ខណៈមជ្ឈដ្ឋានជាតិ និងអន្តរជាតិមើលឃើញភាពស្រុតចុះខាងការអនុវត្តលទ្ធិប្រជាធិបតេយ្យ ពលរដ្ឋខ្មែរបាត់បង់សិទ្ធិសេរីភាពសម្ដែងមតិរិះគន់គោលការណ៍នយោបាយជាតិមិនបាន មិនអាចគេចផុតពីការតាមចាប់ពលរដ្ឋដាក់គុក សាធារណជនខ្មែរឧស្សាហ៍ឮតែពាក្យពេចន៍ផ្គាប់ផ្គុនលើកបញ្ជោរទៅវិញទៅមករវាងកូន និងឪពុក កូនសរសើរគោលនយោបាយដឹកនាំឪពុក ឪពុកសរសើរគោលនយោបាយយុវជនឈាមថ្មីដែលរក្សាបាននូវសន្តិភាព និងស្ថិរភាព។
លោក ហ៊ុន ម៉ាណែត លើកឡើងថា កម្ពុជាមិនត្រឹមតែមានគោលដៅទាក់ទាញទុនវិនិយោគមកអភិវឌ្ឍសេដ្ឋកិច្ច បង្កើតការងារជូនប្រជាពលរដ្ឋប៉ុណ្ណោះទេ ប៉ុន្តែថែមទាំងមានមហិច្ឆតាបង្កើតឱ្យមានលក្ខខណ្ឌការងារសមរម្យ ដើម្បីជាប្រយោជន៍រួមដល់ប្រជាពលរដ្ឋ ជាពិសេសកម្មករនិយោជិតក្រោមម្លប់ដ៏ត្រជាក់នៃសន្តិភាព។
នេះជាអំនួតខុសការពិតយ៉ាងសន្ធឹកសន្ធាប់ ព្រោះថាសន្តិភាពគេមិនសំដៅតែទៅលើអវត្តមាននៃចម្បាំងរាំងជល់បង្ហូរឈាមគ្នាមួយមុខប៉ុណ្ណោះទេ។ សន្តិភាពបែបនេះជាសន្តិភាពក្នុងគំនាប ហើយពលរដ្ឋខ្មែរពេញកម្លាំងទៅធ្វើការស្រុកក្រៅជិត ៣លាននាក់។
លោក ហ៊ុន ម៉ាណែត បានចេញលិខិតអបអរសាទរខួបអនុស្សាវរីយ៍លើកទី១៣៩ នៃទិវាពលកម្មអន្តរជាតិ ១ ឧសភា ដែលត្រូវបានផ្សព្វផ្សាយនៅថ្ងៃទី៣០ មេសា នេះថា រាជរដ្ឋាភិបាលបានខិតខំលើកកម្ពស់សេរីភាពអង្គការវិជ្ជាជីវៈ ស្របតាមច្បាប់ស្ដីពីការងារ ច្បាប់ស្ដីពីសហជីព ច្បាប់ស្ដីពីរបបសន្តិសុខសង្គម ច្បាប់ស្ដីពីប្រាក់ឈ្នួលអប្បបរមា និងបទដ្ឋានអន្តរជាតិខាងការងាររហូតមក។
លិខិតដដែលអះអាងថា ការដោះស្រាយវិវាទការងារក៏ត្រូវបានដោះស្រាយ និងប្រព្រឹត្តទៅកាន់តែមានប្រសិទ្ធភាពជាងមុនដែរ ដោយសារភាពចាស់ទុំនៃតួអង្គពាក់ព័ន្ធ និងការពង្រឹងយន្តការផ្សះផ្សាវិវាទការងារ។ ជាក់ស្តែង ក្នុងត្រីមាសទី១ ឆ្នាំ២០២៥ នេះ អត្រាសះជានៃការផ្សះផ្សាវិវាទការងារនៅកម្រិតក្រសួងបានកើនឡើងដល់ ៨៧% ខណៈឆ្នាំ២០២៤ មានត្រឹមតែ ៨៤% ប៉ុណ្ណោះ។
លោក ហ៊ុន ម៉ាណែត បញ្ជាក់ថា រាជរដ្ឋាភិបាលបានប្ដេជ្ញាចិត្តសម្រេចឱ្យបាននូវគោលដៅគន្លឹះក្នុងកម្មវិធីនយោបាយនៃយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ និងក្របខ័ណ្ឌគោលដៅអភិវឌ្ឍន៍ប្រកបដោយចីរភាព សំដៅប្រែក្លាយកម្ពុជាទៅជាប្រទេសមានចំណូលខ្ពស់នៅឆ្នាំ២០៥០ ខាងមុខ។
អង្គការក្រៅរដ្ឋាភិបាលជាច្រើន ដូចជា អង្គការសិទ្ធិមនុស្សកម្ពុជា (CCHR) មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) និងសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) ជាដើម បាននាំគ្នាផ្សព្វផ្សាយពាក្យស្លោកស្ដីពីអត្ថប្រយោជន៍កម្មករនិយោជិតព្រោងព្រាតលើបណ្ដាញសង្គមហ្វេសប៊ុក ដើម្បីចូលរួមអបអរសាទរក្នុងខួបអនុស្សាវរីយ៍លើកទី១៣៩ នៃទិវាពលកម្មអន្តរជាតិ ១ឧសភា នេះ។
ពាក្យស្លោកដែលត្រូវបានផ្សព្វផ្សាយទាំងនោះ រួមមាន៖
- «កម្មករមានបាន សេដ្ឋកិច្ចរីកចម្រើន»,
- «កម្លាំងរបស់កម្មករទាំងអស់គ្នា គឺជាឆ្អឹងខ្នងនៃសេដ្ឋកិច្ចរបស់ប្រទេសជាតិ»,
- ប្រាក់ឈ្នួលទាប នាំឱ្យកម្មករធ្លាក់ក្នុងអន្ទាក់បំណុល»,
- «យុវជនត្រូវការកិច្ចគាំពារសង្គម ការគោរពសិទ្ធិការងារ និងប្រាក់ឈ្នួលសមរម្យ»។
ជុំវិញបញ្ហានេះ លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) បានលើកឡើងថា ដើម្បីអបអរសាទរខួបអនុស្សាវរីយ៍លើកទី១៣៩ នៃទិវាពលកម្មអន្តរជាតិ ១ ឧសភា ក្នុងឆ្នាំ២០២៥ នេះ អង្គការសង្គមស៊ីវិលបានរួមគ្នាលើកយកប្រធានបទមួយ គឺ «យើងរួមគ្នាក្នុងការបន្តអនុវត្តសិទ្ធិសេរីភាពជាមូលដ្ឋាន ដើម្បីជំរុញឱ្យមានយុត្តិធម៌សង្គម»។
លោក ឃុន ថារ៉ូ លើកឡើងថា ការជ្រើសរើសយកប្រធានបទនេះ ដោយសារសង្គមស៊ីវិល និងសហជីពនានានៅតែមើលឃើញថាការអនុវត្តសិទ្ធិសេរីភាពមូលដ្ឋាននៅតែជាបញ្ហាប្រឈម ព្រោះកន្លងមក សិទ្ធិសេរីភាពសហជីពក្នុងការជំរុញឱ្យកម្មករនិយោជិតចូលរួមក្នុងអង្គការវិជ្ជាជីវៈដើម្បីឱ្យពួកគេមានលទ្ធភាពក្នុងការចងក្រងដើម្បីមានលទ្ធភាពចូលរួមជំរុញគោលនយោបាយផ្សេង ដូចជា សិទ្ធិការងារ និងប្រាក់ឈ្នួល ជាដើម នៅតែជាឧបសគ្គចម្បងនៅឡើយ៕
© 2025, . All rights reserved.