សហរដ្ឋអាមេរិកសម្រេចដំឡើងពន្ធនាំចូលផ្ទាំងសូឡាពីប្រទេសកម្ពុជា ជាង ៣៥០០% ចាប់ពីខែមិថុនា ឆ្នាំ២០២៥ ខាងមុខនេះតទៅ ក្នុងបំណងប្រឆាំងនឹងការឧបត្ថម្ភធនរបស់រដ្ឋាភិបាលចិន ក្នុងនោះ ប្រទេសថៃ ម៉ាឡេស៊ី និងវៀតណាម ក៏ត្រូវជាប់ពន្ធនាំចូលផ្ទាំងសូឡានេះដែរ។
សារព័ត៌មាន Bloomberg បានចុះផ្សាយកាលពីថ្ងៃចន្ទ ថា ក្រសួងពាណិជ្ជកម្មអាមេរិក បានចេញសេចក្តីប្រកាសកំណត់អត្រាពន្ធលើក្រុមហ៊ុននាំចូលផ្ទាំងសូឡាពីប្រទេសកម្ពុជាចំនួន ៣៥២១% ក្នុងអត្រានេះ បង្ហាញថាកម្ពុជាស្ថិតក្នុងចំណោមប្រទេសអាស៊ីអាគ្នេយ៍ដែលនឹងរងពន្ធគយលើផ្ទាំងសូឡាខ្ពស់ជាងគេបំផុត។ ចំណែកក្រុមហ៊ុននៅប្រទេសវៀតណាម ត្រូវកំណត់ពន្ធ ៣៩៥,៩% ក្រុមហ៊ុននៅប្រទេសថៃ ត្រូវកំណត់ពន្ធ ៣៧៥,២% ខណៈអត្រាពន្ធប្រទេសម៉ាឡេស៊ី ត្រូវបានកំណត់ជារួម គឺត្រឹម ៣៤,៤% ប៉ុណ្ណោះ។
ជុំវិញបញ្ហានេះ សហប្រធានពាណិជ្ជកម្មអន្តរជាតិ និងជាអ្នកប្រឹក្សាសម្ព័ន្ធក្រុមហ៊ុនថាមពលពន្លឺព្រះអាទិត្យ លោក Tim Brightbill អះអាងថា ការដំឡើងពន្ធនេះ គឺជាជ័យជម្នះដ៏ធំមួយសម្រាប់ការប្រកួតប្រជែងដោយអយុត្តិធម៌នៅទីផ្សារអាមេរិក។
លោក Tim Brightbill បញ្ជាក់ថា ក្រុមហ៊ុនសូឡាដែលមានទីស្នាក់ការកណ្ដាលក្នុងប្រទេសចិន បានបោកប្រាស់ជាប្រព័ន្ធក្នុងការប្រកួតប្រជែងជាមួយក្រុមហ៊ុនអាមេរិក ដែលបានធ្វើឲ្យអាមេរិក ចំណាយប្រាក់ច្រើនដោយសារតែការនាំចូលទំនិញទាំងនេះមានតម្លៃទាប។
ការសម្រេចកំណត់ពន្ធនេះ ធ្វើឡើងបន្ទាប់ពីក្រសួងពាណិជ្ជកម្មអាមេរិក បានដាក់ពន្ធលើការប្រឆាំងការលក់បង្ខូចថ្លៃដើមនាំចូល និងប្រឆាំងការឧបត្ថម្ភធនពីប្រទេសចិន លើឧបករណ៍ថាមពលពន្លឺព្រះអាទិត្យ ដែលចិននាំចូលទៅកាន់ប្រទេសម៉ាឡេស៊ី កម្ពុជា ថៃ និងវៀតណាម សម្រាប់បន្តនាំចូលទៅលក់នៅសហរដ្ឋអាមេរិកកាលពីពេលកន្លងទៅ។
ជុំវិញបញ្ហានេះ ក្រុមហ៊ុន Hanwha Qcells និងក្រុមហ៊ុន First Solar Inc ដែលមានមូលដ្ឋាននៅរដ្ឋ Arizona របស់ប្រទេសកូរ៉េ និងអ្នកផលិតតូចៗជាច្រើនបានដាក់ពាក្យបណ្ដឹងក្នុងការប្រឆាំងនឹងផលិតផលថាមពលពន្លឺព្រះអាទិត្យដែលនាំចូលពីអាស៊ីកាលពីឆ្នាំមុន ដើម្បីស្វែងរកការការពារលើការវិនិយោគរាប់ពាន់លានដុល្លារនៅក្នុងការផលិតថាមពលពន្លឺព្រះអាទិត្យរបស់សហរដ្ឋអាមេរិក។
ក្រុមហ៊ុនដែលជាគណៈកម្មាធិការពាណិជ្ជកម្មនៃសម្ព័ន្ធភាពអាមេរិកសម្រាប់ការផលិតថាមពលព្រះអាទិត្យ ធ្លាប់បានចោទប្រកាន់ក្រុមហ៊ុនផលិតបន្ទះសូឡារបស់ចិនធំៗដែលមានរោងចក្រនៅអាស៊ីអាគ្នេយ៍ អំពីការលក់សូឡាថាមានតម្លៃទាបជាងតម្លៃផលិតកម្មរបស់ពួកគេ និងទទួលបានប្រាក់ឧបត្ថម្ភមិនយុត្តិធម៌ ដែលធ្វើឱ្យទំនិញអាមេរិកបាត់បង់លទ្ធភាពក្នុងការប្រកួតប្រជែង។
ជុំវិញបញ្ហានេះ ក្រុមហ៊ុនចិនថាមពលសូឡា ឈ្មោះ Jinko Solar ប្រឈមនឹងពន្ធបន្ថែមប្រហែល ២៤៥% សម្រាប់ការនាំចេញពីប្រទេសវៀតណាម និង ៤០% សម្រាប់ការនាំចេញពីប្រទេសម៉ាឡេស៊ី ខណៈក្រុមហ៊ុន Trina Solar នៅក្នុងប្រទេសថៃ ប្រឈមនឹងការយកពន្ធចំនួន ៣៧៥% និងច្រើនជាង ២០០% ពីប្រទេសវៀតណាម។
ពន្ធលើផ្ទាំងសូឡាសម្រាប់ការនាំទៅកាន់ទីផ្សារអាមេរិក ត្រូវបានកំណត់ខ្ពស់រហូតដល់ ៣៥២១% សម្រាប់ប្រទេសកម្ពុជា គឺជាការឆ្លុះបញ្ចាំងឱ្យឃើញពីការសម្រេចចិត្តរបស់ប្រទេសដែលបដិសេធមិនចូលរួមស៊ើបអង្កេតលើបញ្ហាមួយនេះនាពេលកន្លងមក។
កម្ពុជាត្រូវគេដឹងថាមានរោងចក្រផលិតផ្ទាំងសូឡាចំនួន ២១កន្លែង ដែលមានទុនសរុបចំនួនជាង ១៧៣លានដុល្លារអាមេរិក៕
© 2025, . All rights reserved.