មេដឹកនាំបក្សកាន់អំណាច លោក ហ៊ុន សែន ចាត់ទុកទង្វើសកម្មជនបក្សប្រឆាំងដែលសម្ដែងអំពីការដកទ័ពកម្ពុជានៅតំបន់មុំ៣ ជាអំពើក្បត់ជាតិ ដែលគប់គិតជាមួយប្រទេសថៃ ឈ្លានពានទឹកដីខ្មែរ ដោយលោកស្នើឱ្យរដ្ឋាភិបាលថៃ ចាប់បញ្ជូនខ្លួនសកម្មជនរូបនោះទៅកម្ពុជាវិញ ដើម្បីចាត់វិធានការតាមផ្លូវច្បាប់។
ប្រធានព្រឹទ្ធសភា លោក ហ៊ុន សែន បានសរសេរលើទំព័រហ្វេសប៊ុករបស់លោកនៅថ្ងៃទី១០ មិថុនា នេះថា ប្រសិនបើអាជ្ញាធរថៃ មិនបានគប់គិតជាមួយសកម្មជនបក្សប្រឆាំងដែលសម្ដែងសកម្មភាពដកទ័ពដើម្បីចំអកឱ្យរដ្ឋាភិបាលកម្ពុជាទេ អាជ្ញាធរថៃ គួរតែក្លាហានចាប់ជននេះបញ្ជូនឲ្យអាជ្ញាធរកម្ពុជា ដើម្បីចាត់វិធានការតាមផ្លូវច្បាប់។
លោក ហ៊ុន សែន បញ្ជាក់ថា អំពើក្បត់ជាតិដែលសកម្មជនបក្សប្រឆាំងរូបនេះបានប្រព្រឹត្ត គឺដូចគ្នាទៅនឹងសកម្មភាពមេដឹកនាំរបស់គេដែរ។ លោកបន្តថា ក្នុងពេលដែលប្រទេសជាតិកំពុងប្រឈមមុខជាមួយនឹងការឈ្លានពានរបស់បរទេស ពួកគេនៅតែគប់គិតជាមួយបរទេសមកបំផ្លាញខ្មែរដដែល។
វីដេអូយុវជនម្នាក់ដែលហៅរហស្សនាមខ្លួនឯងថា «០៩ មុំ៣» ដោយស្លៀកសម្លៀកបំពាក់កងទ័ពកម្ពុជា និងសម្ដែងធ្វើជាទទួលបញ្ជាពីថ្នាក់លើឱ្យដកកងទ័ពនៅតំបន់មុំ៣ ត្រូវបានផ្សព្វផ្សាយលើបណ្ដាញទំនាក់ទំនងសង្គមយ៉ាងព្រោងព្រាត។
ក្នុងវីដេអូដែលត្រូវបានផ្សព្វផ្សាយ យុវជនរូបនោះបាននិយាយពីការដកកងទ័ពចេញពីតំបន់មុំ៣ និងនិយាយថា រថពាសដែក ឬរថក្រោះគ្មានម៉ាស៊ីន មានតែកាណុង ត្រូវបញ្ជូនត្រឡប់ទៅបន្ទាយវិញ ជាដើម។
បន្ទាប់ពីវីដេអូនេះត្រូវបានចែកចាយតៗគ្នា អគ្គស្នងការនគរបាលជាតិ បានចេញសេចក្តីប្រកាសព័ត៌មាននៅថ្ងៃទី១០ មិថុនា នេះថា សកម្មជនគណបក្សប្រឆាំង និងជាប្រធានបណ្ដាញយុវជនកម្ពុជាសកលប្រចាំប្រទេសថៃ ឈ្មោះ អែម ពិសិដ្ឋ បានក្លែងបន្លំស្លៀកឯកសណ្ឋានកងទ័ព ហើយថតវីដេអូប្រឌិតព័ត៌មានសភាពការណ៍តាមព្រំដែន នាំឲ្យមានការយល់ច្រឡំ ដើម្បីបំបាក់ទឹកចិត្តកងទ័ពកម្ពុជា។
ប្រភពដដែលបញ្ជាក់ថា បុគ្គលដែលសម្ដែងពាក់ឯកសណ្ឋានកងទ័ពក្លែងក្លាយខុសច្បាប់ឈ្មោះ អែម ពិសិដ្ឋ មានស្រុកកំណើតនៅភូមិចំការអណ្ដូង ឃុំចំការអណ្ដូង ស្រុកចំការលើ ខេត្តកំពង់ចាម បច្ចុប្បន្នស្នាក់នៅក្នុងប្រទេសថៃ ដែលតែងតែប្រើប្រាស់បណ្ដាញសង្គមផ្សព្វផ្សាយបង្ហោះខ្លឹមសារប្រឌិតអវិជ្ជមានជាច្រើនក្នុងគោលដៅប្រឆាំងរាជរដ្ឋាភិបាលកម្ពុជា។
ជុំវិញបញ្ហានេះ រដ្ឋមន្ត្រីក្រសួងការពារជាតិ លោក ទៀ សីហា សរសេរលើទំព័រហ្វេសប៊ុករបស់ខ្លួននៅថ្ងៃទី១០ មិថុនា នេះ ដោយចាត់ទុកទង្វើរបស់យុវជនរូបនោះជាការញុះញង់ធ្វើបាបខ្មែរ ព្រោះកម្ពុជាក៏មិនបានដកកងទ័ពដូចការចុះផ្សាយលើបណ្ដាញទំនាក់ទំនងសង្គមឡើយ។
រយៈពេលពីរថ្ងៃចុងក្រោយនេះ ព័ត៌មានថៃ បានចុះផ្សាយព្រោងព្រាតថា កងទ័ពកម្ពុជា និងកងទ័ពថៃ ដែលប្រឈមមុខដាក់គ្នានៅតំបន់មុំ៣ បានឯកភាពគ្នាដកកងទ័ពចេញពីទីតាំងជម្លោះប្រមាណ ២០០ម៉ែត្រ។ ជាងនេះទៅទៀត ក៏មានការចែកចាយពីស្នាមលុបលេណដ្ឋានរបស់កងទ័ពកម្ពុជាដែរ។
ទាក់ទិននឹងបញ្ហានេះ មេដឹកនាំក្រុមអាវលឿងប្រឆាំងរដ្ឋាភិបាលថៃ លោក ស៊ុនធិលឹម ថងគុណ បានអះអាងក្នុងវីដេអូឃ្លីបមួយដែលត្រូវបានផ្សព្វផ្សាយកាលពីពេលថ្មីៗនេះថា អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ បាននិយាយតាមទូរសពុ្ទជាមួយលោក ហ៊ុន សែន ដោយស្នើឱ្យកម្ពុជាដកទ័ពខ្មែរចេញពីតំបន់មុំបី។
លោក ស៊ុនធិលឹម ថងគុណ អះអាងថា ការធ្វើបែបនេះ ដោយសារតែលោក ថាក់ស៊ីន ខ្លាចក្រុមយោធាថៃ ធ្វើរដ្ឋប្រហារទម្លាក់កូនស្រីរបស់គាត់ គឺអ្នកស្រី ផែថងថាន ស៊ីណាវ៉ាត់ ពីតំណែងជានាយករដ្ឋមន្ត្រី។
ទោះជាយ៉ាងណាក៏ដោយ ការអះអាងនេះ គេនៅមិនទាន់ឃើញលោក ហ៊ុន សែន និងលោក ថាក់ស៊ីន ប្រតិកម្មនៅឡើយទេ៕
© 2025, . All rights reserved.