អ្នកឃ្លាំមើលសង្គមលើកឡើងថា បើប្រទេសកម្ពុជានៅតែបន្តគ្រប់គ្រងដោយគ្រួសារត្រកូលហ៊ុន គ្មានទេយុត្តិធម៌សម្រាប់ជនរងគ្រោះ ដែលជាសកម្មជនបរិស្ថាន អ្នកវិភាគឯករាជ្យ និងអ្នកនយោបាយ ជាដើម បន្ទាប់ពីកូនប្រុសលោក លិម គិមយ៉ា កំពុងស្វះស្វែងរកយុត្តិធម៌ជូនឪពុករបស់ខ្លួនគ្រប់ទីកន្លែង។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌ មាន The Cambodia Daily នៅថ្ងៃទី៥ ឧសភា នេះថា ការស្វះស្វែងរកយុត្តិធម៌ឱ្យលោក លិម គិមយ៉ា គឺជារឿងត្រឹមត្រូវបំផុត ព្រោះអំពើឃាតកម្មនេះ គឺពាក់ព័ន្ធយ៉ាងជ្រៅទៅនឹងអ្នកមានអំណាចនៅកម្ពុជា ខណៈសហគមន៍អន្តរជាតិក៏មិនព្រងើយកន្តើយនឹងករណីនេះដែរ។
លោក ម៉ែន ណាត ជំរុញឱ្យរដ្ឋាភិបាលកម្ពុជាចាប់បញ្ជូនខ្លួនអ្នកពាក់ព័ន្ធទៅឱ្យតុលាការថៃ កាត់ទោសតាមផ្លូវច្បាប់ ដើម្បីបញ្ចប់នូវភាពមន្ទិលសង្ស័យរបស់ពលរដ្ឋខ្មែរលើក្រុមគ្រួសារត្រកូលហ៊ុន ព្រោះពលរដ្ឋខ្មែរដឹងគ្រប់គ្នាថា នៅក្នុងប្រទេសកម្ពុជាសព្វថ្ងៃនេះ គ្មានជនល្មើសណាអាចលាក់ខ្លួនផុតពីក្រសែភ្នែកត្រកូលហ៊ុនឡើយ។
អ្នកឃ្លាំមើលសង្គមរូបនេះបញ្ជាក់ថា ដើម្បីរកយុត្តិធម៌ជូនជនរងគ្រោះ ទាំងលោក លិម គិមយ៉ា លោក កែម ឡី លោក ជា វិជ្ជា និងលោក ឈុត វុទ្ធី ជាដើម ទាល់តែរបបដឹកនាំសព្វថ្ងៃនេះត្រូវបានផ្លាស់ប្ដូរ។ ផ្ទុយទៅវិញ បើសង្ឃឹមថាលោក ហ៊ុន សែន នឹងកែប្រែរកយុត្តិធម៌ឱ្យជនរងគ្រោះ នោះក៏មិនខុសពីសង្ឃឹមថាក្បាលជង្គង់មានមាត់ចេះនិយាយដែរ។
លោក ថូម៉ាស លិម កូនប្រុសបង្កើតលោក លិម គិមយ៉ា សរសេរលើគណនីហ្វេសប៊ុករបស់ខ្លួនកាលពីថ្ងៃទី៤ ខែឧសភា នេះថា ក្រោយលោក លិម គិមយ៉ា ត្រូវបានឃាតករបាញ់សម្លាប់ គឺមានរយៈពេលជិត ៥ខែហើយ ប៉ុន្តែរដ្ឋាភិបាលកម្ពុជានៅតែមិនចាប់បញ្ជូនខ្លួនជនសង្ស័យទៅឱ្យតុលាការប្រទេសថៃ កាត់ទោសនៅឡើយ។
កូនប្រុសមន្ត្រីបក្សប្រឆាំងរូបនេះអះអាងថា ការធ្វើដំណើររបស់លោកទៅកាន់ទីក្រុងប្រ៊ុចសែល ប្រទេសបែលហ្ស៊ិក កាលពីចុងខែមេសា កន្លងទៅនេះ គឺដើម្បីជួបជាមួយមន្ត្រីជាន់ខ្ពស់នៃគណៈកម្មការអឺរ៉ុប និងសមាជិកសភាអឺរ៉ុប ក្នុងបំណងឱ្យពួកគេស្វែងរកយុត្តិធម៌ឱ្យឪពុករបស់លោក។
ប្រភពដដែលលើកឡើងថា ការដែលរដ្ឋាភិបាលកម្ពុជាបដិសេធមិនបញ្ជូនខ្លួនជនសង្ស័យទៅឱ្យតុលាការថៃ កាត់ទោសនោះ គឺបង្ហាញឱ្យឃើញយ៉ាងច្បាស់ពីអ្នកដែលបញ្ជាពីក្រោយខ្នងនៃជនសង្ស័យឈ្មោះ ពេជ្រ គឹមស្រ៊ិន និងឈ្មោះ លី រតនៈរស្មី ដែលជាអ្នករៀបចំឧបត្ថម្ភផែនការក្នុងអំពើឃាតកម្មនេះ៕
© 2025, . All rights reserved.