វីរយោធានៃកងយោធពលខេមរភូមិន្ទ ២នាក់ក្នុងចំណោម ២០នាក់ ដែលថៃ បានចាប់ខ្លួន ត្រូវបានបញ្ជូនត្រឡប់មកកម្ពុជាវិញតាមច្រកអូរស្មាច់ ខេត្តឧត្ដរមានជ័យ និងត្រូវដឹកតាមរថយន្តសង្គ្រោះបន្ទាន់ដោយសារមានរបួស។
អ្នកនាំពាក្យក្រសួងការពារជាតិ ឧត្ដមសេនីយ៍ឯក ម៉ាលី សុជាតា បានឲ្យដឹងថា វីរកងទ័ពទាំង ២នាក់ គឺអនុសេនីយ៍ត្រី អាង អឿង អាយុ ៣៧ឆ្នាំ និងលោកពលបាលឯក ម៉ម វុទ្ធី អាយុ ៥៣ឆ្នាំ បានមកដល់ទឹកដីប្រទេសកម្ពុជា វិញ។ លោកស្រីថា រាជរដ្ឋាភិបាលនឹងបន្តចរចាឱ្យអស់លទ្ធភាព ដើម្បីនាំយកកងកម្លាំងយោធាខ្មែរ ១៨រូបទៀតត្រឡប់មកវិញឱ្យបានឆាប់ និងដោយសុវត្ថិភាព។
ក្នុងចំណោមកងកម្លាំង ២នាក់ដែលត្រូវបានបញ្ជូនមកវិញនៅព្រឹកថ្ងៃទី១ សីហា នេះ មានម្នាក់រងរបួសដៃ និងម្នាក់ទៀតមានបញ្ហាស្មារតី។
រាជរដ្ឋាភិបាលប្រទេសកម្ពុជា ក៏បានស្នើប្រទេសម៉ាឡេស៊ី ដែលជាប្រធានអាស៊ានឱ្យជួយអន្តរាគមន៍ទៅភាគីថៃ ដើម្បីឆាប់ប្រគល់ទាហានខ្មែរដែលស្ថិតនៅក្រោមការគ្រប់គ្រងរបស់ថៃ មកឱ្យប្រទេសកម្ពុជា ឱ្យបានឆាប់បំផុតផងដែរ។
ដើមឡើយ ភាគីថៃ យល់ព្រមប្រគល់កងកម្លាំងទាំង ២០នាក់មកឱ្យកងទ័ពខ្មែរវិញនៅក្នុងថ្ងៃទី៣១ ខែកក្កដា តែបែរជាប្រកាសពន្យារពេលក្រោមហេតុផលការរៀបចំនីតិវិធីបញ្ជូនមិនទាន់បញ្ចប់។ បន្ទាប់មកទៀត នៅយប់ថ្ងៃទី៣១ ខែកក្កដា យោធាថៃ ប្តូរការសម្រេចចិត្តដោយសម្រេចបញ្ជូនកម្លាំងកម្ពុជាតែ ២រូបប៉ុណ្ណោះមកវិញនៅព្រឹកថ្ងៃទី១ ខែសីហា ហើយនៅសល់ ១៨រូបទៀត ថានឹងបញ្ជូនមកពេលក្រោយ ដោយមិនមានកំណត់ពេលជាក់លាក់វិញ។
នៅថ្ងៃទី៣១ ខែកក្កដា ប្រមុខរដ្ឋាភិបាលកម្ពុជា លោក ហ៊ុន ម៉ាណែត ក៏បានចេញមកបញ្ជាក់ជុំវិញព័ត៌មានដែលទាហានថៃ បានចាប់ទាហានខ្មែរ ថារដ្ឋាភិបាលប្រទេសកម្ពុជា គ្មានចេតនាលាក់បាំងព័ត៌មានណាមួយឡើយ។ លោក ហ៊ុន ម៉ាណែត ថាក្នុងដំណាក់កាលដំបូងដែលមិនទាន់មានព័ត៌មានច្បាស់លាស់អំពីជោគវាសនារបស់ទាហានខ្មែរទាំងនោះ ការគ្រប់គ្រងព័ត៌មានសំខាន់ណាស់ ព្រោះថាការបញ្ចេញព័ត៌មានមួយចំនួនអាចនឹងនាំគ្រោះថ្នាក់ដល់ជីវិតទាហានទាំងនោះ ឬក៏អាចបង្កឲ្យមានភាពស្មុគស្មាញកាន់តែខ្លាំងនៅក្នុងការចរចាសម្រាប់ការដោះលែងពួកគេឲ្យត្រឡប់មកវិញ។
យោងតាមលោក ច័ន្ទ សុភ័ត្រា មេបញ្ជាការតំបន់ប្រតិបត្តិការសឹករងខេត្តព្រះវិហារ បានអះអាងថា ហេតុការណ៍នេះបានកើតឡើងដោយទាហានថៃ បានហៅទាហានខ្មែរឲ្យមកថតរូបអនុស្សាវរីយ៍ជាមួយគ្នា តែភ្លាមៗនោះ ទាហានថៃ បានបញ្ជាឲ្យក្រុមខ្លួនដែលលាក់ខ្លួននៅក្នុងព្រៃ យកកាំភ្លើងភ្ជង់ និងចាប់ខ្លួនកងកម្លាំងរបស់លោកចំនួន ២០នាក់ តែមានម្នាក់បានរត់រួច ហើយ ២នាក់ទំនងត្រូវបានថៃ បាញ់សម្លាប់។
តាមសេចក្តីរាយការណ៍ពីទីភ្នាក់ងារព័ត៌មាន Associated Press (AP) នៅថ្ងៃសុក្រ ទី១ ខែសីហា នេះ ប្រទេសថៃឡង់ដ៍ និយាយថា អាជ្ញាធរយោធាថៃ អនុវត្តតាមនីតិវិធីច្បាប់អន្តរជាតិ ហើយនឹងដោះលែងទាហានទាំង ១៨នាក់នោះ បន្ទាប់ពីធ្វើការសាកសួរអំពីសកម្មភាពរបស់គេរួចរាល់៕
© 2025, . All rights reserved.