ក្រសួងវប្បធម៌ និងវិចិត្រសិល្បៈ ប្រទេសកម្ពុជា នៅថ្ងៃទី២៧ ខែកក្កដា ឆ្នាំ២០២៥ នេះ បានចេញសេចក្ដីថ្លែងការណ៍ថ្កោលទោសប្រទេសថៃ ដែលបន្តសកម្មភាពវាយប្រហារដោយអាវុធធុនធំបាញ់បំផ្លាញប្រាសាទព្រះវិហាររបស់ប្រទេសកម្ពុជា និងជាបេតិកភណ្ឌពិភពលោករបស់អង្គការយូណេស្កូ។
សេចក្ដីថ្លែងការណ៍របស់ក្រសួងវប្បធម៌ និងវិចិត្រសិល្បៈ បានលើកឡើងថា អំពើឈ្លានពានដែលកើតឡើងជាថ្មីទាំងនេះ បានធ្វើឲ្យប្រាសាទស្ថិតក្នុងភាពធ្ងន់ធ្ងរ និងគ្រោះថ្នាក់មិនធ្លាប់មានពីមុនមក។ ផ្នែកសំខាន់ៗនៃរចនាសម្ព័ន្ធ និងបរិវេណជុំវិញ ត្រូវបានខូចខាត ឬបំផ្លាញយ៉ាងធ្ងន់ធ្ងរ។
ក្នុងនាមជាសម្បត្តិបេតិកភណ្ឌពិភពលោករបស់អង្គការយូណេស្កូ ប្រាសាទព្រះវិហារ ឈរជានិមិត្តរូបនៃអត្តសញ្ញាណជាតិ ភាពបន្តប្រវត្តិសាស្ត្រ និងបេតិកភណ្ឌខាងវិញ្ញាណរបស់កម្ពុជា។ ការវាយប្រហារទាំងនេះ មិនត្រឹមតែរំលោភលើអធិបតេយ្យភាពរបស់កម្ពុជាប៉ុណ្ណោះទេ ប៉ុន្តែថែមទាំងបង្កគ្រោះថ្នាក់ដល់បេតិកភណ្ឌវប្បធម៌រួមរបស់មនុស្សជាតិផងដែរ។ ករណីនេះ ទាមទារឲ្យប្រទេសថៃ ទទួលខុសត្រូវទាំងស្រុង។
ក្រសួងវប្បធម៌ និងវិចិត្រសិល្បៈ ថ្កោលទោសជាសាធារណៈចំពោះការបន្តឈ្លានពានរបស់ប្រទេសថៃ ប្រឆាំងនឹងបេតិកភណ្ឌវប្បធម៌កម្ពុជា។ ក្រសួងក៏ស្នើសុំឲ្យមានការដាក់ពង្រាយអ្នកសង្កេតការណ៍អន្តរជាតិ ដើម្បីវាយតម្លៃពីទំហំនៃការខូចខាត និងជួយការពារទីតាំង។ មិនត្រឹមតែប៉ុណ្ណោះ ក្រសួងវប្បធម៌ និងវិចិត្រសិល្បៈ នឹងបន្តចងក្រងឯកសាររាល់អំពើបំផ្លិចបំផ្លាញ និងបន្តតាមនីតិវិធីច្បាប់នៅតុលាការឧក្រិដ្ឋកម្មអន្តរជាតិ (ICC) និងស្ថាប័នអន្តរជាតិពាក់ព័ន្ធផ្សេងទៀត ដើម្បីស្វែងរកយុត្តិធម៌ និងសំណង៕
© 2025, . All rights reserved.