ប្រធានសភាពាណិជ្ជកម្មអាមេរិកនៅកម្ពុជា លោក ខេស៊ី បាណេត (Casey Barnett) លើកឡើងថា អាមេរិកបានផ្តល់ទាំងជំនួយ និងប្រាក់កម្ចីដល់កម្ពុជា ប៉ុន្តែការផ្ដោតជាចម្បង គឺការបរិច្ចាគ ខណៈចិន ក៏បានផ្តល់ទាំងជំនួយ និងប្រាក់កម្ចីដល់កម្ពុជាដែរ ប៉ុន្តែផ្ដោតជាចម្បងគឺកម្ចី។
ប្រធានសភាពាណិជ្ជកម្មអាមេរិកនៅកម្ពុជា លោក ខេស៊ី បាណេត (Casey Barnett) សរសេរលើគណនីហ្វេសប៊ុករបស់ខ្លួននៅថ្ងៃទី៣ មិថុនា នេះថា ទាំងអាមេរិក និងចិន សុទ្ធតែបានផ្តល់ប្រាក់កម្ចី និងអំណោយចម្រុះដល់កម្ពុជា ក្នុងនោះជំនួយរបស់សហរដ្ឋអាមេរិកចាប់តាំងពីអំឡុងឆ្នាំ១៩៩០ មក គឺផ្ដោតលើការបរិច្ចាគជាចម្បង ប៉ុន្តែក៏នៅតែមានកម្ចីដែលនៅសល់ពីមុនដែរ។
ប្រធានសភាពាណិជ្ជកម្មអាមេរិកដដែលនេះ អះអាងថា ចំណែកចិន វិញ ចាប់តាំងពីឆ្នាំ២០០០ មក ជំនួយរបស់ចិន ភាគច្រើនជាប្រាក់កម្ចី ប៉ុន្តែថ្មីៗនេះ ជំនួយទាំងនោះបានរួមបញ្ចូលនូវការបរិច្ចាគកាន់តែច្រើន និងការវិនិយោគភាគហ៊ុនដែលហាក់ដូចជាចិន មានស្មារតីមិនចង់ឲ្យកម្ពុជាជំពាក់បំណុលខ្លួនកាន់តែច្រើន។
លោក ខេស៊ី បាណេត បញ្ជាក់ថា ជំនួយរបស់ចិន និងប្រាក់កម្ចីរបស់ចិន ទាំងនោះ រួមមានលុយ អាវុធ សម្ភារៈ សម្លៀកបំពាក់ និងផ្នែកខាងវិស្វកម្មផងដែរ។
យោងតាមរបាយការណ៍សភាពាណិជ្ជកម្មអាមេរិកនៅកម្ពុជា បង្ហាញនៅថ្ងៃទី៣ មិថុនា នេះថា ចាប់ពីឆ្នាំ១៩៩០ ដល់ឆ្នាំ២០២៤ សហរដ្ឋអាមេរិក បានផ្តល់ជំនួយដល់ប្រទេសកម្ពុជា មានទំហំទឹកប្រាក់ជាង ៤ពាន់លានដុល្លារអាមេរិក (៤៥២៧លានដុល្លារ) ដោយឡែកក្នុងឆ្នាំ២០២៤ កន្លងទៅ អាមេរិកក៏បានផ្តល់ជំនួយដល់កម្ពុជាប្រមាណជា ៥៥លានដុល្លារអាមេរិកដែរ។
របាយការណ៍ដដែលបញ្ជាក់ថា ចំណែកជំនួយចិន វិញ បើគិតចាប់តាំងពីឆ្នាំ១៩៩០ ដល់ឆ្នាំ២០២៤ ចិន បានផ្តល់ជំនួយដល់កម្ពុជាក្នុងទំហំទឹកប្រាក់ជាង ១០ពាន់លានដុល្លារអាមេរិកហើយ (១១៨៦៨លានដុល្លារ)។
យ៉ាងណាក៏ដោយ ក្រសួងសេដ្ឋកិច្ចកម្ពុជា បង្ហាញថា គិតត្រឹមត្រីមាសទី៤ ឆ្នាំ២០២៤ កម្ពុជាជំពាក់បំណុលជាង ៤ពាន់លានដុល្លារអាមេរិក ឬស្មើនឹង ៣៤% នៃបំណុលក្រៅប្រទេសសរុប ក្នុងន័យនេះគឺបង្ហាញថា ចិនគឺជាម្ចាស់បំណុលធំជាងគេរបស់កម្ពុជាក្នុងក្របខ័ណ្ឌឥណទានទ្វេភាគី។
ចាប់តាំងពីមានកិច្ចព្រមព្រៀងសន្តិភាពទីក្រុងប៉ារីសមក កម្ពុជាបានទទួលការជ្រោមជ្រែងតាមរយៈជំនួយផ្សេងៗពីសហរដ្ឋអាមេរិកជាបន្តបន្ទាប់ ដើម្បីធ្វើឱ្យកម្ពុជាបានប្រសើរឡើងនូវសេដ្ឋកិច្ច សង្គមកិច្ច និងលទ្ធិប្រជាធិបតេយ្យ ជាដើម លើវិស័យផ្សេងៗ ដូចជា វិស័យកសិកម្ម បរិស្ថាន សេដ្ឋកិច្ច សន្តិសុខស្បៀង សុខភាពសាធារណៈ និងវិស័យអប់រំផងដែរ។
ក្រៅពីជំនួយជាថវិកាសម្រាប់ជួយលើវិស័យនានាដល់កម្ពុជា អាមេរិកក៏បានផ្តល់ជំនួយតាមរយៈនៃការផ្តល់ទីផ្សារនាំចេញយ៉ាងធំធេងដែរ ដែលកម្ពុជាអាចនាំចេញទំនិញទៅកាន់ទីផ្សារអាមេរិករហូតដល់ប្រមាណជា ១០ពាន់លានដុល្លារក្នុងមួយឆ្នាំៗ។ បន្ថែមពីនេះ ក៏បានផ្តល់ប្រព័ន្ធអនុគ្រោះពន្ធ GSP សម្រាប់កម្ពុជាថែមទៀត៕
© 2025, . All rights reserved.