មេធាវីការពារក្តីមន្ត្រីជាន់ខ្ពស់គណបក្សកម្លាំងជាតិ ស្នើសុំសាលាឧទ្ធរណ៍ក្រុងភ្នំពេញលើកពេលសវនាការរបស់លោក រ៉ុង ឈុន ទៅពេលក្រោយ ដោយសារលោកមានភារកិច្ចត្រូវទៅពិនិត្យសុខភាពនៅប្រទេសថៃ តាមការកំណត់របស់វេជ្ជបណ្ឌិត ប៉ុន្តែមិនបានកំណត់ថ្ងៃជាក់លាក់ទេ។
មេធាវីការពារក្តីឱ្យលោក រ៉ុង ឈុន គឺលោក ជូង ជូងី ចេញលិខិតមួយទៅកាន់សាលាឧទ្ធរណ៍ក្រុងភ្នំពេញកាលពីថ្ងៃទី១៩ មីនា ដែលទើបនឹងត្រូវបានផ្សព្វផ្សាយជាសាធារណៈនៅថ្ងៃទី២០ មីនា នេះថា ចាប់ពីថ្ងៃទី២៧ ដល់ថ្ងៃទី២៩ ខែមីនា លោកមានភារកិច្ចត្រូវទៅពិនិត្យសុខភាពឯប្រទេសថៃ តាមការកំណត់ពីវេជ្ជបណ្ឌិត។
កាលពីថ្ងៃទី១៣ ខែកុម្ភៈ ឆ្នាំ២០២៥ តំណាងមហាអយ្យការអមសាលាឧទ្ធរណ៍ក្រុងភ្នំពេញ លោក អ៊ឹម សុផាន បានចេញដីកាកោះបង្គាប់ឱ្យទីប្រឹក្សាគណបក្សកម្លាំងជាតិ លោក រ៉ុង ឈុន ចូលបំភ្លឺក្នុងសវនាការនៅថ្ងៃទី២៨ ខែមីនា ឆ្នាំ២០២៥ នេះ ដើម្បីជំនុំជម្រះលើបណ្តឹងសុំឱ្យផ្តល់នីតិសម្បទាដែលលោកបានប្តឹងតុលាការកាលពីពេលកន្លងទៅនោះ។
ជុំវិញបញ្ហានេះ លោក រ៉ុង ឈុន បានសម្រេចដាក់ពាក្យបណ្តឹងទៅសាលាឧទ្ធរណ៍ក្រុងភ្នំពេញ កាលពីពាក់កណ្តាលខែវិច្ឆិកា ឆ្នាំ២០២៤ ដើម្បីសុំនីតិសម្បទា ឬសិទ្ធិធ្វើនយោបាយឡើងវិញ បន្ទាប់ពីត្រូវបាត់បង់នីតិសម្បទាគ្រប់បែបយ៉ាង និងត្រូវដាក់ឱ្យស្ថិតក្រោមការត្រួតពិនិត្យរបស់តុលាការអស់រយៈពេល ៣ឆ្នាំកន្លងមកនោះ។
ខ្លឹមសារក្នុងពាក្យបណ្តឹង ចុះថ្ងៃទី១៣ ខែវិច្ឆិកា ឆ្នាំ២០២៤ រៀបរាប់ថា តាមអំណាចសាលដីកាព្រហ្មទណ្ឌស្ថាពរចុះថ្ងៃទី២៩ ខែកក្កដា ឆ្នាំ២០២២ តុលាការកំពូលបានសម្រេចផ្ដន្ទាទោសលោកដាក់ពន្ធនាគាររយៈពេល ២ឆ្នាំពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ប្រភពដដែលបន្តថា ទោសនេះត្រូវបានអនុវត្តក្នុងពន្ធនាគាររយៈពេល ១ឆ្នាំ ៣ខែ ១១ថ្ងៃ ហើយទោសដែលនៅសល់ ត្រូវបានព្យួរសាកល្បងរយៈពេល ៣ឆ្នាំ បន្ទាប់ពីលោកត្រូវបានដោះលែងឱ្យនៅក្រៅឃុំកាលពីថ្ងៃទី១២ ខែវិច្ឆិកា ឆ្នាំ២០២១ កន្លងទៅ។
ពាក្យបណ្ដឹងដដែលនេះ បញ្ជាក់ថា បើគិតចាប់តាំងពីថ្ងៃទី១២ ខែវិច្ឆិកា ឆ្នាំ២០២១ រហូតដល់ថ្ងៃទី១២ ខែវិច្ឆិកា ឆ្នាំ២០២៤ កន្លងទៅ គឺមានរយៈពេល ៣ឆ្នាំហើយ ដូច្នេះលោក រ៉ុង ឈុន ត្រូវរួចផុតក្រោមការត្រួតពិនិត្យគ្រប់បែបយ៉ាងទាំងអស់របស់តុលាការ ហើយក៏ត្រូវរួចផុតពីការបាត់បង់នីតិសម្បទាគ្រប់យ៉ាងដែរ។
ជុំវិញបញ្ហានេះ លោក គា ថាណា ប្រធានគណបក្សកម្លាំងជាតិ សាខាប្រទេសជប៉ុន បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីយប់ថ្ងៃទី១៩ មីនា នេះថា ការផ្ដន្ទាទោសលោក រ៉ុង ឈុន ពីសំណាក់តុលាការកន្លងមក គឺជាការសម្រេចដ៏យុត្តិធម៌បំផុតសម្រាប់រូបលោក។
លោក គា ថាណា បញ្ជាក់ថា កិច្ចការដែលលោក រ៉ុង ឈុន បានធ្វើកន្លងមក គឺដើម្បីប្រទេសជាតិ និងដើម្បីប្រយោជន៍ប្រជាពលរដ្ឋខ្មែរសុទ្ធសាធ មិនមែនដើម្បីប្រយោជន៍បក្សនយោបាយ ឬក្រុមណាមួយនោះទេ៕
© 2025, . All rights reserved.