នាយករដ្ឋមន្ត្រីកម្ពុជា លោក ហ៊ុន ម៉ាណែត អបអរសាទរកម្ពុជា-ថៃ ដែលបានឯកភាពគ្នាលើលក្ខខណ្ឌនៃការអនុវត្តបទឈប់បាញ់ និងការបង្កើនការប្រាស្រ័យទាក់ទងគ្នារវាងកងទ័ពទៅវិញទៅមក រួមទាំងឱ្យមានក្រុមអ្នកសង្កេតការណ៍បណ្ដោះអាសន្ន។
លោក ហ៊ុន ម៉ាណែត បានសរសេរលើទំព័រហ្វេសប៊ុករបស់ខ្លួននៅថ្ងៃទី៧ សីហា នេះថា ភាគីទាំងពីរបានយល់ព្រមជំរុញការរៀបចំលក្ខខណ្ឌប្រតិបត្តិនៃយន្តការតាមដានត្រួតពិនិត្យការអនុវត្តបទឈប់បាញ់របស់ក្រុមអ្នកសង្កេតការណ៍អាស៊ាន (ASEAN Observer Team)។
ជាងនេះទៅទៀត ភាគីទាំងពីរក៏បានឯកភាពឱ្យមានក្រុមអ្នកសង្កេតការណ៍បណ្ដោះអាសន្ន (Interim Observer Team) ដឹកនាំដោយអនុព័ន្ធយោធាម៉ាឡេស៊ី ដើម្បីសង្កេតការណ៍ភ្លាមៗ និងបន្តរៀបចំក្រុមអ្នកសង្កេតការណ៍អាស៊ាន (ASEAN Observer Team) បន្ថែមទៀតផងដែរ។
លោក ហ៊ុន ម៉ាណែត បញ្ជាក់ថា ជាងនេះទៀត ភាគីទាំងពីរក៏បានឯកភាពគ្នារៀបចំកិច្ចប្រជុំរួមនៃគណៈកម្មាធិការព្រំដែនថ្នាក់ភូមិភាគ (RBC) ក្នុងរង្វង់ពីរសប្តាហ៍ទៀត និងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ក្នុងរង្វង់មួយខែក្រោយនៃកិច្ចប្រជុំវិសាមញ្ញ GBC។
លោកបន្ថែមថា ក្នុងករណីចាំបាច់ ភាគីទាំងពីរអាចកោះប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) ក្នុងទម្រង់ដែលបានអនុវត្តនៅប្រទេសម៉ាឡេស៊ី នាពេលកន្លងមកនេះ។
នាយករដ្ឋមន្ត្រីខ្មែររូបនេះបញ្ជាក់ថា ក្នុងកិច្ចប្រជុំនេះ កម្ពុជាក៏បានស្នើសុំឲ្យមានការដោះលែងយោធិនកម្ពុជា ទាំង ១៨រូប ដែលស្ថិតនៅក្នុងការឃុំគ្រងរបស់កងទ័ពថៃ ឲ្យបានឆាប់រហ័សផងដែរ។
នៅថ្ងៃទី៧ ខែសីហា នេះ កិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) ត្រូវបានធ្វើឡើងនៅប្រទេសម៉ាឡេស៊ី ដោយមានការចូលរួមសង្កេតការណ៍ពីប្រទេសម៉ាឡេស៊ី សហរដ្ឋអាមេរិក និងសាធារណរដ្ឋប្រជាមានិតចិន។ កិច្ចប្រជុំនេះ បានព្រមព្រៀងគ្នាលើលក្ខខណ្ឌចំនួន ១៣ចំណុច ដែលសុទ្ធសឹងតែជាយន្តការធានាបទឈប់បាញ់ រួមមាន ភាគីទាំងពីរបានឯកភាពគ្នាលើបទឈប់បាញ់នូវគ្រប់ប្រភេទអាវុធទាំងអស់ រួមទាំងការវាយប្រហារលើជនស៊ីវិល វត្ថុស៊ីវិល និងគោលដៅយោធានៃភាគីទាំងសងខាងក្នុងគ្រប់ករណី និងតំបន់ទាំងអស់។
បន្ថែមពីនេះ ត្រូវចៀសវាងការបាញ់ប្រហារទាំងគ្មានការបង្កហេតុ សំដៅទៅលើទីតាំង ឬកងទ័ពរបស់ភាគីម្ខាងទៀត ហើយការព្រមព្រៀងនេះ មិនត្រូវបំពានដាច់ខាត ទោះស្ថិតក្រោមកាលៈទេសៈបែបណាក៏ដោយ។
ជាងនេះទៀត ភាគីទាំងសងខាងបានឯកភាពទប់ស្កាត់ព័ត៌មានក្លែងក្លាយ ឬព័ត៌មានមិនពិតក្នុងគោលបំណងបន្ធូរបន្ថយភាពតានតឹង កាត់បន្ថយគំនិតអវិជ្ជមានរបស់សាធារណជន និងពង្រឹងបរិយាកាសអំណោយផលដើម្បីឆ្ពោះទៅរកកិច្ចពិភាក្សាប្រកបដោយសន្តិភាព និងលក្ខខណ្ឌជាច្រើនផ្សេងទៀតផងដែរ។
ជុំវិញបញ្ហានេះ អ្នកនាំពាក្យក្រុមអ្នកតស៊ូមតិ (CAT) លោក មួង ណារ៉េត អះអាងថា លក្ខខណ្ឌនៃកិច្ចព្រមព្រៀងបទឈប់បាញ់នេះ ទើបមានប្រសិទ្ធភាពក្នុងការបញ្ចប់សង្គ្រាមរវាងប្រទេសទាំងពីរ។
ក្រសួងការពារជាតិកម្ពុជា ចេញសេចក្តីប្រកាសព័ត៌មាននៅថ្ងៃទី៧ សីហា នេះថា កិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) នៅប្រទេសម៉ាឡេស៊ី បានប្រព្រឹត្តទៅក្នុងបរិយាកាសស្ថាបនា និងវិជ្ជមាន ដែលនាំមកនូវលទ្ធផលប្រកបដោយផ្លែផ្កា និងឯកភាពលើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្តបន្តទៀត។
ប្រភពដដែល បញ្ជាក់ថា ភាគីទាំងពីរក៏បានឯកភាពអនុម័តនូវកំណត់ហេតុនៃកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) រវាងប្រទេសទាំងពីរ និងសេចក្តីថ្លែងការណ៍រួមផងដែរ៕
© 2025, . All rights reserved.