មេដឹកនាំបក្សកាន់អំណាចលោក ហ៊ុន សែន ចាត់ទុកការផ្ដាច់ជំនួយដល់សារព័ត៌មានឯករាជ្យនៅក្រៅប្រទេសពីសំណាក់រដ្ឋាភិបាលអាមេរិក គឺជាការបើកមុខក្នុងការប្រយុទ្ធប្រឆាំងព័ត៌មានក្លែងក្លាយ។
លោក ហ៊ុន សែន សរសេរលើទំព័រហ្វេសប៊ុករបស់ខ្លួនកាលពីយប់ថ្ងៃទី១៧ មីនា នេះថា ការមិនទុកចិត្តលើសហរដ្ឋអាមេរិកពីសំណាក់ប្រទេសមួយចំនួន ក៏មានចំណែកចេញមកពីប្រព័ន្ធផ្សព្វផ្សាយរបស់អាមេរិកដែរ ដែលធ្វើឲ្យប្រទេសទាំងនោះយល់ច្រឡំថាជាគោលជំហររបស់រដ្ឋាភិបាលអាមេរិក។
លោក ហ៊ុន សែន លើកឡើងថា ការផ្តាច់ជំនួយដល់សារព័ត៌មានទាំងនោះ គឺជាការរួមចំណែកដ៏ធំដើម្បីលុបបំបាត់ព័ត៌មានក្លែងក្លាយ ព័ត៌មានភូតកុហក លាបពណ៌ អុជអាល ញុះញង់ ដែលតែងតែបង្កចលាចលស្ទើរពេញពិភពលោករហូតមក ហើយទង្វើបែបនេះក៏បង្ហាញពីសេចក្តីក្លាហានរបស់អាមេរិកដែរ ដែលចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយ ដោយចាប់ផ្តើមពីបណ្ដាញព័ត៌មានដែលផ្តល់ថវិកាដោយរដ្ឋាភិបាលអាមេរិកមុនគេ។
មេដឹកនាំបក្សកាន់អំណាចរូបនេះរិះគន់ថា ចរិតមារយាទ និងសម្ដីរបស់អ្នកយកព័ត៌មាន និងអ្នកនិយាយព័ត៌មានមួយចំនួនតូចនៃបណ្ដាញព័ត៌មានដែលអាមេរិកផ្តាច់ជំនួយទាំងនោះ ឫកធំជាងប្រមុខរដ្ឋ ឬប្រមុខរដ្ឋាភិបាលទៅទៀត ព្រោះពួកគេជាមនុស្សដែលគ្មានគុណធម៌ និងសីលធម៌ក្នុងនាមជាអ្នកសារព័ត៌មានឡើយ។
កាលពីចុងសប្តាហ៍កន្លងទៅ ប្រធានាធិបតីអាមេរិក លោក ដូណាល់ ត្រាំ (Donald Trump) បានបង្គាប់ឱ្យកាត់បន្ថយផ្នែកនានាដែលមិនចែងក្នុងច្បាប់របស់ទីភ្នាក់ងារសហរដ្ឋអាមេរិកដើម្បីប្រព័ន្ធផ្សព្វផ្សាយសកល ដែលហៅកាត់ថា USAGM ដែលជាទីភ្នាក់ងាររបស់រដ្ឋាភិបាលសហព័ន្ធមួយដែលផ្តល់មូលនិធិដល់ស្ថាប័នព័ត៌មានសកលឯករាជ្យ។
លោក ដូណាល់ ត្រាំ បង្គាប់ឱ្យលុបបំបាត់ចោល «ក្នុងកម្រិតអតិបរមាស្របតាមច្បាប់ជាធរមាន» របស់ទីភ្នាក់ងារ USAGM និងអង្គភាពមិនពាក់ព័ន្ធនឹងរដ្ឋាភិបាល ៦ ផ្សេងទៀត ដែលធ្វើការលើផ្នែកសារមន្ទីរ ផ្នែកគ្មានផ្ទះសម្បែង ការអភិវឌ្ឍអាជីវកម្មរបស់ជនជាតិភាគតិច និងបញ្ហាជាច្រើនទៀតផងដែរ។
សកម្មជនខ្មែរក្នុងទីក្រុងឡងប៊ិច លោក មួង ណារ៉េត លើកឡើងកាលពីថ្ងៃទី១៦ មីនា នេះថា អ្នកដែលជប់លៀងត្រេកអរពីការផ្ដាច់ជំនួយដល់សារព័ត៌មានដែលលើកស្ទួយប្រជាធិបតេយ្យ លើកស្ទួយសិទ្ធិសេរីភាពបញ្ចេញមតិ និងសិទ្ធិមូលដ្ឋានរបស់ពលរដ្ឋ គឺមានតែជនផ្ដាច់ការដែលមានបំណងរំលោភសិទ្ធិសេរីភាពរបស់ពលរដ្ឋប៉ុណ្ណោះ។
លោក មួង ណារ៉េត បញ្ជាក់ថា ការបិទសារព័ត៌មានឯករាជ្យដែលមានមូលដ្ឋាននៅសហរដ្ឋអាមេរិក គឺជាពរជ័យសម្រាប់ជនផ្ដាច់ការ ប៉ុន្តែជាបណ្ដាសាដែលត្រូវធ្លាក់លើពលរដ្ឋខ្មែររាប់លាននាក់ដែលត្រូវបាត់បង់នូវសិទ្ធិទទួលព័ត៌មានឯករាជ្យដូចដែលមានចែងក្នុងរដ្ឋធម្មនុញ្ញ៕
© 2025, . All rights reserved.