បណ្ដាញផ្សាយព័ត៌មាន LBC News ចុះផ្សាយកាលពីថ្ងៃទី២៨ ឧសភា ថា ចក្រភពអង់គ្លេស សហរដ្ឋអាមេរិក រួមនឹងសម្ព័ន្ធមិត្តលោកខាងលិច បានព្រមព្រៀងលុបចោលការរឹតបន្តឹងដោយបើកភ្លើងខៀវឱ្យអ៊ុយក្រែន អាចប្រើប្រាស់អាវុធជំនួយរបស់ពួកលោកខាងលិច ទោះអាវុធណាក៏ដោយ ក៏អ៊ុយក្រែន អាចបាញ់លើគោលដៅយោធាខាងក្នុងប្រទេសរុស្ស៊ី ឱ្យតែអ៊ុយក្រែន វាយសងសឹក។
ការលើកលែងបម្រាមនេះ បន្ទាប់ពីលោក ត្រាំ បានប្រមាថរិះគន់យ៉ាងចាស់ដៃទៅលើលោក ពូទីន ថាជាមនុស្សឆ្កួតសុទ្ធដែលចង់លេបប្រទេសអ៊ុយក្រែន មិនគិតថារុស្ស៊ី នឹងគ្រោះថ្នាក់។
ការរិះគន់របស់លោក ត្រាំ ចំពោះលោក ពូទីន បានកើតឡើងបន្ទាប់ពីរុស្ស៊ី បានបង្កើនការវាយប្រហារកាន់តែខ្លាំងឡើងដោយយន្តហោះគ្មានមនុស្សបើក និងមីស៊ីលជាច្រើនរាប់សិបគ្រាប់ក្នុងប្រតិបត្តិការទ្រង់ទ្រាយធំបំផុតទៅលើអ៊ុយក្រែន រយៈពេល ៣ថ្ងៃជាប់ៗគ្នាក្នុងសប្ដាហ៍នេះ។
លោក Friedrich Merz អធិការបតីថ្មីនៃប្រទេសអាល្លឺម៉ង់ ក៏បានបញ្ជាក់ថា អ៊ុយក្រែនត្រូវតែទទួលបានការការអនុញ្ញាតឱ្យប្រើប្រាស់នូវមីស៊ីលរយៈចម្ងាយឆ្ងាយ ជាការសងសឹកទៅលើរុស្ស៊ី។ លោក Merz បាននិយាយថា សព្វាវុធក្នុងបរិមាណគ្មានដែនកំណត់ នឹងត្រូវបានបញ្ជូនទៅកាន់អ៊ុយក្រែន។
មានន័យថា ឥឡូវនេះ អ៊ុយក្រែន អាចធ្វើការសងសឹកដោយការវាយប្រហារជាមួយនឹងសព្វាវុធណាមួយក៏បានទៅលើប្រទេសរុស្ស៊ី ក្នុងលក្ខខណ្ឌការពារខ្លួនទប់ទល់ពីការវាយប្រហារណាមួយរបស់រុស្ស៊ី។
លោក ត្រាំ បានលើកឡើងក្នុងបណ្ដាញសង្គមថា លោកតែងតែមានទំនាក់ទំនងល្អជាមួយលោក ពូទីន ប៉ុន្តែឥឡូវ លោកថាលោក ពូទីន បែរជាបើកការវាយប្រហារដោយកាំជ្រួច និងយន្តហោះគ្មានមនុស្សបើកទ្រង់ទ្រាយធំទៅលើអ៊ុយក្រែន ទៅវិញ។ លោក ត្រាំ បានហៅលោក ពូទីន ពិតជាឆ្កួតមែនទែនហើយ។
លោក ត្រាំ បន្តថា លោក ពូទីន ចង់ដណ្តើមយកអ៊ុយក្រែន ទាំងមូល មិនមែនត្រឹមតែមួយផ្នែកនៃទឹកដីអ៊ុយក្រែន នោះទេ ហើយគាត់គិតថាអ្វីដែលគាត់កំពុងធ្វើនេះជារឿងត្រឹមត្រូវ ប៉ុន្តែប្រសិនបើគាត់នៅតែបន្តធ្វើនោះ វានឹងនាំទៅរកការដួលរលំនៃប្រទេសរុស្ស៊ី។
ថ្លែងទៅកាន់អ្នកកាសែត លោក ត្រាំ បានបន្ថែមថា លោកមិនសប្បាយចិត្តនឹងអ្វីដែលលោក ពូទីន កំពុងធ្វើនោះទេ ខណៈដែលគាត់បានសម្លាប់មនុស្សជាច្រើនម៉ឺននាក់ទៅហើយនេះ។
ចំណែកលោក ម៉ាក្រុង ប្រធានាធិបតីបារាំង វិញ បានថ្លែងដែរថា លោក ត្រាំ ពេលនេះដឹងខ្លួនហើយថាលោក ពូទីន ជាមនុស្សភរកម្រិតណា។ បើតាមលោក ម៉ាក្រុង ទង្វើរបស់លោក ពូទីន វាសមល្មមនឹងលោក ត្រាំ អស់ចិត្ត។
លោក ត្រាំ ប្រតិកម្មខ្លាំងដូចនេះក្រោយពីទូទាំងប្រទេសអ៊ុយក្រែន រងការវាយប្រហារដោយដ្រូនជាង ៣៥០គ្រឿងក្នុងមួយថ្ងៃៗនៅប៉ុន្មានសប្ដាហ៍ចុងក្រោយនេះ។
ប៉ុន្តែជាមួយគ្នានេះ សហភាពអឺរ៉ុបព្រមានសហរដ្ឋអាមេរិកថា សន្តិភាពតាមរយៈកម្លាំងអាចដំណើរការបាន លុះត្រាតែអ៊ុយក្រែន ទទួលបានការគាំទ្រកាន់តែរឹងមាំពីសហរដ្ឋអាមេរិកឡើងវិញ។
យោងតាមរបាយការណ៍ដែលចេញផ្សាយដោយសារព័ត៌មាន EUROMAIDAN កាលពីថ្ងៃទី២៦ ឧសភា បានឱ្យដឹងថា ស្នងការសហភាពអឺរ៉ុបទទួលបន្ទុកផ្នែកការពារ និងអវកាស លោក Andrius Kubilius បានជំរុញឱ្យសហរដ្ឋអាមេរិកប្ដេជ្ញាចិត្តខ្លាំងក្លាបន្ថែមទៀតក្នុងការពង្រឹងសមត្ថភាពការពារជាតិរបស់អ៊ុយក្រែន ដោយបញ្ជាក់ថា គោលការណ៍សន្តិភាពតាមរយៈកម្លាំងអាចដំណើរការទៅបាន លុះត្រាតែអាមេរិក និងអឺរ៉ុប ត្រូវតែបន្តគាំទ្រអ៊ុយក្រែន យ៉ាងរឹងមាំ។
សេចក្តីថ្លែងការណ៍នេះ កើតឡើងខណៈដែលប្រធានាធិបតីអាមេរិក លោក ត្រាំ កំពុងជំរុញឱ្យមានកិច្ចចរចាសន្តិភាពរវាងរុស្ស៊ី និងអ៊ុយក្រែន ប៉ុន្តែលោក ពូទីន នៅតែបន្តបើកការឈ្លានពានទៅលើអ៊ុយក្រែន ឥតឈប់ឈរ។
លោក Andrius Kubilius បានលើកឡើងថា សម្រាប់លោកផ្ទាល់ លោកគិតថាលោក ពូទីន មិនចង់បានបទឈប់បាញ់ និងសន្តិភាពនោះទេ ហើយពេលនេះទំនងជារដ្ឋការលោក ត្រាំ ក៏ចាប់ផ្តើមយល់ដែរថា លោក ពូទីន ចង់បន្តសង្គ្រាម ព្រោះគាត់គិតថាគាត់កំពុងឈ្នះនៅក្នុងសង្គ្រាមនេះ។
លោក Kubilius បានសង្កត់ធ្ងន់ថា ប្រសិនបើអាមេរិកពិតជាទទួលយកសន្តិភាពតាមរយៈកម្លាំង នោះជំហានដំបូងត្រូវតែពង្រឹងសមត្ថភាពយោធារបស់អ៊ុយក្រែន ជាមុនសិន។ លោកបានកត់សម្គាល់ថា អ៊ុយក្រែន កំពុងប្រើប្រាស់គ្រប់ធនធានរបស់ខ្លួនដែលមានរួច ដើម្បីការពារខ្លួនប្រឆាំងនឹងការឈ្លានពានរបស់រុស្ស៊ី តែយ៉ាងណា អ៊ុយក្រែនត្រូវតែទទួលបានការពង្រឹងសមត្ថភាពយោធាបន្ថែមពីដៃគូរបស់ខ្លួន ជាពិសេសសហភាពអឺរ៉ុប និងសហរដ្ឋអាមេរិក។ លើសពីនេះ រដ្ឋាភិបាលកំពុងត្រៀមថវិកាបន្ថែមទៀត ដើម្បីទិញប្រព័ន្ធការពារដែនអាកាស និងយន្តហោះគ្មានមនុស្សបើករយៈចម្ងាយឆ្ងាយឱ្យអ៊ុយក្រែន ផងដែរ។
បើទោះជាយ៉ាងនេះក្ដី រុស្ស៊ីកំពុងដាក់សំណើឱ្យមានការចរចាផ្ទាល់ឡើងវិញជាមួយអ៊ុយក្រែន។
យោងតាមសេចក្ដីរាយការណ៍ដែលចេញផ្សាយដោយសារព័ត៌មាន The new voice of Ukraine កាលពីថ្ងៃទី២៧ ខែឧសភា បានឱ្យដឹងថា រុស្ស៊ីបានស្នើឱ្យមានកិច្ចចរចាសន្តិភាពជាមួយអ៊ុយក្រែន ជាថ្មីម្តងទៀតនៅប្រទេសតួកគី។ នេះបើតាមការលើកឡើងរបស់រដ្ឋមន្ត្រីការបរទេសរុស្ស៊ី លោក Sergei Lavrov ក្នុងសន្និសីទសារព័ត៌មានរួមគ្នានៅទីក្រុងមូស្គូ ជាមួយរដ្ឋមន្ត្រីការបរទេសតួកគី លោក Hakan Fidan នៅថ្ងៃទី២៧ ខែឧសភា។
បើតាមលោក Lavrov កិច្ចចរចារុស្ស៊ី-អ៊ុយក្រែន ជុំទី២ នឹងធ្វើឡើងនៅប្រទេសតួកគី ដដែលនោះទេ។
ចំពោះរដ្ឋមន្ត្រីការបរទេសតួកគី លោក Hakan Fidan និយាយថា តួកគីតែងតែត្រៀមខ្លួនជាស្រេចក្នុងការផ្តល់វេទិកាមួយសម្រាប់កិច្ចពិភាក្សា ហើយចាត់ទុកថាវាជាកាតព្វកិច្ចរបស់ខ្លួនក្នុងការជួយធានាសន្តិភាពនៅជុំវិញពិភពលោក។
ប៉ុន្តែទន្ទឹមគ្នានេះ លោក Lavrov ក៏បានច្រានចោលគំនិតដែលចង់ឱ្យមានការចរចានៅបុរីវ៉ាទីកង់។ លោក Lavrov ថាមិនអាចទៅរួចទេ ដោយសារតែប្រទេសរុស្ស៊ី និងអ៊ុយក្រែន ជាប្រទេសដែលកាន់សាសនាគ្រិស្ត ខណៈដែលបុរីវ៉ាទីកង់ គឺជាមជ្ឈមណ្ឌលនៃសាសនាកាតូលិក។
លោក Hakan Fidan ប្រមុខការទូតតួកគី ក្នុងដំណើរទស្សនកិច្ចរយៈពេលពីរថ្ងៃទៅកាន់ទីក្រុងមូស្គូ បានរំលឹកឡើងវិញនូវការប្ដេជ្ញាចិត្តរបស់តួកគី ក្នុងការសម្របសម្រួលសន្តិភាពពាក់ព័ន្ធនឹងដំណោះស្រាយបញ្ចប់សង្គ្រាមរវាងរុស្ស៊ី និងអ៊ុយក្រែន ដែលវាចូលដល់ឆ្នាំទី៤ ហើយនេះ៕
© 2025, . All rights reserved.