រដ្ឋលេខាធិការក្រសួងយុត្តិធម៌ លោក គឹម សន្តិភាព អះអាងថា ព្រះករុណាព្រះបាទសម្តេចព្រះបរមនាថ នរោត្តម សីហមុនី បានប្រោសប្រទានការបន្ធូរបន្ថយទោសដល់ទណ្ឌិតចំនួន ២៩៦នាក់ ក្នុងនោះស្រី ២៨នាក់ នៅក្នុងឱកាសពិធីបុណ្យវិសាខបូជា។
យោងតាមបណ្ដាញទំនាក់ទំនងសង្គមហ្វេសប៊ុករបស់លោក គឹម សន្តិភាព បានសរសេរថា ក្នុងចំណោមទណ្ឌិតទាំង ២៩៦នាក់ មានទណ្ឌិតចំនួន ២០៧នាក់ទទួលបានការបន្ធូរបន្ថយទោស ៣ខែ ទណ្ឌិត ៧០នាក់ ទទួលបានការបន្ធូរបន្ថយទោស ៦ខែ ទណ្ឌិត ១៧នាក់ ទទួលបានការបន្ធូរបន្ថយទោស ៩ខែ និងទណ្ឌិត ២នាក់ ទទួលបានការបន្ធូរបន្ថយទោសចំនួន ១២ខែ។
រដ្ឋលេខាធិការក្រសួងយុត្តិធម៌ បញ្ជាក់ថា គណៈកម្មការថ្នាក់ជាតិពុំពិនិត្យពិចារណាឡើយចំពោះសំណើទាំងឡាយដែលទាក់ទងនឹងទណ្ឌិតដែលបានប្រព្រឹត្តអំពើបទល្មើសដូចជា ឧក្រិដ្ឋជនគ្រឿងញៀន អំពើសាហាវយង់ឃ្នង ករណីមិនរាងចាល ប្រព្រឹត្តលើជនរងគ្រោះដែលជាសាច់ញាតិ ឬសហព័ទ្ធ ប្រព្រឹត្តលើជនរងគ្រោះជាមន្ត្រីរាជការ ឬមន្ត្រីសាធារណៈ និងទណ្ឌិតធ្លាប់ទទួលបានការបន្ធូរបន្ថយទោសច្រើនដងលើសពី ១ភាគ៣ នៃរយៈពេលផ្ដន្ទាទោស។
ប្រភពខាងលើអះអាងថា គណៈកម្មការថ្នាក់ជាតិក៏ពុំពិនិត្យពិចារណាដែរចំពោះសំណើទាំងឡាយពាក់ព័ន្ធនឹងទណ្ឌិតដែលមានបទល្មើសរំលោភផ្លូវភេទលើជនរងគ្រោះជាអនីតិជនអាយុក្រោម ១៣ឆ្នាំ ឬជាជនមានវិបល្លាសស្មារតី ឬពិការ ឬមានផ្ទៃពោះ ឬជនរងគ្រោះជាសាច់សាលោហិត ករណីរំលោភបូក និងករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត។
ប្រធានអង្គការប្រជាធិបតេយ្យខ្មែរ លោក ស៊ឹង សែនករុណា បានឲ្យដឹងថា ការសុំលើកលែង និងបន្ធូរបន្ថយទោសកន្លងមកតែងតែមានភាពមិនប្រក្រតីនៃការជ្រើសរើសទណ្ឌិត ដោយសារតែមានការពាក់ព័ន្ធករណីអំពើពុករលួយ និងរឿងនយោបាយ។
លោក ស៊ឹង សែនករុណា អះអាងថា កន្លងមក មន្ត្រីអតីតបក្សប្រឆាំង សកម្មជនព្រៃឈើ សកម្មជនដីធ្លី កម្រនឹងមានឈ្មោះក្នុងបញ្ជីស្នើសុំបន្ធូរបន្ថយ ឬលើកលែងទោសណាស់ បើទោះបីជាពួកគាត់បានអនុវត្តខ្លួនល្អ និងអនុវត្តទោសបានពីរភាគបីក្នុងការជាប់ឃុំក៏ដោយ។
លោកទទូចឲ្យមន្ត្រីមានសមត្ថកិច្ច ធ្វើការជ្រើសរើសដោយមានតម្លាភាព ដើម្បីផ្តល់យុត្តិធម៌ដល់ទណ្ឌិតដែលបានខិតខំកែប្រែខ្លួននៅក្នុងពន្ធនាគារ។
យោងតាមព្រះរាជក្រឹត្យស្ដីពីការបន្ធូរបន្ថយទោស និងលើកលែងទោសដល់ទណ្ឌិត ចុះថ្ងៃទី១២ ខែមករា ឆ្នាំ២០២១ លើកឡើងថា ការលើកលែង និងបន្ធូរបន្ថយទោសដល់ទណ្ឌិតជាប់ពន្ធនាគារ ធ្វើឡើងចំនួន ៥លើកក្នុងមួយឆ្នាំ គឺក្នុងទិវាជ័យជម្នះលើរបបប្រល័យពូជសាសន៍ ពិធីបុណ្យចូលឆ្នាំខ្មែរ បុណ្យវិសាខបូជា បុណ្យឯករាជ្យជាតិ និងព្រះរាជពិធីបុណ្យអុំទូក។ ការបន្ធូរបន្ថយទោស ធ្វើឡើងលុះត្រាតែទណ្ឌិតបានអនុវត្តទោស ១ភាគ៣ នៃទោសដាក់ពន្ធនាគារសរុបដែលតុលាការបានកំណត់ ហើយសម្រាប់ទោសដាក់ពន្ធនាគារមួយជីវិត ទណ្ឌិតត្រូវទទួលរងទោស ១០ឆ្នាំជាមុនសិន។
ទោះជាយ៉ាងណាក៏ដោយ អង្គការសង្គមស៊ីវិលមួយចំនួនដែលតាមដានសង្កេតករណីតុលាការកាត់ទោសឲ្យជាប់ពន្ធនាគារ ធ្លាប់រាយការណ៍ថា ទណ្ឌិតភាគច្រើនជាជនជាតិខ្មែរ ជាអ្នកទោសមនសិការ ឬនយោបាយ សកម្មជនការពារភោគទ្រព្យសម្បត្តិធម្មជាតិស្រុកខ្មែរសម្រាប់ប្រយោជន៍ខ្មែរទូទាំងប្រទេស ដូចជាសកម្មចលនាមាតាធម្មជាតិ សកម្មជនព្រៃឡង់ សកម្មជនបរិស្ថាន និងសកម្មជនការពារសិទ្ធិសេរីភាពមនុស្ស ជាដើម។
លោក គឹម សន្តិភាព ដែលជាកូនប្រសាព្រឹទ្ធសមាជិករដ្ឋសភា ជាម យៀប និងជាអនុប្រធានអង្គភាពក្រុមការងារយុវជនបក្សប្រជាជនកម្ពុជាក្រៅប្រទេស មិនបានបញ្ជាក់អំពីជំពូកទណ្ឌិតដែលនឹងទទួលការលើកលែង ឬបន្ធូរបន្ថយទោសពៃរ៍ពីព្រះមហាក្សត្រនាឱកាសបុណ្យសាសនាជាតិថ្ងៃឧបោសថសីល ១៥កើត ពេញបូណ៌មីនេះឡើយ៕
© 2025, . All rights reserved.