ក្រសួងការបរទេសថៃ ច្រានចោលនូវការលើកឡើងរបស់ក្រសួងការពារជាតិកម្ពុជា ដែលថាការជីកលេណដ្ឋានរបស់ភាគីថៃ គឺជាការរំលោភលើអនុស្សរណៈយោគយល់គ្នាឆ្នាំ២០០០ (MOU២០០០) ដែលតម្រូវឱ្យភាគីទាំងពីរគោរពគ្នាទៅវិញទៅមក។
សារព័ត៌មាន Thai Enquire ចេញផ្សាយនៅថ្ងៃទី១៨ មិថុនា នេះថា មជ្ឈមណ្ឌលប្រតិបត្តិការពិសេសសម្រាប់ការគ្រប់គ្រងស្ថានការណ៍ព្រំដែនកម្ពុជា-ថៃ បានបញ្ជាក់ថា ការជីកលេណដ្ឋានការពារក្នុងទឹកដីថៃ មិនបំពានលើអនុស្សរណៈយោគយល់ឆ្នាំ២០០០ ឡើយ។
ប្រភពដដែលស្រង់សម្ដីអ្នកនាំពាក្យក្រសួងការបរទេសថៃ លោក Nikorndej Balankura ថា លេណដ្ឋានត្រូវបានជីកនៅលើដែនអធិបតេយ្យភាពរបស់ថៃ ប៉ុណ្ណោះ ខណៈអនុស្សរណៈយោគយល់ឆ្នាំ២០០០ (MOU២០០០) ក៏ថៃ មិនបានរំលោភដែរ។
អ្នកនាំពាក្យថៃរូបនេះបញ្ជាក់សាជាថ្មីអំពីការប្ដេជ្ញាចិត្តរបស់ប្រទេសថៃ ក្នុងការដោះស្រាយបញ្ហាព្រំដែនតាមរយៈទ្វេភាគីស្របតាមច្បាប់អន្តរជាតិ ខណៈប្រទេសថៃ នឹងធ្វើជាម្ចាស់ផ្ទះកិច្ចប្រជុំពិសេស JBC នៅខែកញ្ញា ខាងមុខនេះ ដើម្បីស្រាយបញ្ហារវាងប្រទេសទាំងពីរ។
កាលពីថ្ងៃទី១៧ ខែមិថុនា ក្រសួងការពារជាតិកម្ពុជា បានចេញសេចក្តីប្រកាសមួយ ដោយបង្ហាញការសោកស្តាយ ដោយសារតែភាគីថៃ មិនគោរព និងមិនគ្រប់គ្រងការអនុវត្តអនុស្សរណៈយោគយល់គ្នាឆ្នាំ២០០០ (MOU 2000) រវាងប្រទេសទាំងពីរ។
ប្រភពដដែលអះអាងថា ភាគីថៃ បានបង្ហាញសកម្មភាពរំលោភបំពានជាបន្តបន្ទាប់ ដូចជា ការបង្ហោះយានដ្រូន ការជីកលេណដ្ឋាន (ត្រង់សេ) ការបង្កើន និងការចល័តអាវុធគាំទ្រ រួមទាំងសព្វាវុធគ្រប់ប្រភេទ និងការសាងសង់ហេដ្ឋារចនាសម្ព័ន្ធយោធានៅតាមព្រំដែនខេត្តព្រះវិហារ និងខេត្តឧត្ដរមានជ័យ ជាការគំរាមកំហែងសន្តិភាពរវាងប្រទេសទាំងពីរយ៉ាងធ្ងន់ធ្ងរ។
ទាក់ទិននឹងបញ្ហានេះ សារព័ត៌មាន The Nation បានចុះផ្សាយនៅថ្ងៃទី១៨ មិថុនា នេះថា មេបញ្ជាការកងម៉ារីនខេត្តត្រាត លោក Paris Wongpensri បានអះអាងថា ថៃបានចល័តកងទ័ព និងអាវុធតាមព្រំដែនខេត្តត្រាត ដើម្បីត្រៀមរក្សាសន្តិសុខ។
មេបញ្ជាការកងម៉ារីនថៃ រូបនេះ អះអាងថា អង្គភាពសមុទ្រថៃ ត្រូវបានដាក់ពង្រាយដើម្បីឈរជើងការពារព្រំដែននាពេលនេះ ហើយការដាក់ពង្រាយនេះ គឺធ្វើឡើងបន្ទាប់ពីកងទ័ពកម្ពុជាបានបាញ់ទៅលើមេឃក្បែរព្រំដែនកម្ពុជា-ថៃ ក្នុងខេត្តត្រាត កាលពីល្ងាចថ្ងៃអង្គារ និងព្រឹកព្រលឹមថ្ងៃពុធនេះ។
លោក Paris Wongpensri បញ្ជាក់ថា លោកមិនអាចកំណត់បានថា តើកងទ័ពកម្ពុជាណាខ្លះបាញ់កាំភ្លើងនោះទេ ប៉ុន្តែជាក់ស្តែង ពួកគេបានបាញ់ទៅលើយន្តហោះគ្មានមនុស្សបើក ខណៈយន្តហោះគ្មានមនុស្សបើកទាំងនោះ ក៏គេមិនអាចកំណត់បានថាតើភាគីណាជាអ្នកបង្ហោះដែរ៕
© 2025, . All rights reserved.