នៅម៉ោង ៤ទៀបភ្លឺចូលដល់ថ្ងៃសុក្រ ទី១៣ មិថុនា កងយន្តហោះអ៊ីស្រាអែល បើកប្រតិបត្តិការទ្រង់ទ្រាយធំ ដោយបញ្ចេញយន្តហោះ ២០០គ្រឿង វាយប្រហារលើ ១០០គោលដៅជាមួយនឹងការទម្លាក់គ្រាប់បែក ៣៣០គ្រាប់ វាយប្រហារពាសពេញប្រទេសអ៊ីរ៉ង់។
នេះបើអ្នកនាំពាក្យកងកម្លាំងអ៊ីស្រាអែល Effie Defrin ដែលបានបញ្ជាក់ដូចនេះក្នុងសន្និសីទសារព័ត៌មានដែលធ្វើសេចក្ដីរាយការណ៍បន្តដោយបណ្ដាញផ្សាយព័ត៌មាន CNN។
ក្នុងសន្និសីទកាសែត លោក Defrin អះអាងថា អ៊ីស្រាអែលបានសម្លាប់ឧត្ដមសេនីយ៍កំពូលៗរបស់អ៊ីរ៉ង់ រួមមានមេទ័ព Mohammad Bagheri មេឆ្មាំបដិវត្ត Hossein Salami និងប្រមុខទីបញ្ជាការកណ្តាល Khatam-al Anbiya លោក Gholam Ali Rashid។
តាមអ្នកនាំពាក្យរូបនេះ កងយន្តហោះចម្បាំងអ៊ីស្រាអែល ក៏បានសម្លាប់អ្នកវិទ្យាសាស្ត្រនុយក្លេអ៊ែរអ៊ីរ៉ង់ បាន ៦នាក់ ក្នុងនោះមានលោក FereAbbasi ជាប្រធានអង្គការថាមពលអាតូមិចនៃប្រទេសអ៊ីរ៉ង់ និងជាសមាជិកសភា លោក Tehranchi គឺជាអ្នករូបវិទ្យា និងជាអ្នកវិទ្យាសាស្ត្រនុយក្លេអ៊ែរដ៏កំពូលមួយរូបរបស់អ៊ីរ៉ង់។
ប្រតិបត្តិការទ័ពជើងអាកាសនេះ អ៊ីស្រាអែលដាក់ឈ្មោះថា «Rising Lion»។
លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ អះអាងថា វិធានការនេះ នឹងបន្តធ្វើក្នុងរយៈពេលជាច្រើនថ្ងៃទៅមុខទៀត រហូតទាល់តែការគំរាមកំហែងនុយក្លេអ៊ែររបស់អ៊ីរ៉ង់ ត្រូវបានបង្ក្រាប។
តាមបណ្ដាញផ្សាយព័ត៌មាន CNN អ៊ីស្រាអែលបើកការវាយប្រហារតាមផ្លូវអាកាសទ្រង់ទ្រាយធំលើទីតាំងរោងចក្រនុយក្លេអ៊ែរអ៊ីរ៉ង់ រោងចក្រផលិតមីស៊ីលបាលិស្ទិ។
តាមប្រព័ន្ធផ្សព្វផ្សាយអ៊ីរ៉ង់ ឧត្ដមសេនីយ៍ Hossein Salami ដែលជាអគ្គមេបញ្ជាការកងកម្លាំងឆ្មាំបដិវត្តន៍អ៊ីរ៉ង់ ត្រូវបានសម្លាប់ដោយកងយន្តហោះអ៊ីស្រាអែល វាយប្រហារលើទីបញ្ជាការកណ្ដាលរបស់កងកម្លាំងឆ្មាំបដិវត្តន៍អ៊ីរ៉ង់ក្នុងរដ្ឋធានីតេហេរ៉ង់។
យ៉ាងណា អ៊ីរ៉ង់បានសងសឹកវិញដោយបានបង្ហោះដ្រូនជាង ១០០គ្រឿង ទៅវាយប្រហារអ៊ីស្រាអែល ភ្លាមៗ ប៉ុន្តែអ៊ីស្រាអែល អះអាងថា បានបាញ់ស្ទាក់ដ្រូននោះទាំងអស់។
មេដឹកនាំកំពូលអ៊ីរ៉ង់ Ayatollah Ali Khamenei ដែលតាមដំណឹងមកថា កំពុងជ្រកក្នុងទីសុវត្ថិភាពរូងក្រោមដី បានគំរាមថា អ៊ីស្រាអែលនឹងត្រូវទទួលរងផលវិបាកធ្ងន់ធ្ងរនៅពេលដែលអ៊ីរ៉ង់ ចាប់ផ្ដើមវាយសងសឹកវិញក្នុងទ្រង់ទ្រាយវាយលុកដ៏ធំ។
នៅក្នុងសេចក្ដីថ្លែងការណ៍មួយ លោក Ali Khamenei បានហៅប្រតិបត្តិការរបស់អ៊ីស្រាអែល គឺជាការប្រព្រឹត្តបទឧក្រិដ្ឋមួយនៃរបប Zionist តែព្រមានអ៊ីស្រាអែល ត្រូវតែរងការឈឺចាប់នឹងផលវិបាកយ៉ាងធ្ងន់ធ្ងរ។
ក្រសួងការបរទេសអ៊ីរ៉ង់ ប្រកាសថា ទីក្រុងតេហេរ៉ង់ មានសិទ្ធិស្របច្បាប់ និងត្រឹមត្រូវក្នុងការឆ្លើយតបទៅនឹងការវាយប្រហាររបស់អ៊ីស្រាអែល ដោយស្របតាមធម្មនុញ្ញអង្គការសហប្រជាជាតិ។ អ៊ីរ៉ង់ ចោទថាបើគ្មានការបើកដៃពីសហរដ្ឋអាមេរិក គឺអ៊ីស្រាអែល ក៏នឹងមិនហ៊ានវាយប្រហារអ៊ីរ៉ង់ ដែរ។
ក្រសួងការបរទេសអ៊ីរ៉ង់ បានហៅជាសកម្មភាពឈ្លានពានរបស់របប Zionist ប្រឆាំងនឹងអ៊ីរ៉ង់ ដែលមានការសម្របសម្រួល និងការអនុញ្ញាតពីសហរដ្ឋអាមេរិក។ អ៊ីរ៉ង់ បានទាមទារថា រដ្ឋាភិបាលសហរដ្ឋអាមេរិក ដែលជាអ្នកគាំទ្រសំខាន់នៃរបបនេះ ត្រូវទទួលខុសត្រូវចំពោះផលប៉ះពាល់ និងផលវិបាកដ៏គ្រោះថ្នាក់នៃការប្រព្រឹត្តរបស់របប Zionist នៅពេលអ៊ីរ៉ង់ វាយសងសឹក។
ជាមួយគ្នានេះ ក្រសួងការបរទេសអ៊ីរ៉ង់ បានបញ្ជូនលិខិតស្នើឱ្យមានការថ្កោលទោសចំពោះការវាយប្រហាររបស់អ៊ីស្រាអែល ចេញពីក្រុមប្រឹក្សាសន្តិសុខអង្គការសហប្រជាជាតិ ដោយស្នើឱ្យកោះប្រជុំជាបន្ទាន់។
លិខិតរបស់ក្រសួងការបរទេសអ៊ីរ៉ង់ សរសេរថា៖ «ប្រទេសអ៊ីរ៉ង់ នឹងឆ្លើយតបចំពោះសកម្មភាពដ៏កំសាក និងខុសច្បាប់នេះ គឺសងសឹកដោយម៉ឺងម៉ាត់ និងសមស្របទៅវិញ ព្រោះជាការការពារបូរណភាពទឹកដី សន្តិសុខជាតិ និងពលរដ្ឋអ៊ីរ៉ង់ ហើយថា អ៊ីស្រាអែលនឹងត្រូវបង់តម្លៃដ៏ធំធេងមួយដែលបានបង្កការឈ្លានពានលើអ៊ីរ៉ង់។»
តែចំពោះសហរដ្ឋអាមេរិកវិញ ប្រកាសថា ខ្លួនមិនទទួលបានការជូនដំណឹងពីអ៊ីស្រាអែល នោះទេ តែព្រមានអ៊ីរ៉ង់ កុំឱ្យវាយសងសឹកលើអ៊ីស្រាអែល ព្រោះថាអាមេរិកនឹងអន្តរាគមន៍ជួយអ៊ីស្រាអែល។
តាមបណ្ដាញផ្សាយព័ត៌មាន Fox News ប្រធានាធិបតីសហរដ្ឋអាមេរិក ដូណាល់ ត្រាំ អះអាងថា ទីក្រុងវ៉ាស៊ីនតោន នឹងលូកដៃចូលជួយអ៊ីស្រាអែល បើអ៊ីរ៉ង់ ហ៊ានសងសឹកវិញ។
តាមអ្នកកាសែតរបស់ Fox News លោក Bret Baier ក្រោយបានជជែកជាមួយលោក ត្រាំ មេដឹកនាំអាមេរិករូបនេះនៅតែអះអាងថា ទីក្រុងវ៉ាស៊ីនតោន មិនពាក់ព័ន្ធនឹងការវាយប្រហាររបស់អ៊ីស្រាអែល លើអ៊ីរ៉ង់ នោះទេ។ យ៉ាងណាមិញ លោក ត្រាំ បានបញ្ជាក់យ៉ាងច្បាស់ៗថា អាមេរិកនឹងជួយការពារអ៊ីស្រាអែល បើពិតជាមានការវាយបកពីរដ្ឋាភិបាលក្រុងតេហេរ៉ង់។
លោក ត្រាំ បានលើកឡើងថា៖ «អ៊ីរ៉ង់ មិនអាចមានគ្រាប់បែកនុយក្លេអ៊ែរដាច់ខាត ដោយសង្ឃឹមថាអ៊ីរ៉ង់ នឹងត្រឡប់ទៅកាន់តុចរចាវិញ ខណៈអាមេរិកកំពុងរង់ចាំ។»
តាមការកំណត់ គឺការចរចាអំពីកម្មវិធីនុយក្លេអ៊ែរអ៊ីរ៉ង់ នឹងត្រូវធ្វើឡើងនៅថ្ងៃអាទិត្យចុងសប្ដាហ៍នេះ៕
© 2025, . All rights reserved.