អ្នកឃ្លាំមើលសង្គមអំពាវនាវឱ្យក្រសួងមហាផ្ទៃ ស៊ើបអង្កេតករណីអំពើពុករលួយរបស់ស្នងការរងខេត្តបន្ទាយមានជ័យ លោក សម្បត្តិ កុសល ក្រោមគោលការណ៍តម្លាភាព ដើម្បីផ្តល់យុត្តិធម៌ជូនអ្នកពាក់ព័ន្ធ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៨ មេសា នេះថា ករណីអំពើពុករលួយរបស់ស្នងការរងខេត្តបន្ទាយមានជ័យ លោក សម្បត្តិ កុសល បង្ហាញឱ្យឃើញការប្រព្រឹត្តខុសច្បាប់ធ្ងន់ធ្ងរក្នុងនាមខ្លួនជាមន្ត្រីអនុវត្តច្បាប់ ទាំងការជំពាក់លុយគេមិនព្រមសង និងការប្រព្រឹត្តអំពើពុករលួយរត់ការផ្តល់តំណែងក្នុងក្របខ័ណ្ឌមន្ត្រីកងកម្លាំងនគរបាលជាតិ។
លោកបន្តថា បើរកឃើញថាមន្ត្រីរូបនេះមានកំហុសដូចការលើកឡើងរបស់ស្ត្រីម្ចាស់បំណុលមែន នោះការអនុវត្តច្បាប់ត្រូវតែធ្វើឡើងដោយគ្មានភាពលម្អៀង ដើម្បីទប់ស្កាត់កុំឱ្យអំពើបែបនេះកើតមានក្នុងជួរមន្ត្រីកងកម្លាំងបន្តទៀត។
កាលពីថ្ងៃទី២២ ខែកុម្ភៈ ឆ្នាំ២០២៤ ស្នងការរងខេត្តបន្ទាយមានជ័យ លោក សម្បត្តិ កុសល បានប្តឹងម្ចាស់បំណុលឈ្មោះ ចិន ស្រីដា ទៅកាន់សាលាដំបូងខេត្តសៀមរាប ពីបទគំរាមកំហែងហែកកេរ្តិ៍ និងទាមទារសំណងជំងឺចិត្ត ២០ម៉ឺនដុល្លារអាមេរិក។
ក្នុងបណ្តឹងនោះ រៀបរាប់ថា កាលពីថ្ងៃទី១៨ ខែកុម្ភៈ ម្ចាស់បំណុលឈ្មោះ ចិន ស្រីដា បានប្រើប្រាស់គណនីហ្វេសប៊ុកឈ្មោះ Vi Da ឆាតមកទាមទារឱ្យខ្លួនសងលុយ បើខ្លួនមិនព្រមសង ម្ចាស់បំណុលនឹងគំរាមដាក់ពាក្យបណ្តឹងទៅតុលាការ រួមទាំងផ្សព្វផ្សាយរឿងខ្លួនជំពាក់លុយតាមបណ្ដាញសារព័ត៌មានថែមទៀត។
ក្រោយទទួលបានពាក្យបណ្ដឹងរបស់ស្នងការរងខេត្តបន្ទាយមានជ័យ ចៅក្រមសាលាដំបូងខេត្តសៀមរាប លោក ឃី ឆៃ បានចេញដីកាបង្គាប់ឱ្យចាប់ខ្លួនម្ចាស់បំណុលឈ្មោះ ចិន ស្រីដា កាលពីថ្ងៃទី១៨ ខែកុម្ភៈ ឆ្នាំ២០២៥ កន្លងទៅ ដោយកាត់ទោសដាក់ពន្ធនាគាររយៈពេល ២ឆ្នាំ ពីបទគំរាមកំហែងហែកកេរ្តិ៍ជាសាធារណៈ ប៉ុន្តែរហូតមកដល់ថ្ងៃទី៤ ខែមេសា ឆ្នាំ២០២៥ ទើបម្ចាស់បំណុលឈ្មោះ ចិន ស្រីដា ត្រូវបានសមត្ថកិច្ចឃាត់ខ្លួននៅស្រុកក្រឡាញ់ ខេត្តសៀមរាប។
ក្រោយចាប់ខ្លួន សាលាដំបូងខេត្តសៀមរាប បានចេញសេចក្តីប្រកាសព័ត៌មានកាលពីថ្ងៃទី៧ ខែមេសា ថា ការចាប់ខ្លួននេះធ្វើឡើងបន្ទាប់ពីម្ចាស់បំណុលឈ្មោះ ចិន ស្រីដា គេចវេះមិនសហការចូលខ្លួនតាមការកោះហៅរបស់តុលាការនាពេលកន្លងមក។
ជុំវិញបញ្ហានេះ កាលពីថ្ងៃទី២៩ ខែវិច្ឆិកា ឆ្នាំ២០២៤ ម្ចាស់បំណុលឈ្មោះ ចិន ស្រីដា និងស្វាមីឈ្មោះ ទី ប្រាថ្នា បានដាក់ពាក្យស្នើសុំអន្តរាគមន៍ពីរដ្ឋមន្ត្រីក្រសួងមហាផ្ទៃ លោក ស សុខា ដែរ ប៉ុន្តែគ្មានចំណាត់ការណាមួយលើសំណើរបស់ខ្លួនឡើយ។
ប្រភពដដែលបន្តថា ដោយសារមិនចង់សងលុយ កូនបំណុលឈ្មោះ រ៉ាំង ភិរម្យ បានណែនាំប្តីរបស់ស្ត្រីដែលជាម្ចាស់បំណុលដាក់លុយបន្ថែមធ្វើជាមន្ត្រីកងកម្លាំងក្នុងក្របខ័ណ្ឌនគរបាលជាតិ ដែលមានលោក សម្បត្តិ កុសល ដែលជាប្តីរបស់ខ្លួនជាអ្នករត់ការឱ្យ។ ពួកគេត្រូវបន្ថែមលុយសូកប៉ាន់ធ្វើជាមន្ត្រីកងកម្លាំងក្នុងក្របខ័ណ្ឌនគរបាលជាតិប្រមាណជា ៣ម៉ឺនដុល្លារអាមេរិកទៀត ប៉ុន្តែម្ចាស់បំណុលមិនព្រម។
សារព័ត៌មាន The Cambodia Daily មិនអាចទាក់ទងលោក សម្បត្តិ កុសល ដើម្បីសុំការបំភ្លឺជុំវិញបញ្ហានេះបាននៅឡើយទេរហូតមកដល់ម៉ោងផ្សាយនេះ៕
© 2025, . All rights reserved.