នៅក្នុងរាជាណាចក្រអច្ឆរិយខ្មែរ មានបនល្បែងស៊ីសង កាស៊ីណូ ដែលភាសាអ៊ីតាលីប្រែថា កូនផ្ទះតូចៗតាមស្រុកស្រែ ចំនួនជិត ១៥០ ទីប្រជុំជនលេងល្បែងស៊ីសង មកទល់ខែមីនា ឆ្នាំ២០២៥។ ក្នុងចំនួននេះ ប្រមាណ ១០០កាស៊ីណូ សង់នៅតាមខេត្តជាប់ឆ្នេរសមុទ្រ ៤៨នៅក្នុងខេត្តជាប់ព្រំដែនថៃ និងមួយចំនួនសេសសល់ នៅតាមខេត្តជាប់ព្រំដែនយៀកណាម។
តាមការសិក្សាស្រាវជ្រាវពីកងកម្លាំងសន្តិសុខសាធារណៈអាមេរិកាំងនៃក្រសួងយុត្តិធម៌ តាមរយៈកិច្ចសម្ភាសន៍ជាមួយអ្នកទោសទាក់ទងនឹងល្បែងស៊ីសង គេរកឃើញថា ទីណាមានកាស៊ីណូបើកល្បែងស៊ីសងក្នុងរយៈពេលបីឆ្នាំ បរិមាណឧក្រិដ្ឋកម្មកើនឡើងពីរទៅបីដងនៅទីនោះ។
ជំទាវ ប៊ុន រ៉ានី ភរិយាលោក ហ៊ុន សែន និងជំទាវកូនប្រសា ពេជ ចន្ទមុន្នី ភរិយាលោក ហ៊ុន ម៉ាណែត ត្រូវបានគេរកឃើញថាមានជាប់ពាក់ព័ន្ធនឹងការទទួលប្រាក់មិនស្របច្បាប់រាប់លានដុល្លារអាមេរិកតាមរយៈប្រាក់ឧបត្ថម្ភកាកបាទក្រហមពីក្រុមឧកញ៉ា និងក្រុមហ៊ុនជាច្រើនដែលរកស៊ីពាក់ព័ន្ធនឹងអំពើឧក្រិដ្ឋនៅក្នុងប្រទេសកម្ពុជា។
នេះចោទជាសំណួរក្នុងមជ្ឈដ្ឋានសាធារណជនខ្មែរ និងបរទេស ថាតើអំណោយពីទាយកទាយិកាដល់កាកបាទក្រហមកម្ពុជា ជាអំណោយពីសប្បុរសជនក្នុងមុខរបរប្រកបដោយសមាចារ សម្មាអាជីវៈ តាមកុសលកម្ម (កុសៈលៈ) ឬអកុសលកម្មបថ។ តើមានអង្គការ អង្គភាព ឬស្ថាប័នណាមើលខុសត្រូវលើកាកបាទក្រហមកម្ពុជា? តើអំណោយនានាដល់កាកបាទក្រហមកម្ពុជា ជាអំណោយទានសីលធម៌ ឬជាការបង់ប្រចាំខែ ឬប្រចាំឆ្នាំពីអាជីវកររកស៊ីក្នុងស្រុកខ្មែរ?
គេហទំព័រគោព្រៃ (Kouprey) ចេញសេចក្តីរាយការណ៍ស៊ើបអង្កេតពិសេសរបស់ខ្លួននៅថ្ងៃទី៧ មិថុនា នេះ ស្ដីពីការចងក្រងឯកសារជាច្រើនតាមរយៈការស្រាវជ្រាវពីបណ្ដាញសារព័ត៌មាននៃរាជរដ្ឋាភិបាលជុំវិញការផ្តល់ប្រាក់អំណោយឧបត្ថម្ភពីក្រុមឧកញ៉ា ដល់កាកបាទក្រហម ដោយដាក់ចំណងជើងថា «អំណោយកាកបាទក្រហមពីក្រុមឧកញ៉ាបោកប្រាស់នៅ (ប្រទេស) កម្ពុជា»។
ប្រភពដដែលអះអាងថា ក្រុមឧកញ៉ាបោកប្រាស់ដែលស្និទ្ធនឹងក្រុមគ្រួសារលោក ហ៊ុន សែន ដូចជា ឧកញ៉ា លី យ៉ុងផាត់ ឧកញ៉ា ម៉ុង ឫទ្ធី និងទេសាភិបាលរងធនាគារជាតិនៃកម្ពុជា អ្នកស្រី អ៊ុក ម៉ាលី ជាដើម សុទ្ធតែត្រូវបានរកឃើញថាបានជាប់ពាក់ព័ន្ធក្នុងការផ្តល់លុយដល់កាកបាទក្រហមដែលគេសង្ស័យថាលុយមិនស្របច្បាប់។
គេហទំព័រដដែលបានរកឃើញថា ក្រុមឧកញ៉ាទាំងនេះបានឧបត្ថម្ភលុយដល់កាកបាទក្រហមប្រមាណជា ១០លានដុល្លារអាមេរិកក្នុងឆ្នាំ២០២៥ នេះ ក្នុងនោះ សមាគមឧកញ៉ាកម្ពុជាដែលដឹកនាំដោយលោក លី យ៉ុងផាត់ បានបរិច្ចាគថវិកាជិត ២លានដុល្លារអាមេរិក (១,៧លានដុល្លារ) ខណៈឧកញ៉ា ឡេង ណាវ៉ាត្រា ក៏បានផ្តល់ថវិកាជាង ១លានដុល្លារអាមេរិកដែរ (១,៤លានដុល្លារ)។
ជាងនេះទៀត អ្នកឧកញ៉ា គិត ស៊ូឡា កូនប្រុសរបស់អ្នកឧកញ៉ា គិត ម៉េង ម្ចាស់ក្រុមហ៊ុន Royal Group បានផ្តល់ថវិកាជាង ១លានដុល្លារអាមេរិក (១០៩៩៩៩៩ដុល្លារ)។ ក្រុមហ៊ុន ជីប ម៉ុង គ្រុប បានផ្តល់ប្រាក់ចំនួន ១លានដុល្លារអាមេរិក។ នាយកប្រតិបត្តិក្រុមហ៊ុន Prince Group ជនជាតិចុបសញ្ជាតិខ្មែរ លោក ចេន ហ្ស៊ី (Chen Zhi) បានផ្តល់ប្រាក់ចំនួន ៥សែនដុល្លារអាមេរិក ក្នុងនោះ ចន្លោះពីឆ្នាំ២០២០ ដល់ឆ្នាំ២០២៤ ត្រូវគេរកឃើញថា ទីប្រឹក្សាលោក ហ៊ុន សែន រូបនេះបានផ្តល់ប្រាក់រហូតដល់ ២លានដុល្លារអាមេរិកឯណោះ។
ដោយឡែកឧកញ៉ា ទ្រី ភាព បានផ្តល់ប្រាក់ចំនួន ៣សែនដុល្លារអាមេរិក។ ឧកញ៉ា កុក អាន សមាជិកព្រឹទ្ធសភា និងជាម្ចាស់មជ្ឈមណ្ឌលឆបោក Crown complex ក៏បានផ្តល់ប្រាក់ចំនួន ៥ម៉ឺនដុល្លារអាមេរិកដែរ។
ក្រៅពីឧកញ៉ាខ្មែរ ក៏មានជនបរទេសដែលមានក្រុមហ៊ុននៅកម្ពុជាដែលពាក់ព័ន្ធនឹងអំពើឧក្រិដ្ឋជាច្រើនទៀតដែរ ដូចជា ជនជាតិភូមា លោក Aik Paung បានផ្តល់ប្រាក់ចំនួន ៥ម៉ឺនដុល្លារ និងសណ្ឋាគារឈ្មោះ Xihu ដែលស្ថិតក្រោមឈ្មោះរបស់គាត់ ក៏បានផ្តល់ប្រាក់ ១ម៉ឺនដុល្លារអាមេរិកដែរ។
ជាងនេះទៀត នាយកប្រតិបត្តិកាស៊ីណូឈ្មោះ Yong Yuan Bavet Casino ដែលត្រូវបានគេស្គាល់ថា Bavet Moc Bai បានផ្តល់ប្រាក់ចំនួន ២ម៉ឺនដុល្លារអាមេរិក។
លោក Li Kuong នាយកប្រតិបត្តិក្រុមហ៊ុនឆបោក Huang Le Casino បានផ្តល់ប្រាក់ចំនួន ១ម៉ឺនដុល្លារអាមេរិក។ សណ្ឋាគារ KB ឬ Kaibo Hotel បានផ្តល់ប្រាក់ចំនួន ៥ម៉ឺនដុល្លារ ខណៈសណ្ឋាគារនេះត្រូវបានរដ្ឋាភិបាលចក្រភពអង់គ្លេស ដាក់ទណ្ឌកម្មកាលពីឆ្នាំ២០២៣ កន្លងទៅ។
ក្រុមហ៊ុន White Sand Group ដែលត្រូវគេរាយការណ៍ថាជាមជ្ឈមណ្ឌលជួញដូរមនុស្ស បានផ្តល់ប្រាក់ចំនួន ១ម៉ឺនដុល្លារអាមេរិក ខណៈប្រធានក្រុមហ៊ុន Lixin Group គឺលោក ហ៊ុន តូ ក៏បានផ្តល់ប្រាក់ចំនួន ៥ពាន់ដុល្លារដែរ។
ក្រៅពីនេះ ជនបរទេសដែលពាក់ព័ន្ធនឹងការបោកប្រាស់ រួមទាំងអំពើឧក្រិដ្ឋកម្មផ្សេងៗ កាស៊ីណូជាច្រើនផ្សេងទៀត ក៏ត្រូវគេរកឃើញថាជាប្រភពចំណូលនៃមូលនិធិកាកបាទក្រហមដែរ ដូចជា កាស៊ីណូ Holiday Palace, កាស៊ីណូ Kampong Dewa កាស៊ីណូ Power Long Casino កាស៊ីណូ Jin Bei 3 កាស៊ីណូ Triumph International និងកាស៊ីណូ Atlantic Entertainment City ជាដើម។
បន្ថែមពីនេះ ក៏មានកាស៊ីណូ New Venetian កាស៊ីណូ Siha Treasure កាស៊ីណូ Venus Casino និងកាស៊ីណូ Golden Galaxy រួមទាំងកាស៊ីណូជាច្រើនផ្សេងទៀតផងដែរ ដែលបានផ្តល់ប្រាក់ដល់អង្គការសប្បុរសធម៌មួយនេះ ចន្លោះពី ៥០០ដុល្លារទៅ ៥សែនដុល្លារអាមេរិក។
ក្រៅពីក្រុមឧកញ៉ា ក្រុមឧក្រិដ្ឋជន និងក្រុមហ៊ុនកាស៊ីណូដែលបានរាប់មកនេះ មន្ត្រីរដ្ឋាភិបាលកម្ពុជាជាច្រើន ក៏ត្រូវរកឃើញថាបានចូលរួមល្បែងផ្តល់លុយទៅឱ្យកាកបាទក្រហមនេះដែរ ដែលមានទឹកប្រាក់ចន្លោះពី ១ពាន់ដុល្លារអាមេរិកដល់ ១សែនដុល្លារអាមេរិក។ ជាក់ស្តែង មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា ក៏បានផ្តល់ប្រាក់ឧបត្ថម្ភចំនួន ២ម៉ឺន ៥ពាន់ដុល្លារអាមេរិកដែរ (២៥០០០ដុល្លារ)។
ជុំវិញបញ្ហានេះ គេសង្កេតឃើញថា ក្រុមឧកញ៉ា ជនបរទេស រួមទាំងក្រុមហ៊ុន និងបនល្បែងកាស៊ីណូរកស៊ីខុសច្បាប់ដែលកំពុងដំណើរការនៅប្រទេសកម្ពុជារហូតមកនោះ តែងតែផ្តល់ប្រាក់ឧបត្ថម្ភដល់កាកបាទក្រហម ដែលដឹកនាំដោយអ្នកស្រី ប៊ុន រ៉ានី ជារៀងរាល់ឆ្នាំ ដើម្បីមានសិទ្ធិអំណាចក្នុងការបន្តអាជីវកម្ម និងដំណើរការរបស់ខ្លួនដោយគ្មានការរំខានបន្តទៀត។
កាកបាទក្រហមកម្ពុជា ដែលដឹកនាំដោយភរិយាមេដឹកនាំបក្សកាន់អំណាច លោក ហ៊ុន សែន គឺអ្នកស្រី ប៊ុន រ៉ានី ត្រូវគេរកឃើញថាកំពុងបម្រើផលប្រយោជន៍ឱ្យគណបក្សប្រជាជនកម្ពុជា ជាជាងអនុវត្តកម្មវិធីសប្បុរសធម៌ដល់ប្រជាពលរដ្ឋទូទៅ៕
© 2025, . All rights reserved.