស្សបើកពេញមួយយប់ ដោយបានសម្លាប់មនុស្សយ៉ាងតិចម្នាក់ រងរបួស ៤នាក់ និងបានបង្កឱ្យរដ្ឋធានីគៀវ (Kyiv) ឆេះច្រើនកន្លែង។
នេះបើយោងតាមការចុះផ្សាយរបស់សារព័ត៌មាន Kyiv Independent នៃប្រទេសអ៊ុយក្រែន កាលពីល្ងាចថ្ងៃទី១២ កុម្ភៈ។
តាមប្រភពព័ត៌មានដដែលនេះ មន្ត្រីអ៊ុយក្រែនបាននិយាយថា កងទ័ពរុស្ស៊ី បានបើកការវាយប្រហារពេញមួយយប់កាលពីយប់ថ្ងៃអង្គារ រហូតទៀបភ្លឺចូលដល់ថ្ងៃទីពុធ ទី១២ កុម្ភៈ ដោយបាញ់មីស៊ីលផ្លោងបាលិស្ទីក (ballistic) និងយន្តហោះគ្មានមនុស្សបើកដោយវាយប្រហារពាសពេញប្រទេសអ៊ុយក្រែន រួមនឹងរដ្ឋធានីគៀវ។
លោក ហ្សេឡេនស្គី បានសរសេរនៅលើបណ្ដាញ Telegram ថា អគារលំនៅឋានប្រជាជន និងអគារការិយាល័យជាច្រើនរងការវាយប្រហារ ដែលនេះគឺជាទង្វើភេរវកម្មរបស់អ្នកឈ្លានពាន។
បើតាមលោក ហ្សេឡេនស្គី អ៊ុយក្រែនបានបាញ់ទម្លាក់មីស៊ីលផ្លោង ballistic ចំនួន ៦គ្រាប់ក្នុងចំនួន ៧គ្រាប់ និងបាញ់ទម្លាក់ដ្រូន ៧១គ្រឿង និង ៤០គ្រឿងទៀតបាត់ចេញពីប្រព័ន្ធរ៉ាដាក្នុងចំណោម ១២៣គ្រឿង។
ប្រធានាធិបតីអ៊ុយក្រែន បានបង្ហោះសារក្នុងបណ្ដាញសង្គម Telegram ថា «លោក ពូទីន មិនបានសម្របសម្រួលស្ថានការណ៍សង្គ្រាមដើម្បីធ្វើឱ្យមានកិច្ចព្រមព្រៀងសន្តិភាពណាមួយទេ ព្រោះលោក ពូទីន នៅតែបន្តសម្លាប់ជនជាតិអ៊ុយក្រែន និងបំផ្លាញទីក្រុងរបស់អ៊ុយក្រែន»។
លោក ហ្សេឡេនស្គី ទទូចថា៖ «ឥឡូវនេះត្រូវការការរួបរួម និងការគាំទ្រពីសម្ព័ន្ធមិត្តរបស់អ៊ុយក្រែន ទាំងអស់ក្នុងការប្រយុទ្ធដើម្បីបញ្ចប់សង្គ្រាមរបស់លោក ពូទីន»។
ជាមួយគ្នានេះ អភិបាលក្រុងគៀវ លោក Vitali Klitschko បាននិយាយនៅលើបណ្ដាញសង្គម Telegram ថា សេវាសង្គ្រោះបន្ទាន់នៅទីក្រុងគៀវ បានរាយការណ៍ពីអគ្គិភ័យ និងការខូចខាតផ្សេងទៀតនៅឯអគារក្នុងសង្កាត់ចំនួនបួនក្នុងទីក្រុងគៀវ។
ទ័ពអ៊ុយក្រែន បាននិយាយថា រុស្ស៊ីក៏បានបញ្ចេញមីស៊ីលវាយប្រហារលើទីក្រុង Kryvyi Rih ដែលមានទីតាំងក្នុងតំបន់ Dnipropetrovsk ផងដែរ។ អភិបាលតំបន់ Dnipropetrovsk លោក Serhiy Lysak បាននិយាយថា ការវាយប្រហាររបស់រុស្ស៊ី បានបំផ្លាញសាលារៀន សណ្ឋាគារ អគាររដ្ឋបាល និងអគារផ្ទះល្វែងចំនួនបីកន្លែង។
ប្រេសិតពិសេសរបស់លោក ដូណាល់ ត្រាំ លោក Keith Kellogg នឹងទៅទីក្រុងគៀវ ក្នុងសប្ដាហ៍នេះ ខណៈលោក JD Vance អនុប្រធានាធិបតីរបស់លោក ត្រាំ នឹងទៅចូលរួមសន្និសីទសន្តិសុខក្រុង Munich ប្រទេសអាល្លឺម៉ង់ នៅសប្ដាហ៍ក្រោយនេះ ដែលលោក ហ្សេឡេនស្គី ក៏ត្រូវមានវត្តមាននៅឯវេទិកានោះដែរ។
ក្រោយបន្តិចដែលគ្រាប់មីស៊ីលផ្លោង ballistic របស់រុស្ស៊ី វាយប្រហារលើរដ្ឋធានីគៀវ វិមានក្រឹមឡាំង បានចេញមកច្រានចោលយ៉ាងដាច់អហង្ការនូវលទ្ធភាពណាមួយក្នុងការដោះដូរទឹកដីដែលខ្លួនកាន់កាប់នៅក្នុងប្រទេសអ៊ុយក្រែន សម្រាប់ផ្នែកខ្លះនៃតំបន់ Kursk របស់រុស្ស៊ី ដែលបច្ចុប្បន្នកំពុងកាន់កាប់ដោយកងកម្លាំងអ៊ុយក្រែន។
ការប្រកាសនេះ កើតឡើងបន្ទាប់ពីលោក ហ្សេឡេនស្គី បានលើកឡើងនៅក្នុងបទសម្ភាសន៍មួយជាមួយកាសែត The Guardian នៃប្រទេសអង់គ្លេស អំពីលទ្ធភាពនៃការផ្តល់ឱ្យរុស្ស៊ី នូវការដោះដូរទឹកដីដោយផ្ទាល់ដើម្បីបញ្ចប់សង្គ្រាម។ លោក ហ្សេឡេនស្គី បានស្នើឱ្យមានការដោះដូរផ្នែកខ្លះនៃតំបន់ Kursk ដែលកាន់កាប់ដោយទ័ពអ៊ុយក្រែន សម្រាប់ទឹកដីអ៊ុយក្រែន ដែលរុស្ស៊ី កាន់កាប់។
អ្នកនាំពាក្យវិមានក្រឹមឡាំង លោក Dmitry Peskov បានច្រានចោលសំណើនេះយ៉ាងដាច់ខាត។ លោកបានថ្លែងនៅក្នុងសន្និសីទសារព័ត៌មានថា៖ «រឿងនេះមិនអាចទៅរួចទេ។ រុស្ស៊ី មិនដែលពិភាក្សាទេ ហើយនឹងមិនពិភាក្សាអំពីការដោះដូរទឹកដីរបស់ខ្លួនឡើយ»។
លោក Peskov អះអាងថា កងទ័ពរុស្ស៊ី នឹងបណ្តេញកងទ័ពអ៊ុយក្រែន ចេញពីតំបន់ Kursk។
ការលើកឡើងរបស់លោក Peskov ធ្វើឡើងតាមពីក្រោយការប្ដេជ្ញាចិត្តរបស់ប្រធានាធិបតីរុស្ស៊ី វ៉្លាឌីមៀ ពូទីន ដែលបានថ្លែងថា កងទ័ពរុស្ស៊ីនឹងដណ្តើមយកតំបន់ Kursk មកវិញ ប៉ុន្តែលោក ពូទីន មិនបានបញ្ជាក់ពីពេលវេលាដែលត្រូវកំណត់វាយរុញច្រានទ័ពអ៊ុយក្រែន ចេញពីទឹកដីរុស្ស៊ី ពេលណាឡើយ។
អ៊ុយក្រែន បានលើកទ័ពវាយលុកចូលខាងក្នុងទឹកដីរុស្ស៊ី នៅតំបន់ Kursk កាលពីថ្ងៃទី៦ ខែសីហា ឆ្នាំ២០២៤។ បើគិតមកដល់ពេលនេះ មានរយៈពេល ៦ខែហើយ។
នៅក្នុងសមរភូមិ Kursk នេះ រុស្ស៊ីប្រើប្រាស់ទ័ព ៥០០០០នាក់ និងទ័ពកូរ៉េខាងជើង ១២០០០នាក់។ តែបើយោងតាមអគ្គមេបញ្ជាការកងទ័ពអ៊ុយក្រែន ឧត្ដមសេនីយ៍ Oleksandr Syrsky ថារុស្ស៊ីបាត់បង់ទ័ពជិត ៤០០០០នាក់ ក្នុងនោះស្លាប់ ១៦០០០នាក់។ ចំណែកទ័ពកូរ៉េខាងជើង បាត់បង់ជាង ៤០០០នាក់ និងស្លាប់ ១១០០នាក់។
ក្នុងស្ថានភាពនេះនៅតំបន់សមរភូមិ Kursk អ៊ុយក្រែននៅតែឈរជើងបានរឹងមាំលើផ្ទៃដីជិត ១០០០គីឡូម៉ែត្រក្រឡា ប៉ុន្តែខាងក្នុងទឹកដីអ៊ុយក្រែន វិញ ទ័ពរុស្ស៊ីកំពុងវាយកាន់កាប់បានពីទ័ពអ៊ុយក្រែន ប្រមាណជា ២០% ឬ ៤០០០០គីឡូម៉ែត្រក្រឡា។
អ្នកសង្កេតការណ៍មិនមើលឃើញសង្គ្រាមរុស្ស៊ី និងអ៊ុយក្រែន អាចបិទបញ្ចប់បានឆាប់នោះទេ បើរុស្ស៊ី មិនអាចរុញទ័ពអ៊ុយក្រែន ចេញពីខាងក្នុងទឹកដីរុស្ស៊ី វិញនោះ៕
© 2025, . All rights reserved.