វិមានក្រឹមឡាំង បន្តទាមទារឱ្យអ៊ុយក្រែន ចុះចាញ់មុនពេលសន្តិភាពកើតឡើង ដោយព្រមានថា សន្តិភាពចុងក្រោយបង្អស់របស់វិមានក្រឹមឡាំង ផ្ដល់ឱ្យអ៊ុយក្រែន លុះណាតែអ៊ុយក្រែន យល់ព្រមសម្របទៅតាមអ្វីដែលជាគោលបំណងដើមរបស់រុស្ស៊ី ដែលនាំឱ្យមានសង្គ្រាមនៅលើទឹកដីអ៊ុយក្រែន។
នេះបើតាមសេចក្តីរាយការណ៍ដោយវិទ្យាស្ថានសិក្សាសង្គ្រាម ដែលបានចុះផ្សាយដោយសារព័ត៌មាន EUROMAIDAN កាលពីថ្ងៃទី២១ ខែកក្កដា ឆ្នាំ២០២៥។
កាលពីថ្ងៃទី២០ ខែកក្កដា អ្នកនាំពាក្យវិមានក្រឹមឡាំង លោក Dmitry Peskov អះអាងជាសាធារណៈថា ទីក្រុងមូស្គូ បានត្រៀមខ្លួនសម្រាប់ការចរចាយ៉ាងឆាប់រហ័ស ប៉ុន្តែលុះត្រាតែលក្ខខណ្ឌទាំងអស់របស់រុស្ស៊ី ត្រូវបានទទួលយកជាមុនសិនពីភាគីអ៊ុយក្រែន។
ចាប់តាំងពីឆ្នាំ២០២២ រុស្ស៊ី បានទាមទារឱ្យកាត់បន្ថយសមត្ថភាពការពារជាតិរបស់អ៊ុយក្រែន ដោយអំពាវនាវឱ្យអ៊ុយក្រែន រំសាយអាវុធ និងកាត់បន្ថយកម្លាំងយោធារបស់ខ្លួន ដែលនឹងធ្វើឱ្យអ៊ុយក្រែន មិនអាចទប់ទល់នឹងការឈ្លានពានរបស់រុស្ស៊ី នាពេលអនាគត។
ជាមួយគ្នានេះ ទីក្រុងមូស្គូ បានអំពាវនាវឱ្យមានការដកហូតអំណាចរបស់មេដឹកនាំទីក្រុងគៀវ បច្ចុប្បន្ននេះ គឺប្រធានាធិបតី វូឡូឌីមៀ ហ្សេឡេនស្គី ដើម្បីស្ដារឡើងវិញនូវទំនាក់ទំនងរបស់ទីក្រុងមូស្គូ ជាមួយទីក្រុងគៀវ និងការហាមឃាត់លើសេចក្ដីប្រាថ្នារបស់អ៊ុយក្រែន ក្នុងការចូលរួមជាសមាជិកអង្គការណាតូ (NATO) ដែលជួយលើការអនុវត្តនូវស្ថានភាពអព្យាក្រឹតភាពរបស់អ៊ុយក្រែន ដូចពីមុន។
ទន្ទឹមនឹងនេះ ប្រជាជនរុស្ស៊ីភាគច្រើនបន្តគាំទ្រប្រទេសខ្លួនដែលកំពុងមានសង្គ្រាមប្រឆាំងនឹងអ៊ុយក្រែន។
រុស្ស៊ី ក៏កំពុងទាមទារឲ្យអ៊ុយក្រែន ទទួលយកការដាក់កម្រិតក្នុងផ្នែកនយោបាយ និងយោធា ដោយសម្រួលអំណាចរបស់យោធាអ៊ុយក្រែន ត្រូវបានកាត់បន្ថយទាបបំផុត គឺមានចំនួនតែ ៥ម៉ឺននាក់ប៉ុណ្ណោះ។
យោងតាមវិទ្យាស្ថានសិក្សាសង្គ្រាម ISW សេចក្តីថ្លែងការណ៍របស់ Dmitry Peskov បញ្ជាក់ពីការបន្តបដិសេធរបស់រុស្ស៊ី ក្នុងការចូលរួមក្នុងដំណើរការការទូតណាមួយ។ លោក Dmitry Peskov និយាយថា គោលបំណងរបស់រុស្ស៊ី គឺជាក់ស្តែង និងមិនផ្លាស់ប្ដូរនោះឡើយ បើអ៊ុយក្រែន ចង់បានសន្តិភាព គឺអ៊ុយក្រែន ត្រូវតែសម្របទៅតាមគោលបំណងរបស់ទីក្រុងមូស្គូ ដែលបានប្រាប់ឱ្យអ៊ុយក្រែន រំសាយអាវុធ បោះបង់នូវមហិច្ឆតារបស់ខ្លួនដែលចង់ក្លាយជាសមាជិករបស់អង្គការណាតូ ក៏ដូចជាការផ្លាស់ប្ដូររបបដឹកនាំប្រធានាធិបតី វូឡូឌីមៀ ហ្សេឡេនស្គី បច្ចុប្បន្ននេះ។
ការទាមទាររបស់រុស្ស៊ី ត្រូវបានគេកត់សម្គាល់ថាស្របតាមគោលនយោបាយដែលវិមានក្រឹមឡាំង បានប្រកាសជាញឹកញាប់ ដែលភាសានយោបាយបង្ហាញពីបំណងក្នុងការផ្លាស់ប្ដូររបបនយោបាយនៅទីក្រុងគៀវ និងការលុបបំបាត់សមត្ថភាពការពារជាតិរបស់អ៊ុយក្រែន។
តាមការកត់សម្គាល់របស់លោក Dmitry Peskov ជំហររបស់រុស្ស៊ី ចំពោះការចរចាសន្តិភាពនៅតែមានអតិបរិមា និងមិនផ្លាស់ប្ដូរឡើយចាប់តាំងពីការឈ្លានពានលើអ៊ុយក្រែន នៅឆ្នាំ២០២២។
យ៉ាងណា បើតាមវិទ្យាស្ថានសិក្សាសង្គ្រាម ISW ការអះអាងរបស់រុស្ស៊ី អំពីសន្តិភាព គ្រាន់តែជាយុទ្ធសាស្ត្រអូសបន្លាយពេលសង្គ្រាម និងបន្តបំពេញគោលដៅយុទ្ធសាស្ត្រដើមរបស់ខ្លួនតែប៉ុណ្ណោះ។
វិទ្យាស្ថានសិក្សាសង្គ្រាម បានបង្ហាញថា លោក Peskov បានបញ្ជាក់ពីការបន្តមិនចាប់អារម្មណ៍របស់វិមានក្រឹមឡាំង ក្នុងការចរចាដោយស្មោះត្រង់ជាមួយអ៊ុយក្រែន។ ផ្ទុយទៅវិញ រុស្ស៊ីកំពុងខិតខំប្រឹងប្រែងក្នុងការអូសបន្លាយសង្គ្រាម។
រុស្ស៊ី ទាមទារឱ្យអ៊ុយក្រែន ចុះចាញ់មុនពេលសន្តិភាពអាចកើតឡើង ជាមួយនឹងការដាក់លក្ខខណ្ឌរបស់ខ្លួនថាជាការលុបបំបាត់នូវអ្វីដែលគេហៅថាមូលហេតុឫសគល់នៃសង្គ្រាមដែលទាមទារឱ្យអ៊ុយក្រែន លុបបំបាត់អធិបតេយ្យភាពរបស់ខ្លួន និងការរារាំងមិនឱ្យអ៊ុយក្រែន ចូលជាសមាជិកណាតូ ក៏ដូចជាការដកសមត្ថភាពការពារជាតិរបស់អ៊ុយក្រែន ដើម្បីជាការបង្ការការឈ្លានពានរុស្ស៊ី នាពេលអនាគត។
តែជាមួយគ្នានេះ ប្រធានាធិបតីអ៊ុយក្រែន លោក ហ្សេឡេនស្គី បានប្រកាសថា អ៊ុយក្រែននិងរុស្ស៊ី នឹងបើកកិច្ចពិភាក្សាសន្តិភាពជុំថ្មីទៀតនៅថ្ងៃពុធ ទី២៣ ខែកក្កដា ក្នុងសប្តាហ៍នេះ ក្នុងទីក្រុងអ៊ីស្តាន់ប៊ុល នៃប្រទេសតួកគី ដើម្បីព្យាយាមស្វែងរកវឌ្ឍនភាពឆ្ពោះទៅដល់ការបិទបញ្ចប់សង្គ្រាម។
លោក ហ្សេឡេនស្គី និយាយថា លោកបានជួបជាមួយលេខាធិការនៃក្រុមប្រឹក្សាសន្តិសុខជាតិអ៊ុយក្រែន លោក Rustem Umerov អំពីការត្រៀមលក្ខណៈសម្រាប់កិច្ចចរចាជុំថ្មីនៅតួកគី ជាមួយភាគីរុស្ស៊ី។
ភាគីទាំងពីរ រុស្ស៊ីនិងអ៊ុយក្រែន បានជួបចរចាគ្នាពីរលើកនៅអ៊ីស្តាន់ប៊ុល កាលពីថ្ងៃទី១៦ ខែឧសភា និងថ្ងៃទី២ ខែមិថុនា ស្របពេលដែលអាមេរិកដាក់សម្ពាធឱ្យព្រមព្រៀងគ្នាលើបទឈប់បាញ់ ប៉ុន្តែការចរចាស្ថិតក្នុងភាពជាប់គាំង។
ក្រុមអ្នកចរចារបស់អ៊ុយក្រែន និងរុស្ស៊ី មកទល់ពេលនេះបានឯកភាពគ្នាត្រឹមបង្កើនការដោះដូរឈ្លើយសឹក ហើយចាប់តាំងតែពីពេលនោះមក រុស្ស៊ីនៅតែវាយប្រហារតាមផ្លូវអាកាសកាន់តែខ្លាំងលើអ៊ុយក្រែន។
ការបញ្ជាក់ជំហររបស់ភាគីរុស្ស៊ី ចង់បន្តការចរចាបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសទុកពេលឱ្យរុស្ស៊ី ៥០ថ្ងៃដើម្បីចរចារកកិច្ចព្រមព្រៀងជាមួយអ៊ុយក្រែន បើមិនចង់រងទណ្ឌកម្មធ្ងន់ធ្ងរ។ ជាមួយគ្នានេះ លោក ត្រាំ បានសម្រេចបន្តការផ្គត់ផ្គង់សព្វាវុធឱ្យអ៊ុយក្រែន ឡើងវិញ។
ភ្លាមៗក្រោយពីឱសានវាទរបស់លោក ត្រាំ វិមានក្រឹមឡាំង បាននិយាយថា ខ្លួនត្រៀមរួចរាល់ដើម្បីបើកកិច្ចចរចាបន្តទៀតជាមួយអ៊ុយក្រែន ប៉ុន្តែការចរចាត្រូវធ្វើឡើងក្នុងបរិយាកាសសមស្របដែលទីក្រុងមូស្គូ មើលឃើញថា តើខ្លួនអាចទទួលយកបានការចរចាឡើងវិញឬទេ?៕
© 2025, . All rights reserved.