នាយករដ្ឋមន្ត្រីប្រទេសម៉ាឡេស៊ី លោក អាន់វ៉ា អ៊ីប្រាហ៊ីម និងស៊ុលតង់ព្រះចៅប្រទេសប្រ៊ុយណេ អំពាវនាវឱ្យប្រទេសកម្ពុជា និងប្រទេសថៃឡង់ដ៍ បន្តអនុវត្តបទឈប់បាញ់គ្នា ដោយងាកមកចូលរួមក្នុងការសន្ទនាដោយការស្ថាបនា ដើម្បីរកដំណោះស្រាយប្រកបដោយចីរភាព និងសន្តិភាព។
ទីភ្នាក់ងារសារព័ត៌មានម៉ាឡេស៊ី Bernama បានចុះផ្សាយនៅថ្ងៃទី២៨ សីហា នេះថា នាយករដ្ឋមន្ត្រី អាន់វ៉ា អ៊ីប្រាហ៊ីម និងព្រះចៅ ហាស់សាណាល់ ប៊ុលគីយ៉ះ (Sultan Hassanal Bolkiah) នៃប្រទេសប្រ៊ុយណេ បានចេញសេចក្តីថ្លែងការណ៍រួមមួយក្រោយកិច្ចប្រជុំពិគ្រោះយោបល់ប្រចាំឆ្នាំទ្វេភាគីលើកទី២៦ (Annual Leaders’ Consultation=ALC) នៅប្រទេសម៉ាឡេស៊ី កាលពីថ្ងៃទី២៧ ខែសីហា ជុំវិញការអនុវត្តកិច្ចព្រមព្រៀងបទឈប់បាញ់រវាងកម្ពុជា-ថៃ។
មេដឹកនាំរដ្ឋាភិបាលនៃប្រទេសទាំងពីរ ចាត់ទុកថាការអនុវត្តឱ្យបានត្រឹមត្រូវនូវកិច្ចព្រមព្រៀងបទឈប់បាញ់នេះ គឺជាការឆ្លុះបញ្ចាំងពីគោលការណ៍អាស៊ាននៃការគោរពគ្នាទៅវិញទៅមក គោលការណ៍មិនជ្រៀតជ្រែក និងការដោះស្រាយវិវាទដោយសន្តិវិធី។
សេចក្តីថ្លែងការណ៍រួមដដែលបញ្ជាក់ថា ម៉ាឡេស៊ី និងប្រ៊ុយណេ នៅតែបន្តប្ដេជ្ញាចិត្តចំពោះគោលការណ៍កណ្តាល និងឯកភាពរបស់អាស៊ាន ក្នុងការលើកកម្ពស់សន្តិភាព ស្ថិរភាព និងការអភិវឌ្ឍក្នុងតំបន់ ខណៈដែលមានភាពមិនច្បាស់លាស់ជាសកល។
កិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (Extraordinary GBC Meeting) ត្រូវបានធ្វើឡើងនៅប្រទេសម៉ាឡេស៊ី រវាងប្រទេសកម្ពុជា និងប្រទេសថៃ កាលថ្ងៃទី៧ ខែសីហា ឆ្នាំ២០២៥ ដោយភាគីទាំងពីរបានព្រមព្រៀងគ្នាលើលក្ខខណ្ឌចំនួន ១៣ចំណុចដែលជាយន្តការធានាឱ្យមានបទឈប់បាញ់ជុំវិញជម្លោះព្រំដែនរបស់ខ្លួន។
កិច្ចប្រជុំនេះ ធ្វើឡើងទៅតាមសំណើប្រធានាធិបតីសហរដ្ឋអាមេរិក ដែលបានជំរុញឱ្យភាគីទាំងពីរព្រមព្រៀងគ្នាលើបទឈប់បាញ់គ្នា បន្ទាប់ពីជម្លោះនៅតាមព្រំដែនបង្កទៅជាសង្គ្រាមប្រដាប់អាវុធកាលពីថ្ងៃទី២៤ ខែកក្កដា ឆ្នាំ២០២៥ កន្លងទៅនោះ។
ជុំវិញបញ្ហានេះ កាលពីថ្ងៃទី២០ ខែសីហា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានផ្ញើលិខិតមួយទៅកាន់នាយករដ្ឋមន្ត្រីប្រទេសកម្ពុជា លោក ហ៊ុន ម៉ាណែត ដែលត្រូវបានផ្សព្វផ្សាយកាលពីថ្ងៃពុធ ដើម្បីថ្លែងអំណរគុណចំពោះការស្នើឲ្យរូបលោកជាបេក្ខជនពានរង្វាន់ណូបែលសន្តិភាព បន្ទាប់ពីលោកបានជួយធ្វើអន្តរាគមន៍ឱ្យមានបទឈប់បាញ់រវាងកម្ពុជា-ថៃ។
ប្រធានាធិបតីសហរដ្ឋអាមេរិករូបនេះបញ្ជាក់ថា លោកពិតជាមានកិត្តិយសក្រៃលែងដែលបានរួមចំណែកបញ្ចប់ជម្លោះប្រដាប់អាវុធរវាងប្រទេសកម្ពុជា និងប្រទេសថៃ ហើយលោកជឿជាក់ថា លោក ហ៊ុន ម៉ាណែត គឺជាមេដឹកនាំដ៏ឆ្នើមមួយរូបដែលផ្តល់តម្លៃលើជីវិតមនុស្ស និងស្រឡាញ់សន្តិភាព៕
© 2025, . All rights reserved.