អ្នកឃ្លាំមើលសង្គមលើកឡើងថា អ្នកប្រជាធិបតេយ្យមិនត្រូវធ្វើសកម្មភាពនយោបាយ ឬនិយាយស្តីបែបអនាធិបតេយ្យ ដោយការជេរប្រទេច អុចអាល ញុះញង់ ដែលជាទង្វើតិរច្ឆានដូចក្រុមអ្នកកាន់អំណាចឡើយ។
អ្នកឃ្លាំមើលសង្គម លោក វ៉ន ចាន់ឡូត បានសរសេរលើគណនីហ្វេសប៊ុករបស់ខ្លួននៅថ្ងៃទី៣១ មីនា នេះថា អ្នកដឹកនាំបក្សកាន់អំណាចបាននិយាយថា គណបក្សរបស់ពួកគេតែងចិញ្ចឹមសុនខទុកឱ្យព្រុស និងខាំ ឬគ្រហឹមគំរាមអ្នករិះគន់មេរបស់ពួកគេ ប៉ុន្តែបើសុនខទាំងនោះធ្វើអំពើដែលពួកគេមិនពេញចិត្ត ពួកគេអាចកាប់សុនខនោះស៊ីពេលណាក៏បាន។
លោក វ៉ន ចាន់ឡូត លើកឡើងថា សម្រាប់អ្នកប្រជាធិបតេយ្យមិនគួរប្រព្រឹត្តបែបនេះជាដាច់ខាត ព្រោះថាការជេរប្រទេច អុចអាល ញុះញង់ឱ្យស្អប់ខ្ពើម និងការនិយាយបំបែកបំបាក់ ជាដើម គឺជាទង្វើរបស់តិរច្ឆានប៉ុណ្ណោះ មិនមែនជាទង្វើរបស់អ្នកប្រជាធិបតេយ្យដែលគួរធ្វើនោះទេ។
អ្នកឃ្លាំមើលសង្គមរូបនេះបញ្ជាក់ថា ក្នុងនាមជាអ្នកប្រជាធិបតេយ្យត្រូវតែមានការជឿជាក់លើប្រព័ន្ធប្រជាធិបតេយ្យដែលត្រូវធ្វើការផ្លាស់ប្ដូរការដឹកនាំតាមយន្តការបោះឆ្នោត ប្រកាន់សុចរិតទៀងត្រង់ ទាំងសម្ដី សកម្មភាព និងការគិត មិនលបលួចបម្រើបាបជន មិនកិបកេងប្រយោជន៍ជនស្លូតត្រង់ និងសមាជិកខ្លួនឯងឡើយ។
លោកបន្ថែមថា ពួកគេក៏ត្រូវតែជាមនុស្សមានគោលការណ៍ និងមានជំហរជារបស់ខ្លួនច្បាស់លាស់ រក្សាភាពយុត្តិធម៌ មិនយកបុគ្គលជាធំ បើកចំហសម្រាប់ការរិះគន់ និងផ្តល់តម្លៃលើប្រព័ន្ធគ្រប់គ្រង ជាជាងការឱ្យតម្លៃលើបុគ្គលនិយម ជាដើម។
ទីលាននយោបាយនៅកម្ពុជា ត្រូវគេកត់សម្គាល់ឃើញថាជាទីលានដែលពោរពេញទៅដោយភាពអនាធិបតេយ្យ ដោយការចោទប្រកាន់ លាបពណ៌ មួលបង្កាច់ ជេរប្រទេចគ្នាទៅវិញទៅមកក្នុងចំណោមអ្នកនយោបាយ នៅពេលដែលមានបុគ្គលណាម្នាក់ហ៊ានចេញមុខរិះគន់ទង្វើឆ្គាំឆ្គងមេដឹកនាំរបស់ពួកគេ។
អំពើជេរប្រទេច មិនមែនកើតមានតែក្នុងក្រុមប្រឆាំងទេ បក្សកាន់អំណាចក៏បានប្រើទង្វើបែបនេះពេញប្រទេសដែរ ហើយមនុស្សដែលប្រព្រឹត្តទង្វើបែបនេះតែងមានការលើកទឹកចិត្តពីមេដឹកនាំបក្សកាន់អំណាចរបស់លោក ហ៊ុន សែន ថែមទៀត។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានលើកឡើងថា ការបង្កឱ្យមានការជេរប្រមាថរវាងខ្មែរគ្នាឯងទៅវិញទៅមក ឬការសងសឹករវាងពូជសាសន៍ខ្លួនឯង គឺជាការបំបែកបំបាក់សាមគ្គីជាតិខ្មែរទាំងមូល។
បណ្ឌិត ឡៅ ម៉ុងហៃ បញ្ជាក់ថា បើខ្មែរនៅតែវាយប្រហារបំបាក់មុខមាត់ បង្ខូចកិត្តិយសគ្នាទៅវិញទៅមកបែបនេះ ខ្មែរនៅតែមិនបានសេចក្តីសុខជាដាច់ខាត ហើយកិត្តិយសជាតិខ្មែរទាំងមូលនឹងកាន់តែអាប់ឱនទៅៗប៉ុណ្ណោះ៕
© 2025, . All rights reserved.