អតីតតំណាងរាស្ត្រអូស្ត្រាលីដើមកំណើតខ្មែរប្រចាំរដ្ឋវិចតូរីយ៉ា លោក ហុង លីម បានចោទជាសំណួរទៅកាន់លោក ហ៊ុន សែន ដោយសួរថា បើលោក ហ៊ុន សែន ចាត់ទុកការស្រឡាញ់ពីពលរដ្ឋថៃ នាំឱ្យគាត់ក្លាយជាជនក្បត់ជាតិ តើមេដឹកនាំវៀតណាម ដែលស្រឡាញ់លោក ហ៊ុន សែន លើកបន្តុបក្លាយជាជនក្បត់ជាតិវៀតណាម ឬយ៉ាងណា?
លោក ហុង លីម សរសេរលើគណនីហ្វសប៊ុករបស់ខ្លួននៅថ្ងៃទី១៧ កក្កដា នេះ ដោយសួរទៅកាន់លោក ហ៊ុន សែន ថា តើការដែលគាត់ស្រឡាញ់វៀតណាម ចាក់ទឹកមិនលេច មានន័យថាវៀតណាម ក្បត់ជាតិរបស់ពួកគេទៅបម្រើខ្មែរ ឬយ៉ាងណា? លើសពីនេះទៀត ការដែលលោក ហ៊ុន សែន បើកដៃឱ្យពលរដ្ឋវៀតណាម ចូលទៅរស់នៅក្នុងទឹកដីខ្មែរដោយខុសច្បាប់ទាំងហ្វូងៗរហូតមកនោះ តើមានន័យថាពលរដ្ឋវៀតណាមទាំងនោះក្បត់ជាតិសាសន៍របស់គេ មកបម្រើខ្មែរមែនដែរឬទេ?
អតីតតំណាងរាស្ត្រអូស្ត្រាលីរូបនេះ លើកឡើងថា បើពលរដ្ឋថៃ គ្រាន់តែស្រឡាញ់លោក ហ៊ុន សែន ហើយគាត់ក្លាយជាជនក្បត់ជាតិខ្មែរ នោះការដែលកងទ័ពវៀតណាម ស្រឡាញ់រាប់អានគាត់ជិត ៥០ឆ្នាំមកនេះ ក៏ត្រូវតែមានន័យថាលោក ហ៊ុន សែន បានក្បត់ខ្មែរជិតកន្លះសតវត្សមកហើយដែរ។
លោកបន្តថា ក្នុងនាមលោក ហ៊ុន សែន ជាមេដឹកនាំនយោបាយកំពូលម្នាក់ មិនគួរប្រើសម្ដីគ្មានតក្កវិជ្ជា គ្មានខ្លឹមសារបែបនេះទេ ព្រោះថាសម្ដីនេះគឺជាសម្ដីជាន់កែងខ្លួនឯង ដែលបញ្ជាក់យ៉ាងច្បាស់ថា គាត់បានក្បត់ជាតិខ្មែរជាយូរមកហើយក្រោមការស្រឡាញ់ស្និទ្ធស្នាលជាមួយវៀតណាម ជាង ៤០ឆ្នាំមកនោះ។
លោក ហុង លីម បញ្ជាក់ថា បើការនិយាយរបស់គាត់បែបនេះ មិនមែនគ្រាន់តែនិយាយដើម្បីចំអកឱ្យជនជាតិថៃ ទេ គឺមានន័យថាគាត់គឺជាជនទីមួយដែលត្រូវបានដកសញ្ជាតិខ្មែរពីកំណើតមុនគេបង្អស់ នៅពេលដែលច្បាប់ដកសញ្ជាតិខ្មែរពីកំណើតត្រូវបានប្រកាសឱ្យប្រើប្រាស់ជាផ្លូវការដោយយោងតាមការធ្វើវិសោធនកម្មមាត្រា៣៣ នៃរដ្ឋធម្មនុញ្ញ កាលពីពេលថ្មីៗកន្លងទៅនោះ។
កាលពីថ្ងៃទី៩ ខែកក្កដា លោក ហ៊ុន សែន លើកឡើងថា ការរៀបចំស្ទង់មតិនៃវិទ្យាស្ថាន NIDA ដើម្បីចង់ដឹងទឹកចិត្តប្រជាជនថៃ ចំពោះរូបលោក គឺបង្ហាញពីការចាប់អារម្មណ៍ខ្លាំង និងផ្តល់តម្លៃចំពោះលោកទៅវិញទេ ប៉ុន្តែអ្វីដែលលោកខ្លាចបំផុតនោះ គឺប្រជាជនថៃ ស្រឡាញ់រូបលោកដែលអាចបង្ហាញថាលោកជាជនក្បត់ជាតិសាសន៍ និងប្រជាជនខ្មែរទៅវិញទេ។
លោក ហ៊ុន សែន បញ្ជាក់ថា អ្វីដែលលោកចង់បានបំផុតនោះ គឺសត្រូវវាយតម្លៃមករូបលោកក្នុងកម្រិតទាបបំផុត ដែលចំណុចនេះបង្ហាញថា លោកកំពុងធ្វើរឿងដ៏ត្រឹមត្រូវចំពោះប្រទេសជាតិ និងប្រជាជនខ្មែរក្នុងពេលដែលប្រទេសទាំងពីរកំពុងក្លាយជាសត្រូវនឹងគ្នានោះ។
ការអះអាងនេះ ធ្វើឡើងបន្ទាប់ពីវិទ្យាស្ថាន NIDA បានធ្វើការស្ទង់មតិពលរដ្ឋថៃ ចំពោះលោក ហ៊ុន សែន ជុំវិញសកម្មភាពរបស់គាត់អំឡុងពេលទំនាស់ព្រំដែនរវាងកម្ពុជា-ថៃ កន្លងមកនេះ។
ការស្ទង់មតិពីវិទ្យាស្ថាន NIDA បានធ្វើឡើងចន្លោះពីថ្ងៃទី៣០ ខែមិថុនា ដល់ថ្ងៃទី២ ខែកក្កដា ឆ្នាំ២០២៥ លើមនុស្សជាង ១០០០នាក់ អំពីចំណាប់អារម្មណ៍ចំពោះសកម្មភាពរបស់លោក ហ៊ុន សែន ជុំវិញទំនាស់ព្រំដែនរវាងកម្ពុជា-ថៃ នាពេលនេះ។
រដ្ឋាភិបាលថៃ បច្ចុប្បន្ន ខាងបក្សភឿថៃ កំពុងដាក់ពាក្យប្តឹងទៅតុលាការលើរូបលោក ហ៊ុន សែន ដោយចោទថាលោក ហ៊ុន សែន ព្យាយាមបំផុសបំផុលបង្កចលាចលបះបោរ បំបែកបំបាក់សង្គមជាតិថៃ ភាសាអង់គ្លេសហៅថា sedition តាមរយៈការទម្លាយសារសន្ទនារវាងលោក និងអតីតនាយករដ្ឋមន្ត្រី ផែថងថាន ស៊ីណាវ៉ាត់ កូនស្រីកល្យាណមិត្តរបស់លោក គឺលោក ថាក់ស៊ីន ស៊ីណាវ៉ាត់។
លោក ហ៊ុន សែន សរសេរទៀតថា លោក ថាក់ស៊ីន ក្បត់រូបលោក មិនខុសពីក្បត់ជាតិថៃ នោះដែរ។ បើតុលាការសម្រេចបើកផ្លូវ រដ្ឋាភិបាលថៃ នឹងយកដីកាចាប់ខ្លួនលោក ហ៊ុន សែន ធ្វើកិច្ចសហប្រតិបត្តិការនឹងប៉ូលិសអន្តរជាតិ Interpol។
ទោះជាយ៉ាងណាក្ដី ការឲ្យនិយមន័យលើពាក្យ ក្បត់ជាតិ treason ក្នុងរបបគ្រប់គ្រងសព្វថ្ងៃនេះ គឺធ្វើឡើងសម្រាប់បម្រើបំណងបក្សកាន់អំណាចតែមួយគត់ ដែលមានមេដឹកនាំផ្ដាច់ការប្រមូលផ្ដុំផ្ដាច់មុខ គិតតែរក្សាប្រយោជន៍អំណាចផ្ទាល់ខ្លួន និងបក្ខពួក មិនមែនប្រយោជន៍រួម ឬប្រយោជន៍ជាតិនោះទេ ទោះជាគេខំប្រឹងនិយាយអំពីច្បាប់រដ្ឋធម្មនុញ្ញក៏ដោយ ព្រោះថាស្ថាប័នធ្វើច្បាប់ និងស្ថាប័នបកស្រាយអត្ថន័យច្បាប់ សុទ្ធតែស្ថិតក្រោមអំណាចបក្ស និងមេដឹកនាំផ្ដាច់ការទាំងអស់ ពោលគឺមិនហ៊ានជំទាស់ឡើយ ទោះជាមើលឃើញ មើលដឹងថាវាខុស វាផ្ទុយពីស្មារតី ខ្លឹមសារច្បាប់អន្តរជាតិក៏ដោយ។
អត្ថន័យក្នុងភាសាអង់គ្លេស treason គឺក្បត់នឹងប្រទេសខ្លួន ឬទៅបម្រើគោលនយោបាយបរទេស។ ភាសាខ្មែរប្រើពីសម័យមុនក្នុងនគរមានស្តេចសោយរាជ្យ ដែលភាសាសាមញ្ញហៅថា ស្តេចផែនដី គឺសំដៅដល់ឧបាយកលកំបាំង អំពើ ទង្វើ ប៉ុនប៉ងរំលំរាជ្យ ដណ្តើមរាជ្យ សមគំនិតនឹងបរទេស ហៅថាក្បត់ផែនដី ពីព្រោះថាដែនដីនគរនោះគ្រប់គ្រងដោយស្តេច។ ក្រោយមក គេច្នៃពាក្យពីក្បត់ផែនដី ឬក្បត់ស្តេចផែនដី ទៅជាក្បត់ជាតិ ឬកំណើតខ្លួន ដើម្បីចោទប្រកាន់ដាក់ទោសប្រហារជីវិត ឬនិរទេសចេញពីទឹកដី។ ប៉ុន្តែការពិត ពលរដ្ឋក្នុងនគរអាចមិនយល់ស្របនឹងគោលនយោបាយអ្នកគ្រប់គ្រងតែប៉ុណ្ណោះ មិនបានក្បត់ជាតិកំណើតខ្លួននោះឡើយ។
ចំណែកឯលោក ហ៊ុន សែន និងប្អូនស្រីៗរបស់លោកជាច្រើននាក់ សុទ្ធតែធ្លាប់ធ្វើភ្នាក់ងារចារកម្មឲ្យរដ្ឋអំណាចកុម្មុយនីស្តយៀកណាម។ សម័យខ្មែរក្រហម ក្រោម ប៉ុល ពត គេហៅខ្មែរជំពូកនេះថា ក្បាលយួន ខ្លួនខ្មែរ។ ដើមទសវត្សរ៍១៩៩០ លោក ខៀវ សំផន ធ្លាប់ចោទលោក ហ៊ុន សែន ក្នុងកិច្ចប្រជុំជាមួយសម្តេច នរោត្តម សីហនុ នៅក្រុងប៉ារីស មុនចុះកិច្ចព្រមព្រៀងសន្តិភាព ថាក្បត់ជាតិ ទៅនាំទ័ពបរទេសមកវាយទន្ទ្រានលុកលុយត្រួតត្រាប្រទេសកម្ពុជា៕
© 2025, . All rights reserved.