អតីតមេដឹកនាំបក្សប្រឆាំង លោក សម រង្ស៊ី លើកឡើងថា បើនាយករដ្ឋមន្ត្រី ហ៊ុន ម៉ាណែត ជាមេដឹកនាំស្អាតស្អំ និងក្លាហាន ចង់លុបបំបាត់គ្រឿងញៀន ទាល់តែគាត់ហ៊ានចាប់ខ្លួនបងប្អូនជីដូនមួយរបស់គាត់ គឺលោក ហ៊ុន តូ និងលោក ហ៊ុន សែន ជាឪពុក។
លោក សម រង្ស៊ី សរសេរលើទំព័រហ្វេសប៊ុករបស់ខ្លួនកាលពីថ្ងៃទី១៧ កុម្ភៈ ថា លោក ហ៊ុន តូ ជាមេក្រុមម៉ាហ្វីយ៉ា និងមេជួញដូរគ្រឿងញៀនដ៏ធំនៅប្រទេសកម្ពុជាសព្វថ្ងៃនេះ ចំណែកឪពុករបស់គាត់ គឺលោក ហ៊ុន សែន ក៏ជាប់ពាក់ព័ន្ធជាមួយនឹងមេឧក្រិដ្ឋជនគ្រឿងញៀនទាំងអស់ដែលកំពុងលាក់ខ្លួននៅស្រុកខ្មែរដែរ។
ប្រភពដដែលលើកឡើងថា បញ្ហាគ្រឿងញៀននៅកម្ពុជាបានក្លាយទៅជាជំងឺរាតត្បាតដែលប៉ះពាល់ដល់មនុស្សគ្រប់ស្រទាប់វណ្ណៈនៃសង្គមកម្ពុជា ហើយការកើនឡើងនៃចំនួនអ្នកប្រើថ្នាំញៀន រួមទាំងអ្នកផលិត និងអ្នកចែកចាយផង ក៏បានបង្កអស្ថិរភាពក្នុងសង្គមទាំងមូលយ៉ាងធ្ងន់ធ្ងរដែរ។
អតីតមេដឹកនាំបក្សប្រឆាំងរូបនេះអះអាងថា វិបត្តិនេះកាន់តែធ្ងន់ធ្ងរឡើងដោយសារអំពើពុករលួយក្រោមការឃុបឃិតគ្នារវាងមន្ត្រីរដ្ឋាភិបាលកំពូល និងពួកឧក្រិដ្ឋជន។ លោកថា ដោយសារតែបែបនេះ ក្រុមម៉ាហ្វីយ៉ាបានប្រែក្លាយប្រទេសកម្ពុជាទៅជាមជ្ឈមណ្ឌលក្នុងតំបន់សម្រាប់ការផលិត ចែកចាយគ្រឿងញៀន និងប្រព្រឹត្តសកម្មភាពឧក្រិដ្ឋកម្មផ្សេងៗដោយមិនញញើតច្បាប់ឡើយ។ មិនត្រឹមតែបំផ្លាញសហគមន៍មូលដ្ឋានប៉ុណ្ណោះទេ ប៉ុន្តែថែមទាំងបង្កការគំរាមកំហែងយ៉ាងធ្ងន់ធ្ងរដល់ប្រទេសក្នុងតំបន់ បង្កើនឧក្រិដ្ឋកម្មឆ្លងដែន និងប៉ះពាល់ដល់អាយុជីវិតប្រជាជនក្នុងប្រទេសជាច្រើនថែមទៀត។
កាលពីថ្ងៃទី១២ ខែកុម្ភៈ នាយករដ្ឋមន្ត្រី ហ៊ុន ម៉ាណែត សារភាពថា ស្ថានភាពគ្រឿងញៀននៅកម្ពុជានៅតែស្ថិតក្នុងសភាពប្រឈមធ្ងន់ធ្ងរនៅឡើយ ព្រោះការជួញដូរ ការប្រើប្រាស់ ការចែកចាយ និងការកែច្នៃផលិតគ្រឿងញៀននៅតែបន្តកើតមាននៅកម្ពុជា។
ក្នុងសេចក្តីប្រកាសផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ រយៈពេល ១ឆ្នាំ សម្រាប់ឆ្នាំ២០២៥ លោក ហ៊ុន ម៉ាណែត បញ្ជាក់ថា ដើម្បីឆ្លើយតបការប្ដេជ្ញាចិត្តថាកម្ពុជាគឺជាប្រទេសគ្មានគ្រឿងញៀន រដ្ឋាភិបាលសម្រេចដាក់ចេញនូវផែនការស្ដីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់សម្រាប់ឆ្នាំ២០២៥ បន្តទៀត៕
© 2025, . All rights reserved.