រដ្ឋមន្ត្រីក្រសួងការបរទេសកម្ពុជា និងជាឧបនាយករដ្ឋមន្ត្រី លោក ប្រាក់ សុខុន បានស្នើទៅអ្នកកាន់អាណត្តិអង្គការសហប្រជាជាតិ (អ.ស.ប) ឱ្យបំពេញការងារដោយប្រកាន់ខ្ជាប់នូវតុល្យភាព និងកម្មវត្ថុច្បាស់លាស់ ដើម្បីចៀសវាងការធ្វើនយោបាយូបនីយកម្ម និងស្តង់ដាពីរ ខណៈអង្គការសង្គមស៊ីវិលរកឃើញថា ក្នុងឆ្នាំ២០២៤ ការរំលោភបំពានសិទ្ធិសេរីភាពបញ្ចេញមតិ និងការផ្សព្វផ្សាយអំពីសិទ្ធិមូលដ្ឋានរបស់ពលរដ្ឋ បានកើនឡើងជាង ៩០% ពីសំណាក់អាជ្ញាធរមូលដ្ឋាន។
យោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី២៤ ខែកុម្ភៈ រដ្ឋមន្ត្រីក្រសួងការបរទេសកម្ពុជា បានលើកឡើងនៅក្នុងកិច្ចប្រជុំលើកទី៥៨ តាមរយៈវីដេអូថតទុកថា សន្តិភាពជាមូលដ្ឋានគ្រឹះនៃការអភិវឌ្ឍប្រកបដោយចីរភាព និងការពារសិទ្ធិមនុស្ស។
លោក ប្រាក់ សុខុន បានលើកឡើងអំពីការប្ដេជ្ញាចិត្តនៃប្រទេសកម្ពុជាចំពោះសន្តិភាពពិភពលោកថា ប្រទេសកម្ពុជាបានចូលរួមក្នុងបេសកកម្មថែរក្សាសន្តិភាពពិភពលោកតាមរយៈអង្គការសហប្រជាជាតិ។ សព្វថ្ងៃ កងកម្លាំងកម្ពុជាជិត ១ម៉ឺននាក់ ត្រូវបានបញ្ជូនទៅក្នុងបេសកកម្មថែរក្សាសន្តិភាព អ.ស.ប។
លោករដ្ឋមន្ត្រីក្រសួងការបរទេសបញ្ជាក់ថា លោកស្នើឱ្យអ្នកកាន់អាណត្តិ អ.ស.ប ប្រកាន់នូវវិធីសាស្ត្រប្រកបដោយតុល្យភាព និងកម្មវត្ថុច្បាស់លាស់ ដើម្បីជៀសវាងការធ្វើនយោបាយូបនីយកម្ម និងស្តង់ដាពីរ។ លោកថា រាជរដ្ឋាភិបាលកម្ពុជាយកចិត្តទុកដាក់លើបញ្ហាសិទ្ធិមនុស្ស ដោយចូលរួមយ៉ាងសកម្មក្នុងយន្តការសិទ្ធិមនុស្ស អ.ស.ប រួមមានយន្តការត្រួតពិនិត្យឡើងវិញជាសកលជុំទី៤ (UPR) ខែឧសភា ឆ្នាំ២០២៤ បន្តអនុស្សរណៈនៃការយោគយល់ (MOU) ជាមួយការិយាល័យឧត្ដមស្នងការសិទ្ធិមនុស្ស អ.ស.ប។
កាលពីថ្ងៃទី១០ ខែកុម្ភៈ ឆ្នាំ២០២៥ សមាគមការពារសិទ្ធិមនុស្ស និងការអភិវឌ្ឍនៅកម្ពុជា (អាដហុក) ចេញសេចក្តីរាយការណ៍ស្ដីពីការរឹតត្បិតសេរីភាពបញ្ចេញមតិ និងសេរីភាពជួបជុំនៅមូលដ្ឋានថា រយៈពេលពេញ ១ឆ្នាំក្នុងឆ្នាំ២០២៤ ការរំលោភបំពានសិទ្ធិសេរីភាពបញ្ចេញមតិនៅកម្ពុជាតាមរយៈការជួបជុំដោយសន្តិវិធី និងការផ្សព្វផ្សាយអំពីសិទ្ធិមូលដ្ឋានរបស់ពលរដ្ឋ បានកើនឡើងជាង ៩០% ពីសំណាក់អាជ្ញាធរមូលដ្ឋាន។
សេចក្តីរាយការណ៍ដដែលបញ្ជាក់ថា អាជ្ញាធរតាមសហគមន៍មូលដ្ឋានក្នុងភូមិជិត ៣០០ (២៩៦ភូមិ) ឃុំ-សង្កាត់ជាង ១០០ (១១១ឃុំ-សង្កាត់) និងស្រុកក្រុងជាង ៦០ ក្នុងខេត្តគោលដៅចំនួន ២២ បានរឹតត្បិតសិទ្ធីសេរីភាពបញ្ចេញមតិតាមរយៈនៃការជួបជុំដោយសន្តិវិធីយ៉ាងធ្ងន់ធ្ងរ។
ជាមួយគ្នានោះ អង្គការការពារសិទ្ធិមនុស្សលីកាដូ (LICADHO) បានរកឃើញថា ចាប់តាំងពីអំឡុងខែកក្កដា ឆ្នាំ២០២៤ មក រាជរដ្ឋាភិបាលបានចាត់វិធានការក្តៅចាប់ខ្លួនពលរដ្ឋដែលបញ្ចេញមតិរិះគន់ការដឹកនាំរបស់ខ្លួនជាបន្តបន្ទាប់ មានសកម្មជននយោបាយ សកម្មជនសង្គម និងអ្នកសារព័ត៌មាន ជាដើម សូម្បីតែពលរដ្ឋខ្មែរដែលភៀសខ្លួនទៅរស់នៅលើទឹកដីថៃ ក៏ត្រូវរដ្ឋាភិបាលដាក់កម្លាំងតាមចាប់ខ្លួនបញ្ជូនទៅប្រទេសកម្ពុជាវិញដែរ។
អ្នកតាមដានស្រុកខ្មែរនិយាយសឹងតែគ្រប់មាត់អំពីការអនុវត្តស្តង់ដាពីរបីនៅប្រទេសកម្ពុជា ទាក់ទងនឹងប្រព័ន្ធតុលាការ ការស៊ើបអង្កេតករណីឃាតកម្ម ការបង្ក្រាបឧក្រិដ្ឋកម្មផ្សេងៗ ដែលលោក ប្រាក់ សុខុន និយាយហាក់ដូចជាមិនដឹងរឿង ឬមើលមិនឃើញអ្វីនៅចំពោះមុខ៕
© 2025, . All rights reserved.