ប្រធានអ្នកឆ្លើយឆ្លងព័ត៌មានរបស់សេតវិមានរបស់ប្រធានាធិបតីអាមេរិក លោក ហ្គារី ហ្វ្រង់ស៊ី (Gary Franchi) អះអាងថា ប្រទេសថៃ បានដាក់លោក Michael B Alfaro និងរូបលោកផ្ទាល់ក្នុងបញ្ជីខ្មៅរបស់ពួកគេ បន្ទាប់ពីលោករាយការណ៍អំពីវិបត្តិព្រំដែនកម្ពុជា-ថៃ និងបានដឹកនាំព្រះសង្ឃកម្ពុជា ៧០០០អង្គ ដើម្បីគាំទ្រលោកប្រធានាធិបតីអាមេរិកសម្រាប់រង្វាន់ណូបែលសន្តិភាព។
ប្រធានអ្នកឆ្លើយឆ្លងព័ត៌មានរបស់សេតវិមានប្រធានាធិបតីអាមេរិក លោក ហ្គារី ហ្វ្រង់ស៊ី (Gary Franchi) សរសេរលើទំព័រហ្វេសប៊ុករបស់ខ្លួននៅថ្ងៃទី២១ សីហា នេះថា ដោយសារការរាយការណ៍របស់លោក និងទីប្រឹក្សាប្រធានាធិបតីអាមេរិក លោក ដូណាល់ ត្រាំ គឺលោក ម៉ៃឃើល ប៊ើរី អាល់ហ្វារ៉ូ (Michael B Alfaro) បានជំរុញឱ្យមានការធ្វើអន្តរាគមន៍ដោយផ្ទាល់ពីលោកប្រធានាធិបតីអាមេរិក លោក ដូណាល់ ត្រាំ ជុំវិញវិបត្តិព្រំដែនកម្ពុជា-ថៃ នាពេលនេះ។
លោក ហ្គារី ហ្វ្រង់ស៊ី (Gary Franchi) លើកឡើងថា ថៃអាចដាក់រូបលោក និងលោក ម៉ៃឃើល ប៊ើរី អាល់ហ្វារ៉ូ (Michael B Alfaro) ក្នុងបញ្ជីខ្មៅរបស់ពួកគេបាន ហើយក៏អាចលាបពណ៌លើរូបលោកបន្ថែមទៀតបានដែរ ប៉ុន្តែថៃ មិនអាចលុបបំបាត់ការពិតចំពោះរបាយការណ៍ដែលលោកបានផ្តល់ជូនប្រធានាធិបតីសហរដ្ឋអាមេរិក លោក ដូណាល់ ត្រាំ បានឡើយ។
លោករៀបរាប់ថា លោក ម៉ៃឃើល ប៊ើរី អាល់ហ្វារ៉ូ (Michael B Alfaro) បានធ្វើដំណើរទៅប្រទេសកម្ពុជា ក្រោយមានបទឈប់បាញ់ ដោយផ្សាយផ្ទាល់លើបណ្ដាញសង្គមពីជនភៀសខ្លួនដែលរស់នៅក្នុងតង់ប្លាស្ទិក សាលារៀន និងប្រាសាទដែលត្រូវបានបំផ្លាញ រួមទាំងរាយការណ៍ពីទាហានកម្ពុជា ១៨នាក់ដែលត្រូវបានចាប់ខ្លួនដោយកងកម្លាំងថៃ ផងដែរ។
លោកបន្តថា ការផ្សាយបន្តផ្ទាល់របស់លោក អាល់ហ្វារ៉ូ (Alfaro) អំពីរឿងនេះ បានទាក់ទាញអ្នកទស្សនាជាង ៩លាននាក់ក្នុងរយៈពេលត្រឹមតែមួយម៉ោងក្នុងការបង្ហាញពីការពិតដែលប្រព័ន្ធផ្សព្វផ្សាយសំខាន់ៗមួយចំនួនមិនអើពើ ហើយលោកក៏បានពង្រីកការរកឃើញទាំងនោះដល់មនុស្សរាប់លាននាក់ថែមទៀតដែរ តាមរយៈបណ្ដាញព័ត៌មាន Next News Network។
ប្រធានអ្នកឆ្លើយឆ្លងព័ត៌មានរបស់សេតវិមានរូបនេះ បញ្ជាក់ថា យុទ្ធនាការលាបពណ៌ដែលធ្វើឡើងដោយកងទ័ពថៃ និងអ្នកកាសែតឆ្វេងនិយមដែលហៅលោក ម៉ៃឃើល ប៊ើរី អាល់ហ្វារ៉ូ ថាជា “អ្នកបញ្ចុះបញ្ចូល” ហើយរូបលោកផ្ទាល់គ្រាន់តែជា YouTuber នោះ គឺជាចេតនាបង្អាប់ដើម្បីលុបបំបាត់ការពិតប៉ុណ្ណោះ។
កាលពីថ្ងៃទី១៥ ខែសីហា ឆ្នាំ២០២៥ លោក ម៉ៃឃើល ប៊ើរី អាល់ហ្វារ៉ូ (Michael B Alfaro) បានទៅដល់ប្រទេសកម្ពុជា និងចុះទៅជួបប្រជាពលរដ្ឋដោយផ្ទាល់នៅជំរំជនភៀសសឹក និងតំបន់ជម្លោះតាមបណ្តោយព្រំដែនកម្ពុជា-ថៃ ផ្សេងទៀត ទាំងមេឃកំពុងធ្លាក់ភ្លៀងនៅយប់ថ្ងៃដដែលនោះ។
លោក Michael B Alfaro បានធ្វើសេចក្តីរាយការណ៍ផ្ទាល់នៅច្រកអូរបីជាន់ ខេត្តបន្ទាយមានជ័យ ជាទីដែលថៃ បានរាយលួសបន្លា ដាក់រនាំង និងសម្បកកង់ឡាន ដែលពលរដ្ឋខ្មែរនៅទីនោះប្រាប់ថាទាហានថៃ បានហ៊ុមព័ទ្ធយកផ្ទះរបស់ពួកគេ។
ជុំវិញបញ្ហានេះ កាលពីថ្ងៃទី១៧ ខែសីហា ឆ្នាំ២០២៥ សារព័ត៌មាន ខៅស៊ុត (Khaosod) បានស្រង់សម្ដីអ្នកនាំពាក្យរដ្ឋាភិបាលថៃ លោក ជីរ៉ាយុ ហួងសព្ទ (Jirayu Huangsap) ថា លោក ម៉ៃឃើល ប៊ើរី អាល់ហ្វារ៉ូ (Michael B Alfaro) មិនត្រូវបានស្វាគមន៍ឱ្យចូលទៅក្នុងប្រទេសថៃ ឡើយ បើទោះបីជាប្រទេសថៃ ធ្លាប់បានអញ្ជើញគាត់រួចហើយក៏ដោយ។
ប្រភពដដែល បញ្ជាក់ថា ការលុបការអញ្ជើញនេះ ដោយសារតែលោក ម៉ៃឃើល ប៊ើរី អាល់ហ្វារ៉ូ បានបំភ្លៃការពិតលើសំណុំរឿងព្រំដែនកម្ពុជា-ថៃ។ ជាងនេះទៀត ក៏ដោយសារតែថៃ បានរកឃើញថា ជនជាតិអាមេរិកកាំងរូបនេះមិនមែនជាអ្នកឆ្លើយឆ្លងព័ត៌មានរបស់សេតវិមាននោះទេ គឺគ្រាន់តែជាអ្នកបញ្ចុះបញ្ចូលរបស់កម្ពុជាប៉ុណ្ណោះ។
យ៉ាងណាក៏ដោយ ក្រោយការចោទប្រកាន់របស់ថៃ បែបនេះ កាលពីថ្ងៃទី១៧ សីហា ប្រធានអ្នកឆ្លើយឆ្លងព័ត៌មានសេតវិមាននៅក្រុមហ៊ុន Next News Network លោក ហ្គារី ហ្វ្រែនស៊ី (Gary Franchi) បានអះអាងថា លោក ម៉ៃឃើល ប៊ើរី អាល់ហ្វារ៉ូ (Michael B Alfaro) មិនមែនជាអ្នកបញ្ចុះបញ្ចូល (lobbyist) សម្រាប់កម្ពុជា ទេ ហើយលោកក៏មិនបានទទួលប្រាក់ណាមួយពីរាជរដ្ឋាភិបាលកម្ពុជា ដែរ។
លោក ហ្គារី ហ្វ្រែនស៊ី បញ្ជាក់ថា លោក ម៉ៃឃើល ប៊ើរី អាល់ហ្វារ៉ូ (Michael B Alfaro) បានចំណាយលើការធ្វើដំណើរផ្ទាល់ខ្លួនរបស់លោក បន្ទាប់ពីសារព័ត៌មាន One America News ទទួលបានលិខិតបញ្ជាក់ពីសេតវិមានគាំទ្រអំពីបេសកកម្មរបស់លោក ដោយយោងទៅលើហានិភ័យផ្នែកសុវត្ថិភាពនៅព្រំដែនកម្ពុជា-ថៃ នោះ៕
© 2025, . All rights reserved.