អង្គការក្រៅរដ្ឋាភិបាលជាច្រើនស្ថាប័ន អំពាវនាវឱ្យរដ្ឋាភិបាលកម្ពុជាដោះលែងសកម្មជនចលនាមាតាធម្មជាតិ ទាំង ៥នាក់ ឱ្យមានសេរីភាពឡើងវិញ ស្របពេលដែលតុលាការកំពូលនឹងប្រកាសសំណើសុំនៅក្រៅឃុំរបស់អ្នកទាំងប្រាំនៅថ្ងៃទី៣០ ខែមេសា ខាងមុខនេះ។
ក្រុមសង្គមស៊ីវិលទាំងនេះ រួមមាន មជ្ឈមណ្ឌលសិទ្ធិមនុស្សកម្ពុជា (CCHR) អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) និងសមាគមការពារសិទ្ធិមនុស្ស (អាដហុក) ជាដើម បានធ្វើយុទ្ធនាការលើបណ្ដាញសង្គមហ្វេសប៊ុកកាលពីថ្ងៃចន្ទ ដោយរៀបរាប់ថា គិតត្រឹមថ្ងៃទី២៨ ខែមេសា ឆ្នាំ២០២៥ នេះ គឺមានរយៈពេល ៣០០ថ្ងៃហើយដែលសកម្មជនការពារបរិស្ថាន និងសិទ្ធិមនុស្សចំនួនប្រាំនាក់នៃក្រុមចលនាមាតាធម្មជាតិបានជាប់ឃុំក្នុងពន្ធនាគារ។
ក្រុមអង្គការមិនមែនរដ្ឋាភិបាលទាំងនេះ ស្នើឱ្យរដ្ឋាភិបាលកម្ពុជាដោះលែងសកម្មជនចលនាមាតាធម្មជាតិទាំង ៥នាក់ និងអ្នកការពារសិទ្ធិមនុស្សផ្សេងទៀតដែលកំពុងជាប់ពន្ធនាគារដោយសារតែសកម្មភាពស្របច្បាប់ក្នុងកិច្ចការពារបរិស្ថាន និងសិទ្ធិមនុស្ស ឱ្យមានសេរីភាពឡើងវិញ និងឱ្យពួកគេរួចផុតពីបទចោទទាំងអស់ផងដែរ។
តុលាការកំពូលក្រុងភ្នំពេញ បានបើកសវនាការលើសំណើសុំនៅក្រៅឃុំរបស់សកម្មជនចលនាមាតាធម្មជាតិទាំង ៥នាក់ រួមមាន កញ្ញា ឡុង គន្ធា លោក លី ចាន់ដារ៉ាវុត កញ្ញា ភួន កែវរស្មី លោក ថុន រដ្ឋា និងលោក យីម លាងហ៊ី កាលពីថ្ងៃទី២៣ ខែមេសា កន្លងទៅ។ តុលាការក៏គ្រោងនឹងប្រកាសសំណើសុំនៅក្រៅឃុំនៅថ្ងៃទី៣០ ខែមេសា ខាងមុខនេះ។
កាលពីថ្ងៃទី០២ ខែកក្កដា ឆ្នាំ២០២៤ សាលាដំបូងរាជធានីភ្នំពេញបានផ្ដន្ទាទោសសមាជិកចលនាមាតាធម្មជាតិចំនួន ១០នាក់ ពីបទ «រួមគំនិតក្បត់ និងប្រមាថចំពោះអង្គព្រះមហាក្សត្រ» ក្នុងនោះលោក អាឡិច ហ្គន់សាឡេស ដេវិតសុន លោក យីម លាងហ៊ី និងកញ្ញា ស៊ុន រដ្ឋា ត្រូវបានកាត់ទោសឱ្យជាប់ពន្ធនាគាររយៈពេល ៨ឆ្នាំពីបទ «រួមគំនិតក្បត់ និងប្រមាថចំពោះអង្គព្រះមហាក្សត្រ»។
ក្នុងចំណោមសមាជិកចលនាមាតាធម្មជាតិទាំង ១០នាក់នេះ មាន ៥នាក់ប៉ុណ្ណោះដែលត្រូវបានតុលាការឃុំខ្លួន ខណៈអ្នកផ្សេងទៀតត្រូវបានតុលាការកាត់ទោសកំបាំងមុខ។
អ្នកទោសមនសិការជាសកម្មជនសង្គម និងសកម្មជននយោបាយដែលកំពុងត្រូវបានឃុំខ្លួនទាំងអយុត្តិធម៌ មានចំនួនសរុបជិត ១០០នាក់ (៦៥នាក់) សព្វថ្ងៃនេះ រួមមាន សកម្មជនបរិស្ថាន សកម្មជនសិទ្ធិមនុស្ស សកម្មជនដីធ្លី សកម្មជនបក្សប្រឆាំង រួមទាំងមន្ត្រីជាន់ខ្ពស់គណបក្សសង្គ្រោះជាតិផងដែរ៕
© 2025, . All rights reserved.