ពីប្រទេសស៊ុយអែត សមាជិកសភាមកពីបក្សប្រឆាំង ទាមទារទៅកាន់បក្សកាន់អំណាច ឱ្យផ្អាកជាបន្ទាន់នូវការលក់អាវុធគ្រប់ប្រភេទទៅឱ្យរាជាណាចក្រថៃ។
សមាជិកសភា ២រូបនៃគណបក្ស Green Party ដែលជាបក្សប្រឆាំងនៅប្រទេសស៊ុយអែត បានរួមគ្នាអំពាវនាវឱ្យរដ្ឋាភិបាលរបស់ពួកគេ ផ្អាកការលក់អាវុធទៅឱ្យប្រទេសថៃ។
សមាជិកសភាបក្សប្រឆាំង ២រូបនេះមានឈ្មោះ Jacob Risberg និង Emma Nohren បញ្ជាក់ថា យន្តហោះចម្បាំង Jas Gripen របស់ស៊ុយអែត ត្រូវបានប្រើប្រាស់ក្នុងសមរភូមិប្រយុទ្ធនៅពេលដែលយោធាថៃ បានបើកការវាយប្រហារទៅលើគោលដៅស្ថិតនៅតាមបណ្តោយព្រំដែនខាងក្នុងទឹកដីប្រទេសកម្ពុជា ដែលបង្កគ្រោះថ្នាក់ដល់អាយុជីវិតពលរដ្ឋ និងទ្រព្យសម្បត្តិរបស់ពលរដ្ឋកម្ពុជា។
ការទាមទាររបស់សមាជិកសភាពីខាងបក្សប្រឆាំងនៅប្រទេសស៊ុយអែត ធ្វើឡើងបន្ទាប់ពីយន្តហោះចម្បាំង Jas Gripen ដែលផលិតដោយក្រុមហ៊ុនមួយនៃប្រទេសស៊ុយអែត ត្រូវបានកងទ័ពអាកាសថៃ ប្រើប្រាស់អំឡុងពេលសង្គ្រាមព្រំដែនកាលពីចុងខែកក្កដា ដោយវាយប្រហារលើដែនដីកម្ពុជា។ នេះបើតាម Website Dagens Arena នៃប្រទេសស៊ុយអែត ដែលបានចុះផ្សាយនៅថ្ងៃពុធ ទី២៧ ខែសីហា។
អ្នកនយោបាយស៊ុយអែត ទាំងពីរនាក់នេះបានថ្លែងថា ទោះបីជាប្រទេសស៊ុយអែត មានការកំណត់លក្ខខណ្ឌក្នុងការលក់សព្វាវុធរបស់ខ្លួនឱ្យបរទេសក៏ដោយ តែការលក់ឱ្យទៅប្រទេសប្រកាន់របបផ្ដាច់ការ ឬប្រទេសគ្រប់គ្រងដោយពួកយោធាដែលគ្មានប្រជាធិបតេយ្យពិតប្រាកដ ដូចជារាជាណាចក្រថៃ គឺជាការមិនសមរម្យនោះទេ។
តែបើតាមគេហទំព័រ Dagens Arena ដដែលនេះ កាលពីចន្លោះឆ្នាំ២០១៩ ដល់ឆ្នាំ២០២៣ ស៊ុយអែត បាននាំចេញសម្ភារៈសឹកទៅឱ្យប្រទេសថៃ មានទំហំ ២០៨លានដុល្លារអាមេរិក។
កាលពីថ្ងៃទី២៥ ខែសីហា ថ្មីៗនេះ រដ្ឋាភិបាលស៊ុយអែត ទើបតែចុះកិច្ចព្រមព្រៀងលក់យន្តហោះចម្បាំង Jas Gripen ចំនួន ៤គ្រឿងទៀត ជាមួយសម្ភារៈសឹកជាច្រើនក្នុងទំហំទឹកប្រាក់ ៥៥៥លានដុល្លារ។
ទីក្រុងបាងកក ដាក់ផែនការទិញយន្តហោះ Jas Gripen ស៊េរីថ្មីចំនួន ១២គ្រឿងពីក្រុមហ៊ុន Saab របស់ប្រទេសស៊ុយអែត ខណៈប្រទេសថៃ មានយន្តហោះប្រភេទនេះចំនួន ១០គ្រឿងដែលបានប្រើប្រាស់វាយប្រហារលើប្រទេសកម្ពុជា ក្នុងសង្គ្រាម ៥ថ្ងៃកន្លងមក។
ការចុះកិច្ចព្រមព្រៀងនេះ កើតមានឡើងត្រឹមតែ ២ឆ្នាំប៉ុណ្ណោះ បន្ទាប់ពីសហរដ្ឋអាមេរិក បានសម្រេចមិនលក់យន្តហោះចម្បាំងប្រភេទ F-35 ទៅឱ្យថៃ បើទោះរាជាណាចក្រមួយនេះកំពុងប្រើប្រាស់យន្តហោះ F-16 របស់អាមេរិកក៏ដោយ។
លោក Jacob Risberg និងលោកស្រី Emma Nohren អំពាវនាវឲ្យស៊ុយអែត ចាំបាច់ត្រូវរឹតបន្តឹងនូវលក្ខខណ្ឌនៃការនាំចេញសព្វាវុធរបស់ខ្លួនទៅក្រៅប្រទេស។ សមាជិកសភាស៊ុយអែត ទាំងពីររូបនេះយល់ឃើញថា រាជាណាចក្រថៃ បានកំពុងធ្លាក់ក្នុងអំណាចរបស់ពួកយោធា ដែលជារបបផ្ដាច់ការ និងរដ្ឋាភិបាលស៊ីវិលដែលទន់ខ្សោយអស់រយៈពេលរាប់ទសវត្សរ៍មកហើយ។
បើតាមសមាជិកសភាបក្សប្រឆាំងស៊ុយអែត ការផ្តល់យន្តហោះចម្បាំងជាច្រើនគ្រឿងថែមទៀតដល់របបដឹកនាំមួយក្រោមអំណាចរបស់យោធា ដូចជារាជាណាចក្រថៃ នេះ មិនជួយលើកកម្ពស់សន្តិភាព និងស្ថិរភាពនៅក្នុងតំបន់ទេ។
ទោះជាយ៉ាងនេះក្ដី រដ្ឋមន្ត្រីការពារជាតិស៊ុយអែត លោក Pål Jonson អះអាងថា កាលៈទេសៈនេះវាសមស្របសម្រាប់ការការពារខ្លួន។
ក្រោយពីចុះកិច្ចព្រមព្រៀងលក់យន្តហោះទាំងនេះទៅរាជាណាចក្រថៃ គេមើលឃើញថាប្រទេសស៊ុយអែត មានទំនាក់ទំនងជាមួយថៃ ឡើងដល់កម្រិតយុទ្ធសាស្ត្រទ្វេភាគី៕
© 2025, . All rights reserved.