ប្រធានាធិបតីបារាំង លោក អេម៉ានុយអែល ម៉ាក្រុង និយាយថា រឿងដាក់ពង្រាយកងកម្លាំងរក្សាសន្តិភាពនៅអ៊ុយក្រែន ដែលស្នើឡើងដោយចក្រភពអង់គ្លេស និងបារាំង ដើម្បីជាផ្នែកនៃកិច្ចព្រមព្រៀងសន្តិភាពជាមួយរុស្ស៊ី ដែលលោកថាភាគីរុស្ស៊ី គ្មានសិទ្ធិចូលខ្លួនពាក់ព័ន្ធដាក់សម្ពាធលើអឺរ៉ុបនោះទេ គឺមានតែអ៊ុយក្រែន ជាអ្នកសម្រេច។
នេះបើតាមការចេញផ្សាយដោយបណ្ដាញផ្សាយព័ត៌មាន The Guardian នៃប្រទេសអង់គ្លេស នៅថ្ងៃចន្ទ ទី១៧ ខែមីនា នេះ។
លោកប្រធានាធិបតីបារាំង បានលើកឡើងថា អ៊ុយក្រែនជាប្រទេសមានអធិបតេយ្យពេញលេញមួយ ប្រសិនបើអ៊ុយក្រែន ស្នើឱ្យសម្ព័ន្ធមិត្តដាក់កងទ័ពនៅលើទឹកដីរបស់ខ្លួន នោះវាមិនមែនជារឿងដែលរុស្ស៊ី មានសិទ្ធិទទួលយក ឬមួយក៏មិនទទួលយក វាមិនជាប់ពាក់ព័ន្ធអ្វីនឹងរុស្ស៊ី ឡើយ។
យ៉ាងណាក៏ដោយ ទីក្រុងមូស្គូ តែងច្រានចោលម្តងហើយម្តងទៀតនូវគំនិតដាក់ពង្រាយកងទ័ពមកពីបណ្តាប្រទេសអឺរ៉ុបនៅអ៊ុយក្រែន ដែលសុទ្ធសឹងតែជាសមាជិកនៃអង្គការណាតូ (NATO)។ បើតាមលោក ម៉ាក្រុង ទ័ពអឺរ៉ុបអាចនឹងពង្រាយនៅអ៊ុយក្រែន នៅក្រោយបទឈប់បាញ់ត្រូវបានដាក់ឱ្យអនុវត្ត។
ចំណែកប្រទេសនីមួយៗជាសម្ព័ន្ធភាពដើម្បីសន្តិសុខសម្រាប់អ៊ុយក្រែន ក៏អាចបញ្ជូនទ័ពរបស់ពួកគេមកចូលរួមជាមួយនឹងទ័ពបារាំង អង់គ្លេស បើទោះជាមានចំនួន ២ពាន់ ឬ ៣ពាន់នាក់ក៏បានដែរ។
លោក ម៉ាក្រុង បញ្ជាក់ថា ប្រទេសនៅក្រៅអឺរ៉ុបក៏អាចបញ្ជូនទ័ពទៅអ៊ុយក្រែន បានដែរ ដោយសហការជាមួយទ័ពអឺរ៉ុប។
លោក ម៉ាក្រុង រួមជាមួយនាយករដ្ឋមន្ត្រីអង់គ្លេស លោក Keir Starmer កំពុងខិតខំជាខ្លាំងប្រមែប្រមូលការគាំទ្រផ្នែកយោធាសម្រាប់អ៊ុយក្រែន ស្របពេលដែលប្រធានាធិបតីអាមេរិក លោក ដូណាល់ ត្រាំ កំពុងជំរុញកិច្ចព្រមព្រៀងសន្តិភាពជាមួយរុស្ស៊ី។
កាលពីចុងសប្តាហ៍កន្លងទៅនេះ លោក Keir Starmer បានបើកកិច្ចប្រជុំមួយតាមប្រព័ន្ធអនឡាញជាមួយលោក ម៉ាក្រុង ព្រមទាំងសម្ព័ន្ធមិត្តអ៊ុយក្រែន ដទៃទៀត។ ក្រោយពីកិច្ចប្រជុំ លោក Keir Starmer បាននិយាយថា នៅពេលនេះយើងមានកម្លាំងរួបរួមសុឆន្ទៈមាន ៣៥ប្រទេស។
តាមនាយករដ្ឋមន្ត្រីអង់គ្លេសរូបនេះ ប្រទេសទាំង ៣៥ នេះ មានប្រទេសខ្លះស្ម័គ្រចិត្តបញ្ជូនទ័ពទៅអ៊ុយក្រែន និងប្រទេសខ្លះទៀតជួយផ្ដល់ភស្តុភារ។
ជុំវិញស្ថានការណ៍មុនបិទបញ្ចប់សង្គ្រាមរបស់រុស្ស៊ី នៅអ៊ុយក្រែន តាមរយៈផែនការសន្តិភាពរបស់លោក ដូណាល់ ត្រាំ នាយករដ្ឋមន្ត្រីឥណ្ឌា លោក Narendra Modi និយាយថា ប្រធានាធិបតីអាមេរិក លោក ត្រាំ បានត្រៀមខ្លួនច្រើនជាងមុនសម្រាប់អាណត្តិទីពីរ ដោយមានផែនទីបង្ហាញផ្លូវច្បាស់លាស់។
លោក Modi បានបញ្ជាក់ថា អាណត្តិទីពីររបស់លោក ត្រាំ លើកនេះ បានរៀបចំច្រើនជាងមុន ហើយគំនិត និងជំហានជាក់លាក់នីមួយៗត្រូវបានបង្កើតឡើងដើម្បីឆ្ពោះទៅរកគោលដៅរួម គឺការបញ្ចប់ជម្លោះរុស្ស៊ី និងអ៊ុយក្រែន។ តែជាមួយគ្នានេះ លោកនាយករដ្ឋមន្ត្រីឥណ្ឌា បានប្រាប់ទៅប្រធានាធិបតីរុស្ស៊ី លោក វ៉្លាឌីមៀ ពូទីន ថា កាលៈទេសៈនេះ រុស្ស៊ីមិនគួរបន្តសង្គ្រាមនោះទេ ហើយជាមួយគ្នានេះ លោក Modi ក៏បានប្រាប់ទៅលោក វូឡូឌីមៀ ហ្សេឡេនស្គី ប្រធានាធិបតីអ៊ុយក្រែន ថា វាគ្មានជ័យជម្នះណាបានមកពីដំណោះស្រាយយោធានោះទេ។
ចំណែកប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងថា រូបលោកនឹងនិយាយជាមួយប្រធានាធិបតីរុស្ស៊ី លោក វ៉្លាឌីមៀ ពូទីន នាថ្ងៃអង្គារសប្តាហ៍នេះ ហើយការជជែកផ្ដោតលើកិច្ចប្រឹងប្រែងបិទបញ្ចប់សង្គ្រាមនៅអ៊ុយក្រែន។
ថ្លែងប្រាប់ក្រុមអ្នកកាសែតនៅលើយន្តហោះ Air Force One ដែលទីភ្នាក់ងារសារព័ត៌មាន Reuters បានកត់ត្រាសម្ដីរបស់លោក ត្រាំ បាននិយាយថា លោកនឹងសន្ទនាជាមួយលោក ពូទីន នៅថ្ងៃអង្គារទី១៨ ខែមីនា ហើយជាមួយគ្នានេះ កិច្ចការជាច្រើនត្រូវបានធ្វើកាលពីចុងសប្តាហ៍កន្លងទៅ។ លោកបន្តថា តើយើងអាចរកទីបញ្ចប់នៃសង្គ្រាមរុស្ស៊ី-អ៊ុយក្រែន បានដែរឬទេ។
នៅពេលត្រូវបានសាកសួរថា តើមានសម្បទានអ្វីខ្លះដែលកំពុងស្ថិតក្រោមការពិចារណាក្នុងកិច្ចចរចាបទឈប់បាញ់? លោក ត្រាំ បានឆ្លើយដោយសេចក្ដីដើមដូចនេះថា «យើងនឹងនិយាយអំពីទឹកដី។ យើងនឹងនិយាយអំពីរោងចក្រថាមពលនុយក្លេអ៊ែររបស់អ៊ុយក្រែន ដែលរុស្ស៊ី វាយកាន់កាប់បាន។ យើងសូមប្រាប់ថា ចំណុចជាច្រើនត្រូវបានជជែករួចរាល់ហើយជាមួយភាគីទាំងសងខាង។ យើងបានពិភាក្សារឿងទាំងនេះរួចហើយ គឺអំពីការបែងចែកទ្រព្យសម្បត្តិមួយចំនួនរវាងអ៊ុយក្រែន និងរុស្ស៊ី ដែលត្រូវធ្វើសម្បទានដូចគ្នានេះ។»
លោក ត្រាំ នៅពេលនេះកំពុងព្យាយាមបញ្ចុះបញ្ចូលឱ្យលោក ពូទីន ឱ្យយល់ព្រមទទួលយកបទឈប់បាញ់មានរយៈពេល ៣០ថ្ងៃ ដែលអ៊ុយក្រែន បានយល់ព្រមទទួលយកកាលពីសប្ដាហ៍មុន ប៉ុន្តែមកទល់នឹងពេលនេះ រុស្ស៊ីមិនបានបដិសេធ ហើយក៏មិនទាន់យល់ព្រមទទួលយកនោះដែរ។
ប្រធានាធិបតីរុស្ស៊ី លោក វ៉្លាឌីមៀ ពូទីន លើកឡើងថា គំនិតនៃសំណើបទឈប់បាញ់នៅអ៊ុយក្រែន ដែលមានរយៈពេល ៣០ថ្ងៃ គឺជាគំនិតត្រឹមត្រូវដែលរុស្ស៊ី គាំទ្រ ប៉ុន្តែចង់បានការលម្អិតបន្ថែមទៀតទៅនឹងលក្ខខណ្ឌមួយចំនួនរបស់រុស្ស៊ី។
លោក ពូទីន បានបញ្ជាក់ថា បទឈប់បាញ់គួរតែជាកិច្ចព្រមព្រៀងសន្តិភាពដែលស្ថិតស្ថេរយូរអង្វែង និងលុបបំបាត់ឫសគល់ពិតប្រាកដនៃការផ្ទុះសង្គ្រាម៕
© 2025, . All rights reserved.