ប្រធានព្រឹទ្ធសភា និងជាប្រធានគណបក្សប្រជាជនកម្ពុជា លោក ហ៊ុន សែន ជំរុញឱ្យមានការព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលវៀតណាម ក្នុងការបោះបង្គោលព្រំដែនដែលនៅសេសសល់ ១៦% ឲ្យបានឆាប់នាពេលខាងមុខ។
លោក ហ៊ុន សែន ថ្លែងនៅក្នុងពិធីជួបជាមួយអនុរដ្ឋមន្ត្រីក្រសួងការពារជាតិវៀតណាម លោក ង្វៀន តិនគឿង (Nguyen Tan Cuong) នៅថ្ងៃទី៤ ខែមិថុនា ជុំវិញដំណើរទស្សនកិច្ចផ្លូវការរបស់មន្ត្រីជាន់ខ្ពស់វៀតណាម នៅប្រទេសកម្ពុជា ក្នុងពេលនេះ។
មេដឹកនាំបក្សកាន់អំណាចរូបនេះ អះអាងថា ទំនាក់ទំនងកម្ពុជា-វៀតណាម កាន់តែរឹងមាំ និងស្អិតល្មួតផ្អែកលើស្មារតីមិត្តភាពជាប្រពៃណី សាមគ្គីភាព ភាពជាអ្នកជិតខាងល្អ និងកិច្ចសហប្រតិបត្តិការឈ្នះឈ្នះលើគ្រប់វិស័យ ជាពិសេសក្នុងវិស័យកងទ័ពរបស់ប្រទេសទាំងពីរ។
លោក ហ៊ុន សែន បញ្ជាក់ថា សម្រាប់ទិវាខួប ៥០ឆ្នាំនៃថ្ងៃរំដោះវៀតណាមភាគខាងត្បូង នាពេលខាងមុខនេះ លោកនឹងទៅចូលរួមដោយផ្ទាល់។ លោកថា វត្តមានរបស់លោកចូលរួមដោយផ្ទាល់នេះ ក៏ដើម្បីរំលឹកខួបប្រវត្តិសាស្ត្រលើកទី៤៨ឆ្នាំពេលដែលលោកធ្វើដំណើរចូលទៅសុំជំនួយពីប្រទេសវៀតណាម ឱ្យជួយរំដោះប្រទេសជាតិពីរបបប្រល័យពូជសាសន៍ ប៉ុល ពត ដែរ។
អនុរដ្ឋមន្ត្រីក្រសួងការពារជាតិវៀតណាម លោក ង្វៀន តិនគឿង (Nguyen Tan Cuong) បានធ្វើដំណើរទស្សនកិច្ចផ្លូវការទៅកាន់ប្រទេសកម្ពុជារយៈពេល ៣ថ្ងៃ ចាប់ពីថ្ងៃទី៣ ដល់ថ្ងៃទី៦ ខែមិថុនា ដែលត្រូវជួបជាមួយអគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន លោក ហ៊ុន ម៉ាណែត និងប្រធានព្រឹទ្ធសភា លោក ហ៊ុន សែន ផងដែរ។
ក្នុងជំនួបនេះ លោក ង្វៀន តិនគឿង បញ្ជាក់ថា រដ្ឋាភិបាលវៀតណាម គ្រោងនឹងសាងសង់ស្តូបមិត្តភាពកម្ពុជា-វៀតណាម នៅក្នុងសារមន្ទីរជាតិរបស់វៀតណាម ដើម្បីបង្ហាញសាធារណមតិជាតិ និងអន្តរជាតិ ឱ្យបានយល់កាន់តែស៊ីជម្រៅពីទំនាក់ទំនងដ៏ស្អិតល្មួតរវាងកម្ពុជា និងវៀតណាម នៅគ្រប់កាលៈទេសៈ ជាពិសេសក្នុងវិស័យកងទ័ពនៃប្រទេសទាំងពីរ ដែលបានរួមគ្នាប្រឆាំងតវ៉ានឹងរបបអាណានិគមក្នុងអតីតកាលនោះ។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី៤ មិថុនា នេះ ដោយចាត់ទុកការពន្លឿននៃការបោះបង្គោលព្រំដែនដែលនៅសេសសល់ ១៦% ដោយមិនប្តឹងវៀតណាម ទៅតុលាការយុត្តិធម៌អន្តរជាតិ (ICJ) គឺជាការកាត់ដីខ្មែរបន្ថែមទៀតទៅឱ្យវៀតណាម ប៉ុណ្ណោះ។
លោក អ៊ុំ សំអាន ជំរុញឱ្យលោក ហ៊ុន ម៉ាណែត ដាក់សំណើទៅរដ្ឋសភា ដើម្បីធ្វើសច្ចាប័នលើច្បាប់សមុទ្រ (UNCLOS) ហើយបន្ទាប់មក ត្រូវសើរើការបោះបង្គោលព្រំដែនចំនួន ៨៤% ឡើងវិញ ព្រោះការបោះបង្គោលព្រំដែននាពេលកន្លងមកនោះ បានធ្វើឱ្យកម្ពុជាបាត់បង់ទឹកដីទៅវៀតណាម ទាំងស្រុង៕
© 2025, . All rights reserved.