ក្នុងទិវាបុណ្យពលករអន្តរជាតិ ១ឧសភា មានសេចក្តីរាយការណ៍ក្នុងសារព័ត៌មាន ProPublica ថា កម្មករធ្វើការក្នុងរោងចក្រកាត់ដេរនៅក្រុងភ្នំពេញ ឈ្មោះ យ៉ាស៊ីលី ហ្គាម៉ិន ខេមបូឌីយ៉ា លីមីធិត (YASHILI GARMENT, CAMBODIA, LTD.) និងរោងចក្រ វ៉ាយ និង ដឹបប៊លយូ (Y&W Garment Factory) ដែលផលិតគ្រឿងសម្លៀកបំពាក់សម្រាប់មនុស្សប្រើប្រាស់ ជាពិសេសមួកសម្រាប់កូនង៉ែត ផ្គត់ផ្គង់ឲ្យក្រុមហ៊ុនអាមេរិកាំង ណៃគី (Nike) មិនបានធ្វើតាមពាក្យសន្យារបស់ខ្លួនដែលថានឹងបំបាត់មិនឲ្យមានការរំលោភសិទ្ធិកម្មករខ្មែរក្នុងរោងចក្រថៅកែចិន នោះទេ។
ក្នុងអត្ថបទពិពណ៌នាអំពីស្ថានភាពការងារក្នុងរោងចក្រកាត់ដេរនោះ គេសរសេរថា នៅក្រុងភ្នំពេញនារដូវប្រាំង សីតុណ្ហភាពក្តៅអាចឡើងដល់ ១០០អង្សាហ្វារ៉ិនហាយត៍ (100ºF) ឬជិត ៤០អង្សាសេ។ គេសង្កេតឃើញកម្មករយ៉ាងតិចពី ១០ ទៅ ១៥នាក់ដួលសន្លប់ពេលកំពុងធ្វើការ ហើយត្រូវឡានពេទ្យដឹកយកទៅគិលានដ្ឋានព្យាបាលក្នុងមួយខែៗ។
កម្មករម្នាក់ពីរោងចក្រ Y&W ក្នុងចំណោមកម្មករ-កម្មការិនី ៤៥០០នាក់ ប្រាប់កាសែតថា រោងចក្រកាត់ដេរ និងវេចខ្ចប់ដាក់ប្រអប់ ពុំមានម៉ាស៊ីនត្រជាក់ទេ ប្រើកង្ហារ ហើយជួនកាលកង្ហារគាំង អត់វិល ដែលបង្កឲ្យក្តៅនៅខាងក្នុងជាងខាងក្រៅស្ទើរតែទ្រាំមិនបាន។
កម្មករខ្លះទៀតពោលថា គ្រាន់តែធ្វើការ ៨ម៉ោង ញើសហូរជោកខ្លួន ស្រក់ដូចងូតទឹក ចុះទម្រាំអ្នកខ្លះធ្វើការ ១០, ១២, ១៤ម៉ោង តើក្តៅយ៉ាងណា?
ពេលកាសែតសាកសួរ ប្រធានអគ្គនាយកក្រុមហ៊ុន ណៃគី លោក John Donahoe ដែលមានទីចាត់ការធំនៅតំបន់ Bay Area ក្បែរក្រុង San Francisco រដ្ឋកាលីហ្វ័រនីញ៉ា និងសាខានៅរដ្ឋអ៊រេហ្គឹន (Oregon) ហើយចែកចាយទៅក្រុមហ៊ុន Haddad នៅបុរីញីវយ៉ក សហរដ្ឋអាមេរិក ឆ្លើយថា កម្មករទាំងអស់នោះបានប្រាក់ខែកម្រិតអប្បបរមាដល់ទៅពីរដងនៅរោងចក្រក្រុមហ៊ុនទទួលទិញទំនិញ។
អ្នកកាសែតរកឃើញថា ប្រាក់ខែដែលលោក John Donahoe ថាបានខ្ពស់ដល់ទៅពីរដងនោះ គឺបានតែប្រហែល ១% ប៉ុណ្ណោះ។
គេសួរថា ក្នុងករណីប្រៀបបាននឹងមុខរបរភ្ជួរស្រែលើខ្នងរាស្ត្រខ្មែរដូច្នោះ តើមន្ត្រីរាជរដ្ឋាភិបាលទទួលបន្ទុកការងារ សហជីពការងារ ក្រុមអង្គការការពារសិទ្ធិមនុស្ស និងពលករខ្មែរ មើលឃើញ ដឹងឮដែរ ឬក៏សម្ងំបិទភ្នែកទាំងអស់គ្នាដើម្បីសេចក្តីសុខរៀងខ្លួន?៕
© 2025, . All rights reserved.