ក្រុមអង្គការសង្គមស៊ីវិលជិត ១០ស្ថាប័ន អំពាវនាវឱ្យរដ្ឋាភិបាលកម្ពុជាដោះលែងសកម្មជនសិទ្ធិមនុស្ស កញ្ញា សេង ធារី ឱ្យមានសេរីភាពឡើងវិញដោយឥតលក្ខខណ្ឌ បន្ទាប់ពីកញ្ញាបានធ្វើកូដកម្មបង្អត់អាហារខ្លួនឯងក្នុងពន្ធនាគាររយៈពេល ១៤ថ្ងៃ ដើម្បីបង្ហាញពីការឃុំខ្លួន ៣ឆ្នាំដោយអយុត្តិធម៌។
អង្គការសង្គមស៊ីវិលចំនួន ៦ស្ថាប័ន រួមមានមជ្ឈមណ្ឌលសិទ្ធិមនុស្សកម្ពុជា (CCHR) សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) និងអង្គការសម្ព័ន្ធខ្មែរជំរឿន និងការពារសិទ្ធិមនុស្សលីកាដូ (LICADHO) ជាដើម បានចេញសេចក្តីថ្លែងការណ៍រួមគ្នានៅថ្ងៃទី១១ មិថុនា នេះថា ក្រុមអង្គការសង្គមស៊ីវិលពិតជាមានការព្រួយបារម្ភពីសុខភាពកញ្ញា សេង ធារី យ៉ាងខ្លាំង ដោយអត់ទទួលទានអាហារចាប់ពីថ្ងៃទី១ រហូតដល់ថ្ងៃទី១៤ ខែមិថុនា។
ប្រភពដដែលអះអាងថា ការធ្វើកូដកម្មនេះធ្វើឡើងក្នុងគោលបំណងដើម្បីឱ្យមានការយកចិត្តទុកដាក់ចំពោះការឃុំកញ្ញាផ្ទាល់ផង ហើយក៏ដើម្បីអំពាវនាវឱ្យមានការដោះលែងសកម្មជននយោបាយ និងអ្នកការពារសិទ្ធិមនុស្សទាំងអស់ ដែលអាជ្ញាធរឃុំខ្លួនក្នុងពន្ធនាគារដោយអយុត្តិធម៌ផងដែរ។
ក្រុមអង្គការក្រៅរដ្ឋាភិបាលទាំងនេះ បញ្ជាក់ថា ផលប៉ះពាល់នៃការបង្អត់អាហារខ្លួនឯងទៅលើសុខុមាលភាពរបស់កញ្ញា សេង ធារី អាចមានទំហំធំធេង រីឯការបន្តឃុំខ្លួនកញ្ញាពីសំណាក់តុលាការក៏កាន់តែធ្វើឱ្យបញ្ហាសុខភាពរបស់កញ្ញាកាន់តែធ្ងន់ធ្ងរឡើងៗដែរ។
អង្គការសង្គមស៊ីវិលទាំងនេះសង្ឃឹមថា កូដកម្មបង្អត់អាហាររបស់កញ្ញា នឹងនាំមកនូវយុត្តិធម៌ចំពោះសកម្មជននយោបាយ និងអ្នកការពារសិទ្ធិមនុស្សគ្រប់រូបទាំងអស់ ដែលត្រូវបានជាប់ឃុំយ៉ាងអយុត្តិធម៌ក្នុងពន្ធនាគារនាពេលកន្លងមកនោះ ខណៈពួកគេនឹងបន្តឈរជាមួយនឹងកញ្ញា សេង ធារី ជានិច្ច។
សកម្មជនសិទ្ធិមនុស្ស កញ្ញា សេង ធារី និងជាមេធាវីអន្តរជាតិសញ្ជាតិខ្មែរ-អាមេរិកាំង ត្រូវបានតុលាការក្រុងភ្នំពេញ ផ្ដន្ទាទោសដាក់ពន្ធនាគាររយៈពេល ៦ឆ្នាំ ពីបទ «ញុះញង់ និងរួមគំនិតក្បត់» កាលពីថ្ងៃទី១៤ ខែមិថុនា ឆ្នាំ២០២២ ខណៈដែលកញ្ញាកំពុងតវ៉ាដោយអហិង្សាចំពោះបទចោទទាំងអយុត្តិធម៌មកលើខ្លួននៅមុខតុលាការ។ កញ្ញា សេង ធារី បានធ្វើកូដកម្មបង្អត់អាហារ ៤លើកហើយចាប់ពីឆ្នាំ២០២២ ដល់ឆ្នាំ២០២៥ នេះ បន្ទាប់ពីតុលាការឃុំខ្លួនក្នុងពន្ធនាគារខេត្តព្រះវិហារ។
ទាក់ទិននឹងបញ្ហានេះ អង្គការ Freedom House បានចាត់ទុកកម្ពុជាជាប្រទេសផ្ដាច់ការមួយក្នុងចំណោមប្រទេសផ្ដាច់ការធំៗ ៥ ផ្សេងទៀត រួមមានភូមា ចិន និងរុស្ស៊ី ជាដើម ព្រោះតែប្រទេសនេះបានប្រើវិធានការគាបសង្កត់សិទ្ធិសេរីភាពរបស់ប្រជាពលរដ្ឋឥតស្រាកស្រាន្ត៕
© 2025, . All rights reserved.