ម្តាយមីងបង្កើតរបស់នាយករដ្ឋមន្ត្រីខ្មែរ លោក ហ៊ុន ម៉ាណែត គឺអ្នកស្រី ហ៊ុន ស៊ីណាត អំពាវនាវឱ្យពលរដ្ឋខ្មែរធ្វើពហិការបញ្ឈប់ការប្រើប្រាស់ទំនិញថៃ ក្រោមហេតុផលថា ថៃលក់ទំនិញឱ្យខ្មែរប្រមូលលុយយកទៅទិញអាវុធមកប្លន់ទឹកដីខ្មែរវិញ។
អ្នកស្រី ហ៊ុន ស៊ីណាត ដែលត្រូវជាប្អូនស្រីបង្កើតរបស់លោក ហ៊ុន សែន លើកឡើងនៅថ្ងៃទី១៣ សីហា នេះថា សង្គ្រាមឈ្លានពានទឹកដីខ្មែរត្រឹមតែ ៥ថ្ងៃប៉ុណ្ណោះ ថៃហ៊ានប្រើម្សៅគីមីបាចពីលើយន្តហោះមកលើប្រជាជនខ្មែរ និងកងទ័ពខ្មែរ ចុះទម្រាំតែអាហារមិនដឹងថា តើថៃ បានដាក់គីមីកម្រិតណានោះទេ ដែលបាននាំចូលមកឱ្យខ្មែរបរិភោគនាពេលកន្លងមកនោះ។
អ្នកស្រីបន្តថា មកដល់ពេលនេះហើយនៅតែមានថៅកែក្រុមហ៊ុនដែលនាំទំនិញមកពីថៃ មួយចំនួន បន្តលក់ទំនិញថៃ ឱ្យពលរដ្ឋខ្មែរទៀត ខណៈទំនិញទាំងនោះក៏ត្រូវបានផ្លាស់ប្ដូរស្លាកសញ្ញារបស់ប្រទេសថៃ ចេញផងដែរ ក្នុងចេតនាឆ្លៀតឱកាសកេងចំណេញប្រាក់ដោយមិនខ្វល់ពីសុខភាពរបស់ពលរដ្ឋ និងមុខមាត់របស់ប្រទេសជាតិ។
ប្អូនស្រីលោក ហ៊ុន សែន ចាត់ទុកទង្វើថៅកែក្រុមហ៊ុនដែលនៅតែបន្តនាំចូលទំនិញថៃ យកមកលក់ឱ្យពលរដ្ឋខ្មែរ គឺជាការចូលដៃជាមួយចោរ ក្នុងចេតនាសម្លាប់ខ្មែរដោយប្រយោល ដូចជា ការនាំចូលតាមប្រទេសឡាវ តាមខេត្តព្រះសីហនុ និងតាមផ្លូវអាកាស ជាដើម។
អ្នកស្រីបន្តថា ចំពោះការអះអាងរបស់ថៅកែខ្មែរខ្លះដែលថាពួកគេលក់ទំនិញថៃ ឱ្យអស់ពីឃ្លាំង គឺគ្រាន់តែជាពាក្យភូតកុហកប៉ុណ្ណោះ ព្រោះពួកគេមិនត្រឹមតែព្យាយាមនាំចូលទំនិញថៃ បំពេញក្នុងឃ្លាំងបន្ថែមទៀតទេ និងថែមទាំងលួចផ្លាស់ប្ដូរស្លាកសញ្ញាសម្គាល់ទំនិញពីប្រទេសថៃ ដោយដាក់ជំនួសប្រទេសផ្សេងថែមទៀត។
អ្នកស្រី ហ៊ុន ស៊ីណាត ចាត់ទុកអ្នកដែលបន្តនាំទំនិញថៃ មកលក់ឱ្យពលរដ្ឋខ្មែរក្នុងពេលនេះ ជាមនុស្សបម្រើមហិច្ឆតាឈ្លានពានរបស់ថៃ ព្រោះថៃ មិនត្រឹមតែលួចទឹកដីខ្មែរ និងបាញ់សម្លាប់ពលរដ្ឋខ្មែរដោយអាវុធទេ គឺថែមទាំងដាក់គីមីក្នុងចំណីអាហារសម្លាប់ខ្មែរដោយស្របច្បាប់តែម្តង។
កាលពីថ្ងៃទី១១ ខែសីហា ឆ្នាំ២០២៥ រដ្ឋមន្ត្រីក្រសួងពាណិជ្ជកម្មថៃ លោក Jatuporn Buruspat បានជួបជាមួយឯកអគ្គរដ្ឋទូតឡាវ ដើម្បីស្វែងរកការចរចានូវការដឹកជញ្ជូន និងថ្លៃទំនិញឆ្លងកាត់ខេត្តអុប៊ុន (Ubon Ratchathani) ទៅកាន់ប្រទេសឡាវ និងប្រទេសកម្ពុជា។
រដ្ឋមន្ត្រីក្រសួងពាណិជ្ជកម្មថៃ រូបនេះ បញ្ជាក់ថា មជ្ឈមណ្ឌលពាណិជ្ជកម្មកំពុងពិគ្រោះយោបល់លើពាណិជ្ជកម្មតាមព្រំដែន ខណៈផលិតផលលក់រាយកំពុងមានវត្តមាននៅក្នុងប្រទេសកម្ពុជា ឡើងវិញហើយ ប៉ុន្តែអាជីវកម្មទាំងនេះបានផ្លាស់ប្ដូរការដឹកជញ្ជូនទៅតាមផ្លូវទឹក និងឆ្លងកាត់ប្រទេសឡាវ វិញ៕
© 2025, . All rights reserved.