អនុរដ្ឋមន្ត្រីការពារជាតិថៃ ព្រមានប្តឹងកម្ពុជា ពីបទរំលោភអនុសញ្ញាអូតាវ៉ា (Ottawa Convention) ជុំវិញការផ្ទុះគ្រាប់មីននៅតំបន់មុំ៣ ក្រោមហេតុផលថាគ្រាប់មីនប្រឆាំងមនុស្សម៉ាក PMN -2 គឺជាគ្រាប់មីនរបស់កម្ពុជា។
សារព័ត៌មានថៃ ខៅ ស៊ុត (Khaosod) បានស្រង់សម្ដីអនុរដ្ឋមន្ត្រីក្រសួងការពារជាតិថៃ និងជានាយកមជ្ឈមណ្ឌលបញ្ជាការប្រឆាំងភេរវកម្ម (CTCC) លោក ណាថាពល ណាក់ផានិច (Natthapol Nakpanich) នៅថ្ងៃទី២១ កក្កដា នេះថា ថៃមានភស្តុតាងគ្រប់គ្រាន់នៅពេលនេះ ហើយក៏កំពុងបន្តបើកការស៊ើបអង្កេតបន្ថែមទៀតដែរ ក្រោមហេតុផលថា ថៃមិនដែលប្រើប្រាស់គ្រាប់មីនប្រឆាំងមនុស្សប្រភេទ PMN-2 នេះទេកន្លងមក។
ឧត្តមសេនីយ៍ថៃ រូបនេះ អះអាងថា មីនទាំងនោះត្រូវបានលាក់ក្រោមរុក្ខជាតិតូចៗ ហើយលោហៈមីននៅមានសភាពថ្មី ដែលបង្ហាញយ៉ាងច្បាស់ថាវាត្រូវបានគេដាក់ថ្មីៗ ហើយនេះក៏ជាការរំលោភបំពានពីភាគីកម្ពុជាដែរដែលបានដាក់គ្រាប់មីនថ្មីៗ និងការកាន់កាប់អាវុធនៅទីតាំងដែលត្រូវហាមឃាត់នោះ។
លោក ណាថាពល ណាក់ផានិច បញ្ជាក់ថា រដ្ឋាភិបាលនឹងប្តឹងកម្ពុជាអំពីរឿងនេះ ខណៈសំណុំរឿងគ្រាប់មីនដែលបានផ្ទុះ និងបានរកឃើញនោះ ក៏កំពុងត្រូវបានរៀបចំសម្រាប់ដាក់ជូនគណៈកម្មាធិការអនុសញ្ញាអូតាវ៉ា ដែលគ្រោងនឹងប្រជុំនៅចុងឆ្នាំនេះដែរ។
កាលពីថ្ងៃទី១៦ ខែកក្កដា ទាហានថៃ ៣នាក់មកពីកងពលថ្មើរជើងលេខ៦០២១ បានរងរបួសអំឡុងប្រតិបត្តិការល្បាតតាមព្រំដែន ដោយសារជាន់គ្រាប់មីនស្ថិតក្នុងតំបន់មុំបី។
អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) លោក ហេង រតនា បានសរសេរលើគណនីហ្វេសប៊ុករបស់ខ្លួននៅថ្ងៃទី២១ កក្កដា នេះថា បូរណភាពទឹកដីអ្នកណា អ្នកនោះជាអ្នកទទួលខុសត្រូវបោសសម្អាតគ្រាប់មីនដែលនៅលើទឹកដីរបស់ខ្លួន។
លោកបន្តថា សម្រាប់កម្ពុជា មកដល់ពេលនេះបានបោសសម្អាត និងកម្ទេចចោលទាំងគ្រាប់មីន និងគ្រាប់យុទ្ធភណ្ឌមិនទាន់ផ្ទុះបានចំនួនជាង ៤លាន ៤៦ម៉ឺនគ្រាប់ហើយ។
លោក ហេង រតនា បញ្ជាក់ថា កម្ពុជាគឺជារដ្ឋភាគីនៃអនុសញ្ញាមីនអន្តជាតិអូតាវ៉ា ដែលបានចូលរួមអនុវត្តអនុសញ្ញានេះប្រកបដោយជោគជ័យទាំងឆាកជាតិ និងអន្តរជាតិ ទាំងមុន និងក្រោយក្លាយខ្លួនសមាជិកពេញសិទ្ធិកាលពីឆ្នាំ២០០០ កន្លងទៅ។
បែបនេះក្តី អ្នកឃ្លាំមើលស្ថានការណ៍កម្ពុជា លោក សុខ សុគន្ធ បានលើកឡើងថា ដើម្បីកំណត់ឱ្យបានជាក់ច្បាស់ថាគ្រាប់មីនដែលត្រូវបានរកឃើញទាំងនោះជាគ្រាប់មីនចាស់ ឬគ្រាប់មីនថ្មី គេត្រូវពិនិត្យគ្រឿងខាងក្នុងរបស់វា ដូចជាតួលេខសម្គាល់គ្រាប់មីន (serial number) កាលបរិច្ឆេទគ្រឿងផ្គុំ (date of parts) រួមទាំងការពិសោធន៍សម្បកឱ្យដឹងពីអាយុកាលផងដែរ៕
© 2025, . All rights reserved.