អង្គសមាជរដ្ឋសភា និងព្រឹទ្ធសភា នៅថ្ងៃទី២ ខែមិថុនា ឆ្នាំ២០២៥ នេះ បានបើកសមាជជាលើកដំបូងដោយបានសម្រេចជាឯកច្ឆន្ទ គឺ ១៨២សំឡេងគាំទ្រលោក ហ៊ុន ម៉ាណែត ប្ដឹងថៃ ពីបញ្ហាព្រំដែនទៅតុលាការអន្តរជាតិ (ICJ)។
លោក ហ៊ុន ម៉ាណែត ថ្លែងនៅក្នុងអង្គសមាជរដ្ឋសភា និងព្រឹទ្ធសភាលើកដំបូងនៅថ្ងៃទី២ មិថុនា នេះថា ទោះភាគីថៃ មិនព្រមឡើងទៅតុលាការយុត្តិធម៌អន្តរជាតិក៏ដោយ ក៏កម្ពុជានឹងប្តឹងករណីនៅតំបន់មុំបី ករណីប្រាសាទតាមាន់ធំ ប្រាសាទតាមាន់តូច និងករណីប្រាសាទតាក្របី ទៅកាន់តុលាការយុត្តិធម៌អន្តរជាតិដែរ។
លោក ហ៊ុន ម៉ាណែត អះអាងថា ការប្តឹងថៃ ជុំវិញជម្លោះព្រំដែនទៅតុលាការយុត្តិធម៌អន្តរជាតិនេះ គឺដើម្បីបញ្ចប់បញ្ហាព្រំដែនជាមួយប្រទេសថៃ កុំឱ្យកើតមានបន្តទៀត ហើយការដោះស្រាយតាមផ្លូវតុលាការអន្តរជាតិនេះ ក៏ដើម្បីកុំឲ្យប្រទេសទាំងពីរឈានដល់ការផ្ទុះអាវុធដាក់គ្នា និងធ្លាក់ចូលអន្ទាក់របស់ក្រុមជ្រុលនិយមផងដែរ។
លោក ហ៊ុន ម៉ាណែត អះអាងថា លោកបានបញ្ជាឲ្យគណៈកម្មការព្រំដែនចម្រុះ (JBC) របស់កម្ពុជា រៀបចំការប្រជុំជាមួយភាគីថៃ ជាបន្ទាន់ ដើម្បីដោះស្រាយបញ្ហាព្រំដែន និងបន្តការងារវាស់វែងខណ្ឌសីមា និងបោះបង្គោលព្រំដែនរវាងប្រទេសទាំងពីរ។
លោក ហ៊ុន ម៉ាណែត បញ្ជាក់ថា ទោះជាកម្ពុជាព្យាយាមដោះស្រាយបញ្ហាព្រំដែនដោយសន្តិវិធីតាមយន្តការបច្ចេកទេស និងច្បាប់អន្តរជាតិក៏ដោយ ក៏កម្ពុជានៅតែរក្សាសិទ្ធិក្នុងការការពារបូរណភាពទឹកដីរបស់ខ្លួនតាមគ្រប់មធ្យោបាយ រួមទាំងការប្រើប្រាស់កងកម្លាំងប្រដាប់អាវុធថែមទៀត ក្នុងករណីមានការព្យាយាមឈ្លានពានបូរណភាពទឹកដីកម្ពុជា ដោយការប្រើប្រាស់កម្លាំងកងទ័ពរបស់ថៃ មកលើកម្ពុជានោះ។
ចំណែកប្រធានព្រឹទ្ធសភា លោក ហ៊ុន សែន បានលើកឡើងក្នុងពិធីសមាជនេះដែរថា កម្ពុជាបានបាត់បង់ទឹកដីច្រើនណាស់មកហើយក្នុងប្រវត្តិសាស្ត្រ ហើយពេលនេះ កម្ពុជាសុំសិទ្ធិត្រឹមការពារទឹកដីដែលនៅសល់តែប៉ុណ្ណោះ ដោយមិនចង់បានដីរបស់បរទេសណាឡើយ។
លោក ហ៊ុន សែន បញ្ជាក់ថា កម្ពុជាគ្មានត្រូវការទឹកដីរបស់អ្នកណាទេ ក្នុងពេលដែលកម្ពុជាបានបាត់បង់ទឹកដីច្រើនណាស់ ប៉ុន្តែកម្ពុជាក៏មិនទាមទារយកទឹកដីទាំងនោះត្រឡប់មកវិញដែរ។ កម្ពុជាសុំរក្សាសិទ្ធិការពារទឹកដីរបស់ខ្លួនតែប៉ុណ្ណោះ គឺមិនអាចឱ្យអ្នកណាមកដណ្តើមយកទៀតឡើយ។
កាលពីថ្ងៃទី២៨ ខែឧសភា ឆ្នាំ២០២៥ កងទ័ពកម្ពុជា និងកងទ័ពថៃ បានប៉ះទង្គិចគ្នាមួយប្រាវនៅតំបន់មុំ៣ ដែលបណ្តាលឱ្យទាហានខ្មែរម្នាក់ស្លាប់បាត់បង់ជីវិត។
ជុំវិញបញ្ហានេះ អ្នកនាំពាក្យយោធាថៃ លោក វិនថៃ ស៊ូវ៉ារី កាលពីថ្ងៃទី១ មិថុនា បានចេញមុខអះអាងថា តំបន់មុំ៣ គឺជាកម្មសិទ្ធិរបស់ថៃ ព្រោះវាស្ថិតនៅក្នុងទឹកដីថៃ តាមច្បាប់អន្តរជាតិ ដោយច្រានចោលការលើកឡើងរបស់លោក ហ៊ុន សែន ដែលបានបញ្ជាក់ថាតំបន់មុំបី ស្ថិតនៅក្នុងទឹកដីខ្មែរនោះ។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន សរសេរលើទំព័រហ្វេសប៊ុករបស់ខ្លួននៅថ្ងៃទី២ មិថុនា នេះថា ការសម្រេចចិត្តរបស់លោក ហ៊ុន ម៉ាណែត បែបនេះ គឺជាអ្វីដែលកូនខ្មែរ និងពលរដ្ឋខ្មែរគ្រប់និន្នាការនយោបាយចង់បាន។
លោក អ៊ុំ សំអាន ជំរុញឱ្យលោក ហ៊ុន ម៉ាណែត ប្តឹងថៃ ទៅកាន់តុលាការអន្តរជាតិករណីកោះគុត ដែនសមុទ្រត្រួតស៊ីគ្នា កោះត្រល់ ប្រាសាទតាមាន់ធំ ប្រាសាទតាមាន់តូច ប្រាសាទតាក្របី តំបន់មុំបី និងតំបន់ច្រកអានសេះ បន្ថែមទៀត រួមទាំងដាក់សំណើទៅរដ្ឋសភា ដើម្បីធ្វើសច្ចាប័នលើច្បាប់សមុទ្រ (UNCLOS) ផងដែរ។
ចំណែកប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ក៏បានលើកឡើងនៅថ្ងៃទី២ មិថុនា នេះដែរថា ការសម្រេចចិត្តរបស់លោក ហ៊ុន ម៉ាណែត គឺជាអ្វីដែលកម្ពុជាត្រូវតែធ្វើ ព្រោះវាស្របតាមស្មារតីកិច្ចព្រមព្រៀងទីក្រុងប៉ារីសឆ្នាំ១៩៩១ ដែលថៃ ជាភាគីហត្ថលេខីដែរនោះ ហើយក៏វាស្របតាមសន្ធិសញ្ញាបារាំង-សៀម ឆ្នាំ១៩០៤ និងឆ្នាំ១៩០៧ រួមទាំងលិខិតុបករណ៍អន្តជាតិដែលពាក់ព័ន្ធជាច្រើនទៀតដែរ៕
© 2025, . All rights reserved.