ក្រុមកូដករនៃក្រុមហ៊ុនណាហ្គាវើលដ៍ (NagaWorld) ត្អូញត្អែរថា រយៈពេល ៣ឆ្នាំនៃការធ្វើកូដកម្មទាមទារសិទ្ធិការងារពីក្រុមហ៊ុនណាហ្គាវើលដ៍ មិនទទួលបានដំណោះស្រាយសូម្បីតែមួយចំណុច។
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ដែលហៅកាត់ថា LRSU ចេញធ្វើកូដកម្មតវ៉ាទាមទារសិទ្ធិការងារនៅថ្ងៃទី១៤ កុម្ភៈ ដោយការលើកផ្ទាំងបដាធំៗដែលសរសេរលក្ខខណ្ឌទាមទារ ៨ចំណុច បន្ទាប់ពីពួកគេរងភាពអយុត្តិធម៌ដោយសារការរំលោភសិទ្ធិការងារអស់រយៈពេលជាង ៣ឆ្នាំដោយគ្មានដំណោះស្រាយ។
ក្រុមកូដករទាំងនេះអះអាងថា ជាង ៣ឆ្នាំនៃការទាមទាររបស់ពួកគេមិនមែនជាការស៊ីឈ្នួលទេ ហើយក៏មិនមែនដើម្បីញុះញង់ដែរ ប៉ុន្តែដើម្បីទទួលបានដំណោះស្រាយប៉ុណ្ណោះ ដូចជាការទាមទារឱ្យថៅកែណាហ្គាវើលដ៍ ត្រូវទទួលយកថ្នាក់ដឹកនាំសហជីព និងសមាជិកឲ្យចូលធ្វើការវិញ និងត្រូវគិតគូរប្រាក់បំណាច់បញ្ចប់កិច្ចសន្យាការងារឲ្យបានត្រឹមត្រូវតាមច្បាប់ ជាដើម។
ជាងនេះទៀត ត្រូវគិតគូរប្រាក់បញ្ចប់កិច្ចសន្យាការងារបន្ថែមឲ្យបានត្រឹមត្រូវសម្រាប់កម្មករដែលត្រូវបានបញ្ឈប់ក្នុងឆ្នាំ២០២០ និងដើមឆ្នាំ២០២១ ហើយក៏ត្រូវផ្ដល់ប្រាក់បំណាច់អតីតភាពការងារ និងប្រាក់រំឭកអតីតភាពការងារឲ្យបានត្រឹមត្រូវតាមច្បាប់ និងត្រូវដំឡើងប្រាក់ឈ្នួលគោល ៧% លើប្រាក់ឈ្នួលបច្ចុប្បន្នផងដែរ។
លើសពីនេះ ក៏ត្រូវបញ្ឈប់ការកេងប្រវ័ញ្ចតាមរយៈការប្រើបុគ្គលិកក្រោមស្លាកកម្មសិក្សាជាថ្នូរឱ្យពួកគេក្លាយជាបុគ្គលិកពេញសិទ្ធិ និងត្រូវបញ្ឈប់ប្រធានផ្នែកកាស៊ីណូលោក Florian Pastiu ផងដែរ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៤ កុម្ភៈ ថា ការធានាបាននូវសិទ្ធិការងាររបស់កម្មករ ក៏ជាការធានានូវសេដ្ឋកិច្ចរបស់កម្ពុជាដែរ ព្រោះថាអ្នកវិនិយោគបរទេសល្អៗនឹងចូលទៅបណ្ដាក់ទុនរកស៊ីនៅកម្ពុជាដោយគ្មានភាពស្ទាក់ស្ទើរ បើគេមើលឃើញថាកម្ពុជាធានាបាននូវសិទ្ធិការងាររបស់កម្មករនិយោជិត។
លោក សេក សុជាតិ អំពាវនាវឱ្យរដ្ឋាភិបាលផ្តល់ដំណោះស្រាយសម្រាប់កូដករនៃក្រុមហ៊ុនណាហ្គាវើលដ៍ ក្នុងលក្ខខណ្ឌសមរម្យមួយ ដើម្បីឱ្យភាគីទាំងសងខាងអាចទទួលយកបានទាំងអស់គ្នា ដោយមិនទុកពួកគេចោលដូចការអះអាងរបស់ខ្លួនកន្លងមក ព្រោះការតវ៉ារបស់កូដករទាំងនេះមិនមែនព្រោះតែប្រឆាំងនឹងរដ្ឋាភិបាលទេ គឺដើម្បីតែសិទ្ធិការងាររបស់ពួកគេប៉ុណ្ណោះ។
គិតចាប់តាំងពីចុងខែធ្នូ ឆ្នាំ២០២១ ដែលក្រុមកូដករបាននាំគ្នាចេញតវ៉ាទាមទាររកយុត្តិធម៌ បន្ទាប់ពីថៅកែក្រុមហ៊ុនណាហ្គាវើលដ៍បញ្ឈប់ពួកគេពីការងារដោយរំលោភច្បាប់មក គឺមានរយៈពេល ៣ឆ្នាំ ១ខែ ២៧ថ្ងៃ (១១៥៤ថ្ងៃ) ហើយ ប៉ុន្តែដំណោះស្រាយនៅតែគ្មានសម្រាប់កម្មកររងគ្រោះទាំងនេះ ខណៈក្រសួងការងារក៏មិនបានចេញមុខរកយុត្តិធម៌ឱ្យពួកគេដែរ៕
© 2025, . All rights reserved.