ខណៈប្រទេសសមាជិកអង្គការសហប្រជាជាតិជាច្រើនជួបជុំគ្នានៅទីក្រុង Seville ប្រទេសអេស្ប៉ាញ ពិភាក្សាលើបញ្ហាជំនួយមនុស្សធម៌សម្រាប់ពិភពលោក ព្រឹត្តិបត្រផ្នែកវេជ្ជសាស្ត្រ Lancet នៅចក្រភពអង់គ្លេស បានផ្សាយអត្ថបទស្រាវជ្រាវមួយដោយវិទ្យាស្ថានសុខភាពពិភពលោក Barcelona Institute of Global Health នៅថ្ងៃទី៤ កក្កដា ដោយនិយាយថា មនុស្សគ្រប់ជាតិសាសន៍ក្នុងប្រទេសក្រីក្រដល់ទៅជាង ១៤លាននាក់ អាចនឹងស្លាប់មុនឆ្នាំ២០៣០ ដែលក្នុងចំនួននេះ កុមារប្រមាណជាង ៣០%។
អ្នកស្រាវជ្រាវ លោក Davide Rasella និងអ្នកស្រី Caterina Monti បានធ្វើការប្រៀបធៀបគ្រានៅមានជំនួយសហរដ្ឋអាមេរិកពីភ្នាក់ងារ USAID និងប្រទេសដទៃ អ្នកវិទ្យាសាស្ត្រមានលទ្ធភាពសង្គ្រោះជីវិតមនុស្សជិត ៩២លាននាក់ក្នុងប្រទេស ១៣៣ ពីឆ្នាំ២០០១ ដល់ឆ្នាំ២០២១។
ជំនួយសហរដ្ឋអាមេរិកតាមរយៈ USAID គឺស្មើនឹង ៤០% នៃជំនួយសរុបធ្វើវិភាគទានដោយប្រទេសឧស្សាហកម្មជឿនលឿន។ គេរកឃើញថា ក្នុងចំណោមមនុស្សជាង ១៤លាននាក់ កុមារអាយុក្រោម ៥ឆ្នាំ មាន ៤លាន ៥សែននាក់ ឬ ៧សែននាក់កំពុងបន្តស្លាប់រៀងរាល់ឆ្នាំ។ តាមការគណនាលម្អិត ជំនួយអាមេរិកាំងគិតជាពលរដ្ឋម្នាក់ៗ គឺបរិច្ចាគ ១៧សេនក្នុង ១ថ្ងៃ ឬ ៦៤ដុល្លារក្នុងមួយឆ្នាំ។
តាមការសិក្សាតាមដានពីសាកលវិទ្យាល័យ Boston សហរដ្ឋអាមេរិក អ្នកស្រាវជ្រាវ Brooke Nichols ឱ្យដឹងថា ការសម្រេចកាត់ជំនួយអាមេរិកាំង មនុស្សវ័យចំណាស់ ១សែន ៨ពាន់នាក់ និងកុមារ ២សែន ២ម៉ឺន ៤ពាន់នាក់ ស្លាប់រួចបាត់ទៅហើយ ដោយសារតែការកាត់ជំនួយដល់ភ្នាក់ងារ USAID។ នេះបានសេចក្តីថា ជីវិតមនុស្ស ៨៨នាក់ត្រូវបាត់បង់រៀងរាល់ម៉ោង។
ឥឡូវនេះ ប្រទេសនៅអឺរ៉ុបខ្លះក៏កាត់ជំនួយតាមសហរដ្ឋអាមេរិកដែរ មានដូចជា បារាំង អង់គ្លេស អាល្លឺម៉ង់ ជាដើម៕
© 2025, . All rights reserved.