ក្នុងបណ្តាថ្នាក់ដឹកនាំប្រទេសអាស៊ាន លោកនាយករដ្ឋមន្ត្រី ហ៊ុន ម៉ាណែត គឺជានាយករដ្ឋមន្ត្រីដែលប្រើប្រាស់ថវិកាក្នុងការផ្សព្វផ្សាយលើបណ្ដាញសង្គមហ្វេសប៊ុកច្រើនជាងគេរហូតដល់ទៅជាង ១លាន ៦សែនដុល្លារសហរដ្ឋអាមេរិក គិតចាប់ពីថ្ងៃទី៤ ខែសីហា ឆ្នាំ២០២០ ដល់ថ្ងៃទី១៦ ខែកុម្ភៈ ឆ្នាំ២០២៥។ នេះបើតាមបណ្ណាល័យពាណិជ្ជកម្មនៃក្រុមហ៊ុនមេតា ដែលផ្សព្វផ្សាយជាសាធារណៈ។
ប្រធានាធិបតីប្រទេសហ្វីលីពីន លោក Bong Bong Marcos បានចំណាយប្រាក់ប្រមាណជា ៣៤៧៦៦,៩៦ដុល្លារ ($34,766.96) ស្មើនឹងជាង ២,១៥% នៃការចំណាយរបស់លោក ហ៊ុន ម៉ាណែត។
ចំណែកឯនាយករដ្ឋមន្ត្រីប្រទេសម៉ាឡេស៊ី Anwar Ibrahim ចំណាយ ១៨៦៧,៥៧ដុល្លារ ($1,867.57) ស្មើនឹង ០,១២% នៃចំណាយលោក ហ៊ុន ម៉ាណែត។
លោក Prabowo Subianto ប្រធានាធិបតីប្រទេសឥណ្ឌូនេស៊ី ចំណាយ ១៨៧,៥៤ដុល្លារ ($187.54) ស្មើនឹង ០,០១% នៃចំណាយរបស់លោក ហ៊ុន ម៉ាណែត និងចុងក្រោយ នាយករដ្ឋមន្ត្រីប្រទេសសិង្ហបុរី លោក Lawrence Wong មិនចំណាយលើការផ្សព្វផ្សាយហ្វេសប៊ុករបស់ខ្លួននោះទេ។ ចំណែកឯថ្នាក់ដឹកនាំរដ្ឋផ្សេងៗទៀត មិនមានហ្វេសប៊ុកផ្លូវការបង្ហាញនោះទេ។
គិតចាប់ពីថ្ងៃទី១៩ ខែវិច្ឆិកា ឆ្នាំ២០២៤ រហូតមកដល់ថ្ងៃទី១៦ ខែកុម្ភៈ នេះ គឺរយៈពេល ៩០ថ្ងៃ ផេក ឬទំព័រផ្លូវការរបស់លោកនាយករដ្ឋមន្ត្រី ហ៊ុន ម៉ាណែត ចំណាយប្រាក់ប្រមាណជា ៨៤៤០១ដុល្លារ ($84,401) ដោយគិតជាមធ្យមចំណាយប្រហែលជាជិត ១ពាន់ដុល្លារក្នុងមួយថ្ងៃ។
ក្រោយមានការផ្សព្វផ្សាយពីការប្រើប្រាស់លុយដើម្បីផ្សព្វផ្សាយលើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន ម៉ាណែត នៅលើបណ្តាសាព័ត៌មាននានាកាលពីដើមខែកុម្ភៈ នេះមក ចំនួន Facebook Ads ដែលមានសកម្មភាព ឬហៅថា Active Ads ជាច្រើនត្រូវបានកំណត់បញ្ឈប់ការផ្សាយនៅត្រឹមថ្ងៃទី១៣ ខែកុម្ភៈ ឆ្នាំ២០២៥ ដោយនៅសល់ Facebook ads ចំនួនតែ ២ ទៅ ៣ ads ប៉ុណ្ណោះដែលមានសកម្មភាពក្នុងថ្ងៃទី១៩ ខែកុម្ភៈ ឆ្នាំ២០២៥ នេះ។ ចំណែកឯចំនួនចំណាយប្រចាំថ្ងៃក៏ចុះពីប្រមាណ ១ពាន់ដុល្លារក្នុងមួយថ្ងៃដោយគិតជាមធ្យមមកនៅត្រឹមប្រមាណជា ១០០ដុល្លារប៉ុណ្ណោះ។
គិតចាប់ពីថ្ងៃទី៧ ខែឧសភា ឆ្នាំ២០១៨ រហូតមកដល់ថ្ងៃទី១៩ ខែកុម្ភៈ ឆ្នាំ២០២៥ នេះ ចំនួន Facebook ads ទាំងកំពុងនៅដំណើរការ (active) ទាំងឈប់ដំណើរការ (Inactive) គឺមានសរុបចំនួន ២៧០៥ ads។
លោក ស៊ឹង សែនករុណា បាននិយាយថា “ទោះជាយ៉ាងណា បណ្ដាញសង្គមហ្វេសប៊ុកបានផ្តល់នូវតម្លាភាពដល់សាធារណជនមើលឃើញពីការចំណាយប្រាក់របស់អ្នកនយោបាយនៅលើវេទិការបស់ខ្លួន”។
លោកបន្ថែមថា “នេះបានហ្វេសប៊ុកបង្ហាញយើង ចុះការចំណាយសម្រាប់ក្រុមការងារផ្សព្វផ្សាយលើបណ្ដាញសង្គមរបស់លោក ហ៊ុន ម៉ាណែត ដែលបង្កើតក្រុម Share ផុស និងចូលខំមិនតាមហ្វេសប៊ុកនានាដែលគេរិះគន់គាត់នោះ តើចំណាយអស់ប៉ុន្មានទៀត?”
ការធ្វើការផ្សព្វផ្សាយលើហ្វេសប៊ុកដែលលោកនាយករដ្ឋមន្ត្រីនិយាយកាលពីព្រឹកនេះ ថាវាជាទំព័រផ្ទាល់ខ្លួនរបស់គាត់ គឺមិនមែននោះទេ។ ចំនួន Facebook ads ទាំងជាង ៧ពាន់នេះ គឺត្រូវបានដកស្រង់ចេញពីទំព័រផ្លូវការដែលមានឈ្មោះថា Samdech Thipadei Hun Manet, Prime Minister of Cambodia ដែលជាទំព័រហ្វេសប៊ុកដែលស្ថិតក្នុងប្រភេទជា Government Organization ហើយមានអ្នកតាមដានចំនួនជាង ៤លាននាក់។ ចំណែកឯគណនីផ្ទាល់ខ្លួនរបស់លោក ហ៊ុន ម៉ាណែត ដែលមានឈ្មោះថា Manet Hun មាន Friend ចំនួនជាង ៣ពាន់នាក់។
លោក ហ៊ុន ម៉ាណែត ក៏មានទំព័រហ្វេសប៊ុកផ្ទាល់ខ្លួនមួយទៀតដែរដែលមានអ្នកតាមដានចំនួន ១លានកន្លះ៕
© 2025, . All rights reserved.