របាយការណ៍សិក្សាមួយធ្វើឡើងដោយធនាគារពិភពលោក (World Bank) អង្គការសហប្រជាជាតិ (UN) គណៈកម្មការអឺរ៉ុប និងរដ្ឋាភិបាលអ៊ុយក្រែន បានប៉ាន់ស្មានថា ដើម្បីកសាងប្រទេសអ៊ុយក្រែនឡើងវិញ ដែលរងនូវវិនាសកម្មដោយសង្គ្រាមរបស់រុស្ស៊ី ត្រូវការថវិកាដល់ទៅ ៥២៤ពាន់លានដុល្លារគិតត្រឹមថ្ងៃទី២៤ ខែកុម្ភៈ ដែលជាខួប ៣ឆ្នាំនៃសង្គ្រាមរបស់រុស្ស៊ី។
សារព័ត៌មាន Reuters ដែលស្រង់របាយការណ៍សិក្សារបស់ធនាគារពិភពលោកកាលពីពាក់កណ្ដាលឆ្នាំ២០២៤ មានការប៉ាន់ស្មានថា គេត្រូវការទឹកប្រាក់ទំហំ ៤៨៦ពាន់លានដុល្លារក្នុងការស្ដារប្រទេសអ៊ុយក្រែន ឡើងវិញ។
នាយករដ្ឋមន្ត្រីអ៊ុយក្រែន លោក Denys Shmyhal បាននិយាយថា មួយឆ្នាំមកនេះទំហំនៃតម្រូវការកសាងប្រទេសឡើងវិញរបស់អ៊ុយក្រែន នៅតែបន្តកើនឡើង ដោយសារតែការបន្តវាយប្រហាររបស់រុស្ស៊ី។
ធនាគារពិភពលោកបានកត់សម្គាល់ថា ការខូចខាតនៃវិស័យថាមពលរបស់អ៊ុយក្រែន បានកើន ៧០% បើធៀបនឹងរយៈពេល ១ឆ្នាំដំបូងនៃសង្គ្រាម។
តាមការសិក្សាចុងក្រោយនេះ៖
- ការស្ដារលើវិស័យលំនៅឋានរបស់អ៊ុយក្រែន ទាមទារប្រមាណ ៨៤ពាន់លានដុល្លារ
- វិស័យដឹកជញ្ជូនទាមទារជិត ៧៨ពាន់លានដុល្លារ
- ថាមពលនិងរ៉ែត្រូវការ ៦៨ពាន់លានដុល្លារ
- វិស័យពាណិជ្ជកម្ម និងឧស្សាហកម្មត្រូវការជាង ៦៤ពាន់លានដុល្លារ
- និងវិស័យកសិកម្មជាង ៥៥ពាន់លានដុល្លារ។
សង្គ្រាមឈ្លានពានរបស់រុស្ស៊ី នៅអ៊ុយក្រែន បានឈានដល់គម្រប់ខួប ៣ឆ្នាំ កាលពីថ្ងៃចន្ទសប្តាហ៍កន្លងមកនេះ ដែលប្រធានាធិបតីអាមេរិក លោក ដូណាល់ ត្រាំ បានឱ្យដឹងថា គេត្រូវការ ៤៨៧ពាន់លានដុល្លារ។
បើតាមលោក ត្រាំ ប្រទេសរុស្ស៊ី ត្រូវចេញការសងការខូចខាតជាមួយនឹងទ្រព្យសម្បត្តិដែលត្រូវបានបង្កក ប៉ុន្តែក្រោយពីមានភាពរាក់ទាក់រវាងរដ្ឋការរបស់លោក ត្រាំ និងលោក ពូទីន កាន់តែប្រសើរឡើងក្រោយជួបគ្នាកាលពីថ្ងៃទី១៨ ខែកុម្ភៈ នៅលើទឹកដីប្រទេសអារ៉ាប៊ីសាអ៊ូឌីត លោក ត្រាំ បាននិយាយថា ភាគីផ្សេងៗទៀតក៏អាចចូលរួមជួយស្ដារប្រទេសអ៊ុយក្រែន ឡើងវិញដែរ ចំណែករុស្ស៊ី ស្ថិតក្នុងកាតព្វកិច្ចស្ម័គ្រចិត្តក្នុងការបរិច្ចាគចេញពីទ្រព្យសម្បត្តិរបស់រុស្ស៊ី ដែលត្រូវបានបង្កក។
មេដឹកនាំអឺរ៉ុប ចង់ប្រើប្រាស់ទ្រព្យសម្បត្តិរុស្ស៊ី ដែលត្រូវបានបង្កកយកមកជួយអ៊ុយក្រែន កសាងប្រទេសឡើងវិញ ប៉ុន្តែមិនទាន់ឈានដល់កិច្ចព្រមព្រៀងមួយដែលអាចចៀសវាងបញ្ហាប្រឈមផ្លូវច្បាប់ ខណៈដែលជម្រើសជាច្រើនកំពុងស្ថិតក្រោមការពិចារណា។
បើតាមលោក ត្រាំ មានជម្រើសជាច្រើនត្រូវដោះដូរ ឱ្យតែរុស្ស៊ី ព្រមបញ្ចប់សង្គ្រាម តែក្រុមប្រទេសនៅអឺរ៉ុប មិនឃើញមានជម្រើសណាក្រៅពីរឹបអូសទ្រព្យសម្បត្តិរបស់រុស្ស៊ី មកទូទាត់សងអ៊ុយក្រែន នោះទេ។
ដូចនេះហើយបានជាអ៊ុយក្រែន ទាមទារឱ្យមានការរឹបអូសទ្រព្យសម្បត្តិរបស់រុស្ស៊ី ដែលមានទំហំ ៣៥០ពាន់លានដុល្លារទៅឱ្យអ៊ុយក្រែន ដើម្បីយកមកទូទាត់វិនាសកម្មដោយសារសង្គ្រាមរបស់រុស្ស៊ី។
រដ្ឋមន្ត្រីការបរទេសអង់គ្លេស លោក David Lammy បានគាំទ្រការទាមទាររបស់អ៊ុយក្រែន។ លោក David Lammy និយាយថា អឺរ៉ុបគួរតែឈានពីការបង្កកទ្រព្យសម្បត្តិរុស្ស៊ី ទៅដល់ការរឹបអូសយកតែម្ដង ព្រោះពេលនេះវាហួសពេលដែលនិយាយថាបង្កកទៀតហើយ។
ចាប់តាំងពីរុស្ស៊ី បើកការឈ្លានពានអ៊ុយក្រែន នៅឆ្នាំ២០២២ សហរដ្ឋអាមេរិក និងសម្ព័ន្ធមិត្តបានផ្អាកប្រតិបត្តិការផ្ទេរប្រាក់ទៅកាន់ធនាគារកណ្តាល និងក្រសួងហិរញ្ញវត្ថុរបស់រុស្ស៊ី។ លុយដែលត្រូវបានបង្កកមានចំនួនពី ៣០០ ទៅ ៣៥០ពាន់លានដុល្លារ ហើយភាគច្រើនទុកនៅធនាគារកណ្តាលអឺរ៉ុប។
អឺរ៉ុប និងអាមេរិក កាលពីឆ្នាំ២០២៤ បានសម្រេចរឹបអូសទ្រព្យសម្បត្តិរបស់រុស្ស៊ី ចំនួន ៥០ពាន់លានដុល្លារទៅឱ្យអ៊ុយក្រែន ក្នុងទំហំ ៣២៥ពាន់លានដុល្លារដែលបានបង្កកដោយការអនុម័តរបស់ប្រទេស G7 តាមសំណើរបស់រដ្ឋការលោក ចូ បៃដិន។
រដ្ឋមន្ត្រីការបរទេសអង់គ្លេស លោក Lammy បានប្រាប់សភាថា៖ «អឺរ៉ុបត្រូវតែធ្វើសកម្មភាពឱ្យបានឆាប់រហ័ស ហើយគួរតែប្តូរពីការបង្កកទ្រព្យសម្បត្តិ ទៅជាការរឹបអូសវិញម្តង។»
លោកបន្តថា វាមិនមែនជាបញ្ហាដែលរដ្ឋាភិបាលណាមួយអាចធ្វើសកម្មភាពតែម្នាក់ឯងបានទេ គឺត្រូវតែធ្វើសកម្មភាពជាមួយគ្នានៃសម្ព័ន្ធមិត្តទាំងអស់ ទាំងនៅអឺរ៉ុប និងក្រៅអឺរ៉ុប។
ចំណែកខ្លួនលោក ត្រាំ ផ្ទាល់ បែរជាទាមទារឱ្យអ៊ុយក្រែន សងអាមេរិកវិញ ព្រោះអាមេរិកបានបោះចំណាយយ៉ាងសម្បើមទៅឱ្យអ៊ុយក្រែន។
លោក ដូណាល់ ត្រាំ និយាយកាលពីថ្ងៃព្រហស្បតិ៍ ទី២៧ ខែកុម្ភៈ ថា កិច្ចព្រមព្រៀងរ៉ែជាមួយអ៊ុយក្រែន គឺជាការធានាសន្តិសុខដែលទីក្រុងគៀវ ត្រូវការជាចាំបាច់ ដើម្បីទប់ទល់ជាមួយរុស្ស៊ី ក្រោមលក្ខខណ្ឌជំនួញជាមួយអាមេរិក។
តែទីបំផុត លោក ដូណាល់ ត្រាំ ប្រកាសទារលុយពីប្រទេសអ៊ុយក្រែន ក្នុងទំហំ ៥០០ពាន់លានដុល្លារ ដែលលោក ត្រាំ ចាត់ទុកជាលុយជំពាក់ក្នុងសម័យសង្គ្រាមជិត ៣ឆ្នាំជាមួយរុស្ស៊ី។
លោក ត្រាំ ចង់ឱ្យទីក្រុងគៀវ ផ្តល់សិទ្ធិកាន់កាប់រហូតដល់ ៥០% ឱ្យមកក្រុមហ៊ុនអាមេរិកលើធនធានធម្មជាតិ ក៏ដូចជារ៉ែសំខាន់ៗដ៏ច្រើនសម្បើមរបស់អ៊ុយក្រែន ជាថ្នូរនឹងការគាំទ្ររបស់អាមេរិក និងដើម្បីស្វែងរកទីបញ្ចប់សម្រាប់សង្គ្រាមឈ្លានពានរបស់រុស្ស៊ី។
មន្ត្រីជាន់ខ្ពស់របស់អ៊ុយក្រែន ឱ្យដឹងថា អ៊ុយក្រែន និងអាមេរិក ស្ថិតក្នុងដំណាក់កាលចុងក្រោយនៃការចរចាលើកិច្ចព្រមព្រៀងរ៉ែ ដែលត្រូវបានគេមើលឃើញថា ជាចំណុចស្នូលក្នុងការបញ្ចប់សង្គ្រាមរយៈពេលបីឆ្នាំរបស់រុស្ស៊ី នៅអ៊ុយក្រែន ដែលស្ថិតក្រោមការប្រឹងប្រែងរបស់រដ្ឋការលោក ត្រាំ។
លោក ត្រាំ បានលើកឡើងថា អ៊ុយក្រែនគួរតែផ្តល់ប្រាក់សំណងចំនួន ៥០០ពាន់លានដុល្លារអាមេរិកជាវត្ថុធាតុដើមសំខាន់ៗ ដែលជាការសងត្រឡប់សម្រាប់ជំនួយដែលទីក្រុងគៀវ បានទទួលរួចហើយពីរដ្ឋការរបស់លោក ចូ បៃដិន។
ទោះជាយ៉ាងណា លោក វូឡូឌីមៀ ហ្សេឡេនស្គី មិនទទួលស្គាល់ជំនួយពីមុនរបស់សហរដ្ឋអាមេរិក ថាជាប្រាក់កម្ចីនោះទេ ហើយថាទីក្រុងវ៉ាស៊ីនតោន បានផ្គត់ផ្គង់ប្រទេសអ៊ុយក្រែន នូវអាវុធក្នុងទឹកប្រាក់ ៦៧ពាន់លានដុល្លារ និងជំនួយជាថវិកាផ្ទាល់ចំនួន ៣១ពាន់ ៥០០លានដុល្លារ គឺមិនមែន ៥០០ពាន់លានដុល្លារដូចលោក ត្រាំ បានលើកឡើងនោះទេ។
តែយ៉ាងណា ជំនួញរបស់រដ្ឋការលោក ត្រាំ លើជំនួញរ៉ែកម្ររបស់អ៊ុយក្រែន នឹងមានកិច្ចព្រមព្រៀងនឹងគ្នាក្នុងសប្ដាហ៍នេះហើយ៕
© 2025, . All rights reserved.