តំណាងរាស្ត្រគណបក្សសង្គ្រោះជាតិភាគីលោក កឹម សុខា ច្រានចោលនូវការលើកឡើងដែលថា មេដឹកនាំបក្សកាន់អំណាចលោក ហ៊ុន សែន នឹងត្រូវតុលាការព្រហ្មទណ្ឌអន្តរជាតិ (International Criminal Court, ICC) ចាប់ខ្លួនដូចអតីតប្រធានាធិបតីហ្វីលីពីន លោក Rodrigo Duterte។
មន្ត្រីជាន់ខ្ពស់បក្សប្រឆាំង លោក សួន សុរីដា លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៧ ខែមីនា នេះថា ពិតមែនតែតុលាការព្រហ្មទណ្ឌអន្តរជាតិ (ICC) មានអំណាចយុត្តាធិការ ឬដែនសមត្ថកិច្ចលើប្រទេសកម្ពុជា ប៉ុន្តែលុះត្រាតែមានបណ្តឹងពីបុគ្គលណាមួយចំពោះលោក ហ៊ុន សែន ជាមុនសិន។
លោក សួន សុរីដា លើកឡើងថា កាលពីអំឡុងឆ្នាំ២០១៨ ក៏ធ្លាប់មានអង្គការអន្តរជាតិប្តឹងលោក ហ៊ុន សែន ទៅកាន់តុលាការនេះដែរ ប៉ុន្តែរហូតមកដល់ពេលនេះ តុលាការ ICC នៅមិនទាន់ចេញដីកាណាមួយឱ្យចាប់ខ្លួនលោក ហ៊ុន សែន នៅឡើយទេ ហើយត្រង់ចំណុចនេះក៏បង្ហាញដែរថា ពាក្យបណ្ដឹងនោះទំនងជាមិនគ្រប់លក្ខខណ្ឌ ហើយក៏ទំនងជាតុលាការបានទាត់ចោលដែរ។
លោកបន្តថា ប្រសិនបើមានពាក្យបណ្ដឹងរហូតតុលាការអន្តរជាតិមួយនេះចេញដីកាចាប់ខ្លួនលោក ហ៊ុន សែន មែននោះ ក៏ត្រូវមានការសហការពីប្រទេសសាមីដែរ។ ផ្ទុយទៅវិញ នៅកម្ពុជាគ្មានស្ថាប័នមានសមត្ថកិច្ចណាមួយហ៊ានអនុវត្តដីការបស់តុលាការនេះដើម្បីចាប់ខ្លួនលោក ហ៊ុន សែន ឡើយ។
មន្ត្រីបក្សប្រឆាំងរូបនេះបញ្ជាក់ថា ចំពោះឧក្រិដ្ឋកម្មផ្សេងៗដែលលោក ហ៊ុន សែន ត្រូវបានចោទប្រកាន់ថាបានប្រព្រឹត្តកាលពីអំឡុងទសវត្សរ៍១៩៨០ ឬ១៩៩០ ដូចជា ការធ្វើរដ្ឋប្រហារ ឬព្រឹត្តិការណ៍គប់គ្រាប់បែកដៃឆ្នាំ១៩៩៧ ជាដើម មិនអាចយកទៅប្តឹងតុលាការនេះបានទេ ព្រោះនៅពេលនេះ កម្ពុជាមិនទាន់ក្លាយជាសមាជិករបស់តុលាការនេះនៅឡើយ។
លោក សួន សុរីដា គូសបញ្ជាក់ថា ភស្តុតាងជាក់ស្តែងក្នុងសំណុំរឿងលោក Rodrigo Duterte តុលាការអន្តរជាតិ (ICC) បើកការស៊ើបអង្កេតលើរូបលោកត្រឹមតែចន្លោះឆ្នាំ២០១១ ដល់ឆ្នាំ២០១៩ ប៉ុណ្ណោះ ទោះអតីតប្រធានាធិបតីហ្វីលីពីនរូបនេះបានដឹកនាំប្រទេសហ្វីលីពីន ដល់ឆ្នាំ២០២២ ក៏ដោយ ត្បិតប្រទេសហ្វីលីពីន បានចាកចេញពីសមាជិករបស់តុលាការនេះនៅឆ្នាំ២០១៩។
កាលពីថ្ងៃទី១៤ ខែមីនា ក្នុងពិធីទទួលទានអាហារសាមគ្គីជាមួយសមាគមឧកញ៉ាកម្ពុជា លោក ហ៊ុន សែន បញ្ជាក់ថា រឿង ឌូទើតេ ជារឿង ឌូទើតេ តែ ហ៊ុន សែន មិនមែន ឌូទើតេ ឡើយ ហើយការប្រៀបធៀបរបស់ក្រុមប្រឆាំងរវាងរូបលោក និង ឌូទើតេ គឺដើម្បីទាញយកភាពជោគជ័យទៅភ្ជាប់នឹងខ្លួនពួកគេ ហើយភ្ជាប់ការបរាជ័យមកឱ្យរូបលោកប៉ុណ្ណោះ៕
© 2025, . All rights reserved.