អ្នកឃ្លាំមើលស្ថានការណ៍កម្ពុជា ចាត់ទុកសកម្មភាពចែកចាយក្រដាសប្រាក់ប្រឆាំងនឹងរបបដឹកនាំត្រកូលហ៊ុន គឺជាទង្វើស្របច្បាប់ដែលជនរងគ្រោះត្រូវតែធ្វើ ដើម្បីប្រឆាំងរបបដឹកនាំរបស់ក្រុមឧទ្ទាម។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងនៅក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៥ ខែឧសភា ថា ការចែកចាយក្រដាសប្រាក់ប្រឆាំងត្រកូលហ៊ុន គឺជាភស្តុតាងបង្ហាញឱ្យឃើញនូវការឈឺចាប់របស់ជនរងគ្រោះដែលរងនូវការជិះជាន់ពីរបបគ្រួសារផ្ដាច់ការនិយមសព្វថ្ងៃនេះ។
លោកបន្តថា ជនរងគ្រោះដែលចែកចាយក្រដាសប្រាក់ប្រឆាំងត្រកូលហ៊ុន មិនប្រាកដថាជាអ្នកគាំទ្របក្សប្រឆាំង ឬពលរដ្ឋសាមញ្ញទូទៅឡើយ ប៉ុន្តែក៏អាចជាអ្នកដែលស្ថិតនៅក្នុងជួររដ្ឋាភិបាលដែរ ព្រោះអំពើអយុត្តិធម៌នៃរបបដឹកនាំមួយនេះ បានកើតមានលើមនុស្សគ្រប់គ្នា លើកលែងតែត្រកូលហ៊ុនប៉ុណ្ណោះ។
លោក ម៉ែន ណាត អះអាងថា ការចែកចាយក្រដាសប្រាក់ប្រឆាំងរបបដឹកនាំគ្រួសារត្រកូលហ៊ុន មិនបានបំពានទៅនឹងច្បាប់ណាមួយដែលចែងពីសេរីភាពបញ្ចេញមតិនោះទេ ជាពិសេសចាប់ពីមាត្រា៣២ រហូតដល់មាត្រា៤២ ដែលចែងពីសេរីភាពបញ្ចេញមតិរបស់ពលរដ្ឋក្នុងរដ្ឋធម្មនុញ្ញនោះ។
ប្រធានក្រុមប្រឹក្សាឃ្លាំមើលកម្ពុជារូបនេះបញ្ជាក់ថា បើរដ្ឋាភិបាលប្រើលេសចោទប្រកាន់ពលរដ្ឋរងគ្រោះទាំងនោះថាបង្កភាពវឹកវរដល់សន្តិសុខសង្គម ហើយចាប់ពួកគេដាក់គុកទាំងអយុត្តិធម៌ ក៏អាចជាឈ្នាន់មួយឱ្យពលរដ្ឋរងគ្រោះងើបឡើងទម្លាក់រដ្ឋាភិបាលដែលកំពុងក្តោបក្តាប់ដោយក្រុមឧទ្ទាមដូចប្រទេសបង់ក្លាដេស នៅថ្ងៃណាមួយដែរ។
លោក ម៉ែន ណាត ជំរុញឱ្យពលរដ្ឋរងគ្រោះពីរបបដឹកនាំឧទ្ទាមត្រកូលហ៊ុន ចែកចាយក្រដាសប្រាក់បន្តទៀត ដើម្បីទាមទារសិទ្ធិសេរីភាពរបស់ខ្លួនត្រឡប់មកវិញដូចមានចែងក្នុងរដ្ឋធម្មនុញ្ញ ហើយក៏ដើម្បីផ្លាស់ប្ដូរការដឹកនាំមួយដែលសល់ពីរបបខ្មែរក្រហមចេញពីទឹកដីកម្ពុជាដែរ។
កាលពីចុងខែមេសា កន្លងទៅ ក្រដាសប្រាក់រៀលជាច្រើនប្រភេទ និងជាច្រើនសន្លឹក ដូចជា ក្រដាសប្រាក់ ១ពាន់រៀល ៥ពាន់រៀល និងក្រដាសប្រាក់ ៥០០រៀល ជាដើម ដែលមានសរសេរអក្សរផ្សេងៗប្រឆាំងត្រកូលហ៊ុន ត្រូវបានចែកចាយក្នុងទីក្រុងភ្នំពេញ ខេត្តកំពង់ចាម និងខេត្តកំពង់ធំ ព្រមទាំងបានផ្សព្វផ្សាយលើបណ្ដាញសង្គមហ្វេសប៊ុកផងដែរ។
ក្រដាសប្រាក់ទាំងនោះសរសេរថា «អំណាចហ៊ុនតត្រកូល ខ្មែរថ្ងូរតជំនាន់»។ យុទ្ធនាការនេះនឹងធ្វើឡើងគ្រប់ ២៥រាជធានី-ខេត្ត និងសូមឱ្យពលរដ្ឋខ្មែរចូលរួមយុទ្ធនាការនេះឱ្យបានច្រើនកុះករ ដើម្បីទាមទារឱ្យមានការដោះលែងអ្នកទោសនយោបាយ ស្ដារប្រជាធិបតេយ្យ គោរពសិទ្ធិមនុស្ស និងទាមទារឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌នៅកម្ពុជាឡើងវិញ៕
© 2025, . All rights reserved.