បើផ្អែកលើស្ថានភាពជាក់ស្ដែងនាពេលបច្ចុប្បន្ននេះ ប្រទេសធំៗកំពុងតែព្យាយាមឱ្យខ្លួនគេសម្រេចបាននូវមហិច្ឆតាឱបក្រសោបយកទឹកដីប្រទេសតូច និងទន់ខ្សោយក្នុងវិស័យការពារជាតិរបស់ខ្លួន។ ជាក់ស្ដែង កាលដែលរុស្ស៊ី លើកទ័ពចូលឈ្លានពានប្រទេសអ៊ុយក្រែន គឺជារឿងពិត ក្រោយពីអ៊ុយក្រែន បាត់បង់ទាំងស្រុងនូវក្បាលគ្រាប់នុយក្លេអ៊ែរដែលរបូតធ្លាក់ទៅលើដៃរុស្ស៊ី។
កាលពីឆ្នាំ១៩៩៤ អ៊ុយក្រែន បានយល់ព្រមផ្ទេរក្បាលគ្រាប់នុយក្លេអ៊ែរទៅឱ្យរុស្ស៊ី នៅក្រោមសន្ធិសញ្ញាស្ដីពីការមិនសាយភាយអាវុធនុយក្លេអ៊ែរ ជាថ្នូរនឹងសំណងសេដ្ឋកិច្ច និងការធានាសន្តិសុខពីប្រទេសរុស្ស៊ី ហើយសហរដ្ឋអាមេរិក និងចក្រភពអង់គ្លេស ក៏ជាសាក្សីក្នុងការគោរពឯករាជភាព និងអធិបតេយ្យភាពរបស់អ៊ុយក្រែន នៅក្នុងព្រំដែនដែលមានស្រាប់នៅឆ្នាំ១៩៩១។
២០ឆ្នាំក្រោយមក រុស្ស៊ី ដែលជាភាគីមួយនៃកិច្ចព្រមព្រៀង បានរំលោភសន្ធិសញ្ញានោះ ហើយបានបង្កការឈ្លានពានអ៊ុយក្រែន ក្នុងឆ្នាំ២០១៤ ក្រោយពីក្រុងមូស្គូ ចាប់យកបានដែនដីគ្រីមៀរ នៅខែមីនា ឆ្នាំ២០១៤។
រុស្ស៊ី នៅក្រោមការដឹកនាំរបស់លោក វ៉្លាឌីមៀ ពូទីន បានរុញឱ្យមានកម្លាំងឧទ្ទាមរបស់ខ្លួនបង្កអបគមន៍ចាប់យកតំបន់ដុនបាសភាគខាងកើតនៃប្រទេសអ៊ុយក្រែន ប៉ុន្តែមេដឹកនាំអ៊ុយក្រែន ដែលសម្រេចលើកទ័ពទៅវាយកម្លាំងឧទ្ទាមរបស់រុស្ស៊ី គឺលោក ភិតធើរ៍ ប៉េរ៉ូឆេនកូ។
លោក ភិតធើរ៍ ប៉េរ៉ូឆេនកូ បានបញ្ជូនទ័ពទៅទប់ស្កាត់កម្លាំងអបគមន៍របស់កងទ័ពឧទ្ទាមរបស់រុស្ស៊ី នៅក្នុងឆ្នាំ២០១៤ រហូតរុស្ស៊ី ផ្ទុះសង្គ្រាមពេញទំហឹងវាយលុកអ៊ុយក្រែន នៅឆ្នាំខែកុម្ភៈ ឆ្នាំ២០២២ តែម្តង ដែលសង្គ្រាមនេះកំពុងបន្តអស់រយៈពេលជាង ៣ឆ្នាំមកហើយ។
ក្នុងស្ថានភាពនេះ លោក ហ្សេឡេនស្គី ប្រធានាធិបតីអ៊ុយក្រែន បច្ចុប្បន្ន បានសុំឱ្យអាមេរិកប្រគល់ក្បាលគ្រាប់នុយក្លេអ៊ែរ ទៅឱ្យអ៊ុយក្រែន ដែលលោកអះអាងថា បើអ៊ុយក្រែន នៅបន្តមានក្បាលគ្រាប់នុយក្លេអ៊ែរ ម្ល៉ោះរុស្ស៊ី បានត្រឹមតែជាសមភាគីនឹងអ៊ុយក្រែន ប៉ុណ្ណោះ គឺគ្មានទេការឈ្លានពានអ៊ុយក្រែន។
លោក ហ្សេឡេនស្គី កំពុងដាក់ផែនការឱ្យអ៊ុយក្រែន ជាប្រទេសមានឧស្សាហកម្មយោធា និងសព្វាវុធ ហើយជាប្រទេសមានកម្លាំងទ័ពយ៉ាងតិចមួយលាននាក់ក្រោយពីដណ្ដើមបានសន្តិភាពវិញពីប្រទេសរុស្ស៊ី នៅពេលណាមួយ។
លោក ហ្សេឡេនស្គី បន្ទោសទៅលើមេដឹកនាំអ៊ុយក្រែន មុនៗ ជាពិសេសអតីតប្រធានាធិបតី លោក វ៉ិចទ័រ យ៉ាណុកូវិច និងលោក ឡេអូនីន កូច្មា ដែលជាមេដឹកនាំអ៊ុយក្រែន សន្តិភាពនិយមជាមួយរុស្ស៊ី សម្រេចលះបង់អ្វីគ្រប់បែបយ៉ាងឱ្យតែបានសន្តិភាពពីរុស្ស៊ី។
ស្របពេលគ្នានេះដែរ ប្រធានក្រុមប្រឹក្សាអឺរ៉ុប លោក Roberta Metsola នៅក្នុងសន្និសីទសារព័ត៌មានមួយកាលពីពេលថ្មីៗនេះ ក៏បានលើកឡើងថា ក្នុងស្ថានភាពដែលអ៊ុយក្រែន ធ្វេសប្រហែសព្រោះតែទុកចិត្តថាប្រទេសជិតខាងខ្លួនជាមិត្ត គ្មានពេលណាដែលក្បត់នឹងអ៊ុយក្រែន នោះ គឺជាកំហុសប្រវត្តិសាស្ត្រ។
លោកបន្តថា វាជាកំហុសដែលមិនបានពង្រឹងវិស័យការពារជាតិរបស់ខ្លួនឱ្យបានរឹងមាំ និងជាកំហុសទុកចិត្តមិត្តជ្រុលពេក ដែលថាមិនអាចប្រែក្លាយជាសត្រូវ គឺកំហុសគ្រោះថ្នាក់ដល់ប្រជាជាតិអ៊ុយក្រែន មកទល់នឹងពេលនេះ។
បើតាមលោក Roberta Metsola សន្តិភាពនិយមដែលគ្មានភាពរឹងមាំក្នុងវិស័យការពារជាតិ គឺគឺជាទស្សនៈភាន់ច្រឡំដូចករណីអ៊ុយក្រែន ដែលកំពុងធ្លាក់ក្នុងសង្គ្រាមឈ្លានពានរបស់រុស្ស៊ី។ លោកទទូចថា ប្រទេសអឺរ៉ុបទាំងអស់ រាប់ទាំងប្រទេសក្នុងសហភាពអឺរ៉ុប ជាពិសេសប្រទេសណាដែលនៅជាប់នឹងព្រំដែនរុស្ស៊ី ឬជាប់នឹងព្រំដែនប្រទេសសម្ព័ន្ធភាពនឹងរុស្ស៊ី ត្រូវតែកំណត់ចក្ខុវិស័យឡើងវិញចំពោះអ្វីដែលហៅថា «សន្តិភាពគ្មានភាពរឹងមាំលើវិស័យការពារជាតិរបស់ខ្លួន»។
ប្រធានក្រុមប្រឹក្សាអឺរ៉ុប បានដាស់តឿនថា សន្តិភាពនិយមជ្រុលពេកជាមួយប្រទេសជិតខាងដូចមេដឹកនាំមុនៗរបស់អ៊ុយក្រែន ដែលនៅទីបំផុត សន្តិភាពនិយមនេះហើយងាយត្រូវបានគេឈ្លានពានណាស់។
តែចំពោះមេដឹកនាំអ៊ុយក្រែន ក្នុងពេលនេះ ជាមេដឹកនាំដែលមិនបានលុតជង្គង់សុំសន្តិភាពពីអ្នកឈ្លានពាននោះទេ ហើយមេដឹកនាំប្រទេសណាមិនដឹងទេ តែសម្រាប់ប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បើទោះជាកើតចេញពីតារាកំប្លែងក៏ដោយ គឺមិនដែលបោះពាក្យថា សុំសន្តិភាពពីលោក វ៉្លាឌីមៀ ពូទីន បុរសខ្លាំងគ្មានគូប្រៀបនៅវិមានក្រឹមឡាំងម្ដងណាឡើយ។
នៅមុនប៉ុន្មានថ្ងៃនៃខួប ៣ឆ្នាំចូលមកដល់ ប្រធានាធិបតីសហរដ្ឋអាមេរិក លោក ដូណាល់ ត្រាំ បានគំរាមអ៊ុយក្រែន ដែលមានលោក ហ្សេឡេនស្គី ជាប្រមុខដឹកនាំ ឱ្យប្រញាប់ទៅកាន់តុចរចា បើពុំនោះទេ ប្រទេសអ៊ុយក្រែន អាចនឹងត្រូវមហាអំណាចរុស្ស៊ី លេបបាននៅថ្ងៃណាមួយមិនខាន។ លោក ត្រាំ បានព្រមានទៀតថា លោក ហ្សេឡេនស្គី គ្មានសន្លឹកបៀនៅក្នុងដៃដើម្បីលេងជាមួយនឹងលោក ពូទីន នោះទេ។
លោក ត្រាំ ថាលោក ពូទីន កំពុងតែកាន់សន្លឹកបៀសន្តិភាពសម្រាប់អ៊ុយក្រែន ដែលអ៊ុយក្រែន មានឱកាសដើម្បីទទួលយកសន្តិភាពពីលោក ពូទីន។
សារព្រមានរបស់លោក ត្រាំ មិនបានធ្វើឱ្យលោក ហ្សេឡេនស្គី ភ័យខ្លាច ហើយលុតជង្គង់ទៅជួបលោក ពូទីន ភ្លាមៗនោះទេ។ លោក ហ្សេឡេនស្គី ដែលប្រជាជនអ៊ុយក្រែន បានហៅថាជាវីរជនរបស់ខ្លួន បានឆ្លើយតបវិញថា រឿងចរចាជាការចាំបាច់ណាស់ដើម្បីបញ្ចប់ការស្លាប់កងទ័ព ប៉ុន្តែអ៊ុយក្រែន ត្រូវតែមានសន្តិសុខមួយរឹងមាំជាមួយនឹងកម្លាំងទ័ព និងវិស័យការពារជាតិរបស់ខ្លួនត្រូវខ្លាំងជាមុនសិន គឺខ្លាំងរហូតសត្រូវលែងហ៊ានឈ្លានពាន។
លោក ហ្សេឡេនស្គី បានសន្យាថា លោកសុខចិត្តបោះបង់តំណែង ប្រសិនបើការចុះចេញរបស់លោកនាំមកនូវសន្តិភាពសម្រាប់អ៊ុយក្រែន ឬអាចដោះដូរនឹងការចូលជាសមាជិកអង្គការ NATO។
នៅមុនមួយថ្ងៃចូលដល់ថ្ងៃទី២៤ ខែកុម្ភៈ ឆ្នាំ២០២៥ ជាខួប ៣ឆ្នាំនៃសង្គ្រាមរបស់រុស្ស៊ី ឈ្លានពានអ៊ុយក្រែន លោក ហ្សេឡេនស្គី បញ្ជូនសារខ្លីមួយទៅប្រជាជនអ៊ុយក្រែន ថា៖ «ជាមោទនភាពណាស់ដែលប្រជាជនអ៊ុយក្រែន បានក្លាយជាវីរជនដើម្បីសេរីភាព ប្រយុទ្ធការពារទឹកដីរបស់ខ្លួនយ៉ាងអង់អាចប្រឆាំងនឹងអ្នកឈ្លានពានរហូតជាង ៣ឆ្នាំមកនេះ។»
លោកបន្តថា ចំពោះរូបលោកក៏មានមោទនភាពជាមេដឹកនាំមួយរូបមានកងទ័ពខ្លាំងវាយទប់ទល់បាននូវការឈ្លានពានរបស់ប្រទេសមហាអំណាចយោធាមួយនោះ។
នៅលើពិភពលោកយើងនេះ មេដឹកនាំប្រទេសខ្លះត្រូវគេមើលឃើញថាខ្លាំងតែទៅលើជាតិសាសន៍ខ្លួនឯង។ មេដឹកនាំខ្លាំងរូបនោះ បង្ក្រាបជាតិសាសន៍ខ្លួនឯងឱ្យក្រាបដល់ដី ក្រោមលេសថាការពារសន្តិភាព និងសន្តិសុខរបស់ប្រទេស។ ចំណែកជាមួយប្រទេសជិតខាងវិញ មេដឹកនាំប្រភេទនេះតែងតែពោលពាក្យថា សន្តិភាពគឺជាអាយុជីវិតនៃមិត្តភាពម៉ឺនឆ្នាំ៕
© 2025, . All rights reserved.