ចលនាខ្មែរដើម្បីប្រជាធិបតេយ្យ (KMD) រិះគន់ថា ការបង្គាប់ឱ្យមន្ត្រីជាន់ខ្ពស់គណបក្សកម្លាំងជាតិ លោក រ៉ុង ឈុន បង់លុយ ១សែនដុល្លារក្នុងសំណុំរឿងពាក់ព័ន្ធនឹងបញ្ហាព្រំដែន គឺបង្ហាញពីអាវុធនៃប្រព័ន្ធតុលាការក្នុងរបៀបវារៈនយោបាយដើម្បីកម្ទេចបក្សប្រឆាំង។
ចលនាខ្មែរដើម្បីប្រជាធិបតេយ្យ ចេញសេចក្តីថ្លែងការណ៍នៅថ្ងៃទី១៨ កុម្ភៈ នេះថា រដ្ឋាភិបាលដែលកំពុងក្តោបក្តាប់ដោយត្រកូលហ៊ុន កំពុងប្រើអំណាចគ្របសង្កត់ទៅលើច្បាប់ដោយរំលោភទៅលើរដ្ឋធម្មនុញ្ញនៃប្រទេសកម្ពុជា ចំពោះមាត្រាដែលបានចែងអំពីសិទ្ធិសេរីភាពបញ្ចេញមតិ ក៏ដូចជាកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ផងដែរ។
ប្រភពដដែលលើកឡើងថា ការពិន័យរបស់តុលាការលើសំណុំរឿងលោក រ៉ុង ឈុន គឺជាការអនុវត្តខុសនីតិវិធីច្បាប់ទាំងស្រុង ចំពោះការបញ្ចេញមតិរបស់លោកអំពីព្រំដែនជាមួយវៀតណាម ដែលបានរំលោភទឹកដីខ្មែរ និងការធ្វើអាជីវកម្មខុសច្បាប់លើធនធានធម្មជាតិរបស់កម្ពុជា ដូចជា ព្រៃឈើជាដើម ក្រោមការកេងចំណេញរបស់វៀតណាម គឺជាបញ្ហាស៊ីជម្រៅដែលពលរដ្ឋខ្មែរគ្រប់រូបកំពុងមានការព្រួយបារម្ភ។
KMD អះអាងថា ការចោទប្រកាន់ពីបទញុះញង់ គឺជាឧបករណ៍ដ៏ពេញនិយមមួយនៃអាវុធរបស់រដ្ឋាភិបាលតាមរយៈប្រព័ន្ធតុលាការ ដែលត្រូវបានប្រើដើម្បីបំបិទមាត់ក្រុមប្រឆាំង សមាជិកសភា សកម្មជនបរិស្ថាន និងអ្នកសារព័ត៌មាន ជាដើម ព្រោះបទប្បញ្ញត្តិញុះញង់នេះគ្មានខ្លឹមសារជាក់លាក់ទេ ប៉ុន្តែខ្លឹមសាររបស់វា គឺស្ថិតនៅលើរដ្ឋាភិបាលជាអ្នកកំណត់ប៉ុណ្ណោះ។
ចលនាខ្មែរដើម្បីប្រជាធិបតេយ្យ អំពាវនាវឱ្យរដ្ឋាភិបាលកម្ពុជាបញ្ឈប់ការធ្វើទុក្ខបុកម្នេញលើលោក រ៉ុង ឈុន។ ជាងនេះទៀត ក៏ត្រូវបញ្ចប់ការយាយីលើអ្នកទោសនយោបាយទាំងអស់ និងត្រូវតែដោះលែងឱ្យពួកគេមានសេរីភាពស្របតាមស្មារតីដើមនៃរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ដោយឥតលក្ខខណ្ឌ។
កាលពីថ្ងៃទី១១ ខែកុម្ភៈ ឆ្នាំ២០២៥ សាលាដំបូងរាជធានីភ្នំពេញ បានបង្គាប់ឱ្យទីប្រឹក្សាគណបក្សកម្លាំងជាតិ លោក រ៉ុង ឈុន កញ្ញា ស កណិការ និងលោក តុន និមល រួមគ្នាសងសំណងការខូចខាតចំនួន ១០ម៉ឺនដុល្លារទៅគណៈកម្មាធិការចម្រុះកិច្ចការព្រំដែន។
ជាងនេះទៀត សាលាឧទ្ធរណ៍ក៏បានចេញដីកាកោះកាលពីថ្ងៃទី១៣ ខែកុម្ភៈ ឱ្យលោក រ៉ុង ឈុន ចូលរួមសវនាការដើម្បីជំនុំជម្រះលើបណ្តឹងសុំឱ្យផ្តល់នីតិសម្បទានៅចុងខែមីនា ឆ្នាំ២០២៥ នេះជាកំហិតថែមទៀត បន្ទាប់ពីលោកបានដាក់ពាក្យបណ្ដឹងទៅសាលាឧទ្ធរណ៍ សុំសិទ្ធិធ្វើនយោបាយឡើងវិញកាលពីថ្ងៃទី១៣ ខែវិច្ឆិកា ឆ្នាំ២០២៤ កន្លងទៅនោះ។
លោក រ៉ុង ឈុន ត្រូវបានសមត្ថកិច្ចចាប់ខ្លួនដាក់ពន្ធនាគារចំនួន ៣លើករួចមកហើយ៕
© 2025, . All rights reserved.